ពលរដ្ឋ​ភូមិកោះថ្មី ស្រុកកោះសូទិន​ ធ្វេីត្រីឆ្អេីរ ដេីម្បីជូនកងទ័ពជួរមុខនៅតាមព្រំដែនកម្ពុជា-ថៃ

សហគមន៍​ត្រីឆ្អេីរកោះថ្មី​ របស់អ្នកភូមិកោះថ្មី​ ក្នុងឃុំកោះសូទិន​ ខេត្តកំពង់ចាម​ ​បានរួមគ្នាធ្វេីជាត្រីឆ្អេីរ​៣០០០ចង្កាក់ រួមនឹងដាំបន្លែបង្ការផ្សេងៗ​ ដើម្បីត្រៀមជូនដល់វីរៈកងទ័ពជួរមុខដែលកំពុងឈរជេីងនៅតាមខ្សែបន្ទាត់ព្រំដែនកម្ពុជាថៃ។ 

ដោយមេីលឃេីញក្នុងស្មារតីខ្មែរជួយខ្មែរ​ នឹងដើម្បីជាតិខ្មែរ ខ្មែរមានសាមគ្គីភាព​គ្នានោះ​ លោក​ អ៊ុន​ ចាន់ដា​ អភិបាលខេត្តកំពង់ចាម​ ផ្តួចផ្តើមថវិកាឱ្យអ្នកភូមិកោះថ្មី​ ឃុំកោះសូទិន​ ស្រុកកោះសូទិន​ បង្កេីត​សហគមន៍​ធ្វេីត្រីឆ្អេីរ ខណៈ​បច្ចុប្បន្ន​រដូវនេះជារដូវរំហេីយ​ និងតាមដងទន្លេមេគង្គសំបូរត្រីផងដែរ។

ប្រជាពលរដ្ឋ​នៅភូមិកោះថ្មី​នេះ​ លោក​ នៅ​ សុខ​ បា​នបង្ហាញអារម្មណ៍សប្បាយរីករាយ​ក្នុងការចូលរួមធ្វេីត្រីឆ្អេីរ​នេះ​ គឺដោយយកត្រីស្លឹកឬស្សី​ ឬត្រីរៀល​មកធ្វេី​ដែលប្រជានេសាទបានពីទន្លេមេគង្គ​ ក្នុងគោលដៅធ្វេីត្រីឆ្អេីរយកទៅផ្តល់ជូនកម្លាំងជួរមុខ​ ដែលកំពុងឈរជេីងការពារបូរណភាពទឹកដីកម្ពុជា។​

តំណាង​ប្រជាពលរដ្ឋ​រស់នៅក្នុងភូមិកោះថ្មី​ ឃុំកោះសូទិន​ នៃស្រុកកោះសូទិន​ បានថ្លែងអំណរគុណដល់​ លោក​ អ៊ុន​ ចាន់ដា​ អភិបាលខេត្តកំពង់ចាម​ ដដែលបានផ្តួចផ្តេីមចងក្រងជាសហគមន៍ត្រីឆ្អេីរ​ និងផ្តល់ថវិកា​ទិញត្រីធ្វេីឆ្អេីរជូនដល់​​កងទ័ព​នេះគឺបង្ហាញឱ្យឃេីញថា​ កម្លាំងសាមគ្គី​ជួរក្រោយនៅតែលេីកទឹកចិត្តទាំងថវិកា​ ស្បៀងអាហារ​ ថ្នាំសង្កូវ​ និងសម្ភារៈ​ប្រើប្រាស់​ផ្សេង​ៗ​ ក្នុងការផ្តល់ដល់វីរៈកងទ័ពខ្មែរយេីង​ ដែលកំពុងឈរការពារបូរណទឹកដីនៅតាមបន្ទាត់ព្រំដែនកម្ពុជាថៃ​។ 

ក្នុងការចុះពិនិត្យ​ និងសំណេះសំណាលជាមួយបងប្អូនប្រជាពលរដ្ឋនៅភូមិកោះថ្មី​ ឃុំកោះសូទិន​ ស្រុកកោះសូទិន​នេះដែរ​ លោក​ អ៊ុន​ ចាន់ដា​ អភិបាលខេត្តកំពង់ចាម​ បានចងក្រងឲ្យភូមិនៅតំបន់នេះបង្កេីតជាសហគមន៍ត្រីឆ្អេីរ​ ដោយបានដាក់ឈ្មោះថា​ សហគមន៍​ត្រីឆ្អេីរកោះថ្មី​ ដោយឃេីញពីសក្តានុពលនៅតំបន់នេះជាប់ដងទន្លេមេគង្គ​សំបូរត្រី​ និងអ្នកភូមិ​សាមគ្គី​ភាព​គ្នាល្អ​ទៀតផង។ ហេីយលោក អភិបាលខេត្តកំពង់ចាម​ ក៏បានផ្តល់ថវិកា​ ដេីម្បីទិញត្រីធ្វេីត្រីឆ្អេីរឱ្យបាន៣០០០ចង្កាក់​ ដេីម្បីត្រៀមផ្តល់ជូនវីរកងទ័ពជួរមុខដែលបាននឹងកំពុងខិតខំតស៊ូការពារនៅតាមបន្ទាត់ព្រំដែនកម្ពុជា-ថៃ យ៉ាងអង់អាចក្លាហាន មុះមុត ប្រឆាំងនឹងសត្រូវឈ្លានពាន ប្រកបដោយស្មារតីស្នេហាជាតិមាតុភូមិ៕

អត្ថបទ​និង​រូបភាព​ ៖​ ឡេក​ ចាន់ពេជ្រ​