ជាព្រះរាជតំណាងព្រះមហាក្សត្រ សម្ដេច ហ៊ុន សែន ទទួលបដិសណ្ឋារកិច្ចមេដឹកនាំកំពូលវៀតណាម ក្នុងដំណើរទស្សនកិច្ចផ្លូវរដ្ឋនៅកម្ពុជា

នៅព្រឹកថ្ងៃទី៦ ខែកុម្ភៈ ឆ្នាំ២០២៦ សម្ដេចតេជោ ហ៊ុន សែន ប្រធានព្រឹទ្ធសភា និងជាប្រមុខរដ្ឋស្ដីទី បានអញ្ជើញជាព្រះរាជតំណាងព្រះករុណាព្រះមហាក្សត្រនៃកម្ពុជា ទទួលបដិសណ្ឋារកិច្ចចំពោះដំណើរទស្សនកិច្ចផ្លូវរដ្ឋរបស់លោក តូ ឡឹម អគ្គលេខាធិការបក្សកុម្មុយនីស្តវៀតណាម ជាមួយនឹងជំនួបសាវនាការ នៅព្រះបរមរាជវាំង។

ដំណើរទស្សនកិច្ចផ្លូវរដ្ឋរបស់លោក តូ ឡឹម គឺធ្វើឡើងតបតាមការអញ្ជើញរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ដើម្បីពង្រឹងពង្រីកនូវចំណងមិត្តភាពរវាងកម្ពុជា និងវៀតណាម ដែលជាអ្នកជិតខាងល្អ។ តាមកម្មវិធីគ្រោងទុក លោក តូ ឡឹម ត្រូវមានជំនួបសវនការជាមួយព្រះករុណាព្រះមហាក្សត្រនៃកម្ពុជា នៅព្រះបរមរាជវាំង។ ក៏ប៉ុន្តែដោយព្រះករុណា ទ្រង់ប្រឈួន ពុំអាចបំពេញព្រះរាជកិច្ចបាន ក៏ប្រគល់ភារកិច្ចជូនសម្តេចតេជោ ហ៊ុន សែន ក្នុងនាមជាប្រមុខរដ្ឋស្តីទីកម្ពុជា ឱ្យទទួលស្វាគមន៍លោក តូ ឡឹម ជំនួស នៅឯព្រះបរមរាជវាំង។ នេះបើតាមការបញ្ជាក់របស់ក្រសួងព្រះបរមរាជវាំង នៅព្រឹកថ្ងៃសុក្រនេះ។

គួរឱ្យដឹងថា ក្នុងឱកាសបំពេញទស្សនកិច្ចផ្លូវរដ្ឋនេះ លោក តូ ឡឹម បានអញ្ជើញដាក់កម្រងផ្កាគោរពវិញ្ញាណក្ខន្ធនៅ​វិមាន​ឯក​រាជ្យ នៅមណ្ឌលព្រះបរមរូបព្រះបាទសម្តេចព្រះ នរោត្តម សីហនុ «ព្រះបរមរតនកោដ្ឋ» អតីតព្រះមហាក្សត្រនៃកម្ពុជា និងមណ្ឌបមិត្ត​ភាព​កម្ពុជា-វៀតណាម។

ក្រៅពីកម្មវិធីការងារក្នុងដំណើរទស្សនកិច្ចផ្លូវរដ្ឋហើយនោះ លោកអគ្គលេខាធិការបក្សកុម្មុយនីស្តវៀតណាមក៏មានកម្មវិធីក្នុងក្របខ័ណ្ឌបក្សនយោបាយផងដែរ ដោយលោក តូ ឡឹម មានជំនួបទ្វេភាគីជាមួយសម្តេចតេជោ ហ៊ុន សែន ក្នុងឋានៈជាប្រធានគណបក្សប្រជាជនកម្ពុជា និងមានកិច្ចប្រជុំត្រីភាគី​រវាងសម្តេចតេជោ ហ៊ុន សែន និងលោក ថងលូន ស៊ីសូលីត អគ្គលេខាធិការបក្សប្រជាជនបដិវត្តន៍ឡាវ។

បន្ថែមពីនេះ តាមកម្មវិធីគ្រោងទុក លោក តូ ឡឹម ក៏នឹងអញ្ជើញជាគណៈ​អធិប​តីជាមួយសម្ដេចតេជោ ​ក្នុង​ពិធីបញ្ចុះបឋមសិលាសាងសង់អគាសិក្សានៅសាលារៀនមួយកន្លែង ក្នុងខណ្ឌដង្កោ ដែលជាជំនួយរបស់ប្រទេសវៀតណាមផងដែរ។

ដំណើរទស្សនកិច្ចផ្លូវរដ្ឋរបស់អគ្គលេខាធិការ តូ ឡឹម ត្រូវបានក្រសួងការបរទេស​កម្ពុជា ចាត់ទុកជាការពង្រឹងថែមទៀតនូវទំនាក់ទំនងដ៏កក់ក្តៅរវាងកម្ពុជា-វៀតណាម និងឆ្លុះបញ្ចាំងអំពីការប្តេជ្ញារួមក្នុងការពង្រឹង និងធ្វើឱ្យកាន់តែស៊ីជម្រៅបន្ថែមទៀតនូវ​កិច្ចសហប្រតិបត្តិការ ដែលផ្ដល់ផលប្រយោជន៍ទៅវិញទៅមក ស្របតាមស្មារតី «ភាពជា​អ្នក​ជិតខាងល្អមិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាព​យូរ​អង្វែង» នៃប្រទេសទាំងពីរ៕