រដ្ឋបាលខេត្តសម្រុកកែប្រែសណ្ឋាគារមេគង្គទៅជាមន្ទីរពេទ្យមេគង្គកំពង់ចាមឱ្យហើយក្នុងខែនេះ

ខេត្តកំពង់ចាម​៖​ នៅព្រឹក​ ថ្ងៃទី​២១​ ខែមេសា​ ឆ្នាំ​២០២១​ ឯកឧត្តម អ៊ុន ចាន់ដា អភិបាល នៃគណៈអភិបាល និងជាប្រធានគណៈកម្មការខេត្ត ប្រយុទ្ធប្រឆាំងនិងជំងឺកូវីដ-១៩ ដឹកនាំមន្ត្រីពាក់ព័ន្ធ​ បានអញ្ជើញ​ចុះពិនិត្យ​ និងរៀបចំកែលំអ​ អតីតសណ្ឋាគារមេគង្គ​​ ដែលបានកែប្រែទៅជាមន្ទីរពេទ្យមេគង្គកំពង់ចាម​ សម្រាប់ពិនិត្យព្យាបាលអ្នកជម្ងឺកូវីដ-១៩​ ខេត្ត​ត្បូង​ឃ្មុំ​ និងខេត្ត​កំពង់ចាម​។

គិតត្រឹមថ្ងៃទី២១ ខែមេសា​នេះ​ អ្នកកំពុងធ្វើចក្តាឡីស័កនៅតាមមណ្ឌលចក្តាឡីស័កគរុកោសល្យភូមិភាគខេត្ត​ និងតាមខ្នងផ្ទះនៅទូទាំងខេត្តកំពង់ចាម​ សរុបជាង ៧០០នាក់​។ បច្ចុប្បន្ន​ក្រុមជាងបានកំពុងសម្រុកកសាងជួសជុលកែលម្អបានសម្រេចប្រមាណជាង៨០%ហើយ​។ ដោយឡែកបន្ទប់ដែលត្រៀមដាក់អ្នកជម្ងឺកូវីដ-១៩​ មានចំនួន៧០បន្ទប់​ អាចផ្ទុកជាង២០០នាក់​ សម្រុកជួសជុលកែលម្អឱ្យរួចរាល់ក្នុងខែនេះ។

យោងអនុវត្តតាមអនុសាសន៍ដ៏ខ្ពង់ខ្ពស់​របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា​ អាជ្ញាធរ​ខេត្តកំពង់ចាមបាន​កែលម្អ សណ្ឋាគារ​មេគង្គទៅជាមន្ទីរពេទ្យ​ សម្រា​ប់ព្យាបាលអ្នកជម្ងឺកូវីដ-១៩​ ក្រោយពីបានរកឃើញអ្នកជំងឺកូវីដ-១៩ ជាបន្តបន្ទាប់​ ស្របពេលព្រឹត្តិការណ៍ ២០កុម្ភៈ​មិនទាន់រលត់ទៅវិញផងនោះ។

ជាមួយគ្នានោះដែរ​ រដ្ឋបាលខេត្តសូមអំពាវនាវប្រជាពលរដ្ឋ​ បង្កើនការប្រុងប្រយ័ត្ន និងគោរពតាមអនុសាសន៍ដ៏ខ្ពង់ខ្ពស់​របស់សម្តេចតេជោ អនុវត្ត ៣ការពារ និង៣កុំ  ដើម្បីទប់ស្កាត់នូវការរីករាលដាលជម្ងឺកូវីដ-១៩ និងរួមគ្នាបញ្ចប់ព្រឹត្តិការណ៍ សហគមន៍ ២០កុម្ភៈ នៅកម្ពុជា៕​

 អត្ថបទ​ និង​ រូបភាព៖​ ហុង​ ម៉េងហៀ​