ព័ត៌មានជាតិ

ទឹកស្ទឹងសង្កែ រីងដល់បាត ឡើងស្លែកាន់តែខ្លាំង គ្មានលំហូរ

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

រយៈពេលប្រមាណកន្លះខែកន្លងទៅនេះ គេសង្កេតឃើញថា ទឹកស្ទឹងសង្កែ មានសភាពរីងហួតដល់បាតស្ទឹង ហើយទឹកកាន់តែហោច លំហូរទឹកនឹង ស្លែក៏កើនឡើង តម្រូវឲ្យការទាញយកទឹកឆៅទៅផលិតទឹកស្អាតព្យាយាមខ្លាំងឡើង ដោយសារកម្ពស់ទឹកស្ថិតនៅទាបបាតស្ទឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញករណីទឹកស្ទឹងឡើងស្លែស្ថិតនៅបាតស្ទឹងនេះ លោក ខៃ សុដា ប្រធានមន្ទីរធនធានទឹក និងឧតុនិយមខេត្តបាត់ដំបង បានបញ្ជាក់ថា ថ្វីត្បិតតែពេលនេះគឺជារដូវប្រាំងក៏ដោយ ក៏ទឹកស្ទឹងមិនអាចរីងហួតដល់បាតស្ទឹងដែរ។ ទឹកនៅប៉ែកខាងលើ នៃទំនប់ស្ទាក់ទឹកកង្ហត និងទំនប់ពហុបំណងសេកសក នៅតែមានទឹកបរិបូណ៌ មិនមានកង្វះខាតទឹកឡើយ។

លោកប្រធានមន្ទីរ បានបន្ថែមថា បញ្ហាដែលគេសង្កេតឃើញទឹកស្ទឹងសង្កែមានការរីងហួតដល់បាតស្ទឹង ដោយសារមានសំណូមពរពីលោកអភិបាលខេត្ត ស្នើមន្ទីរជំនាញទម្លាក់ទ្វារទឹក ដើម្បីឲ្យនីវ៉ូទឹកស្ថិតនៅទាបបាតស្ទឹង ងាយស្រួលក្រុមការងារធ្វើការជួសជុលឆ្នេរស្ទឹង ហើយកន្លែងខ្លះមានការបាក់ស្រុតនៅម្ដុំវិមានឯករាជ្យ កណ្ដាលក្រុងបាត់ដំបង។

លោក ខៃ សុដា សង្កត់ធ្ងន់ថា បើទោះបីជាទឹកស្ទឹងគ្មានលំហូរ ពោរពេញដោយស្លែក៏ដោយ ក៏ទឹកមិនទាន់ក្លាយទៅជាប្រើការលែងកើតដោយសារជាតិពុលនោះឡើយ។ ក្នុងនោះ ទោះបីទឹកមានកម្រិតទាបពិតមែន ប៉ុន្តែស្ថានីយទាញយកទឹកឆៅទៅផលិតទឹកស្អាត អាចទាញយកឡើងទៅបាន ហើយអាចផលិតតាមស្តង់ដារ នៃកម្រិតទឹកស្អាតបាន នេះបើតាមការសិក្សារបស់លោក។

កាលពីព្រឹកថ្ងៃទី ១៩ ខែកុម្ភៈ ឆ្នាំ ២០២៦ នេះដែរ កម្ពុជាថ្មី មិនអាចទាក់ទងទៅលោក អ៊ុត ក្លឹង ប្រធានអង្គភាពរដ្ឋាករទឹកបាត់ដំបង បានទេ ជុំវិញការផលិតទឹកស្អាត ខណៈផ្ទៃទឹកស្ទឹងសង្កែបច្ចុប្បន្នពោរពេញដោយស្លែនោះ ៕

អត្ថបទ ៖ សោ និយមរ័ត្ន