ព័ត៌មានជាតិ

ស្ថានីយប្រេងឥន្ធនៈ ៨៩កន្លែងក្នុងខេត្តតាកែវ បានផ្អាកដំណើរការដោយសារខ្វះការផ្គត់ផ្គង់ពីក្រុមហ៊ុន

បានផុស

២ ខែ មុន

នៅ

ថ្ងៃពុធ ១១ មីនា ២០២៦

ដោយ

ស្ថានីយប្រេងឥន្ធនៈចំនួន៨៩កន្លែង ក្នុងចំណោមស្ថានីយចំនួន ៤០០កន្លែង នៅក្នុងខេត្តតាកែវ ត្រូវបានផ្អាកដំណើរការជាបណ្ដោះអាសន្នដោយសារក្រុមហ៊ុនប្រេងសាំងបានផ្អាកផ្គត់ផ្គង់។ នេះបើយោងតាមការបញ្ជាក់ពីលោក សាយ សុខហេង អនុប្រធានមន្ទីររ៉ែ និងថាមពលខេត្តតាកែវ បានឱ្យដឹងនៅព្រឹកថ្ងៃ ទី១០ ខែមីនា ឆ្នាំ២០២៦នេះ។

លោកអនុប្រធានមន្ទីរបញ្ជាក់ថា នៅទូទាំងខេត្តតាកែវ មានស្ថានីយប្រេងសាំងដែលមានអាជ្ញាបណ្ណស្របច្បាប់សរុបចំនួន ៤០០ស្ថានីយ តែបានផ្អាកដំណើរការចំនួន ៨៩ស្ថានីយ នៅតាមបណ្ដាស្រុក ក្រុង ដោយសារខាងក្រុមហ៊ុនផ្អាកការផ្គត់ផ្គង់ជាបណ្តោះអាសន្ន។

លោកបានបន្ថែមថា នៅតាមស្ថានីយស្តង់ដារកាលបីថ្ងៃទី១០ ខែមីនា សាំងធម្មតាមានតម្លៃ ៤,៤០០ រៀល ក្នុងមួយលីត្រ និងម៉ាស៊ូតតម្លៃ ៥,១៥០ រៀលក្នុងមួយលីត្រ ដែលតម្លៃនេះតាមការកំណត់ប្រកាសរបស់ក្រសួងពាណិជ្ជកម្ម។

គិតត្រឹមព្រឹកថ្ងៃទី១១ ខែមីនា ឆ្នាំ២០២៦នេះ តម្លៃប្រេងឥន្ធនៈក្នុងស្រុកបានបន្តហក់ឡើងខ្ពស់ ក្នុងនោះតម្លៃលក់រាយសាំងធម្មតា ៥២០០ រៀល ក្នុងមួយលីត្រ កើនឡើង ៨០០រៀល ប្រៀបធៀបនឹង ៣ថ្ងៃមុន (៨-១០ ខែមីនា) ដែលលក់ក្នុងតម្លៃ ៤៤០០រៀល ក្នុងមួយលីត្រ។ ចំណែកឯតម្លៃប្រេងម៉ាស៊ូតបានកើនឡើង ៩០០រៀល ដោយត្រូវលក់រាយក្នុងតម្លៃ ៦០៥០រៀល ក្នុងមួយលីត្រ។ តម្លៃខាងលើនឹងអនុវត្តចាប់ពីថ្ងៃទី១១ ដល់ថ្ងៃទី១៣ ខែមីនា ឆ្នាំ២០២៦។

ក្រសួងពាណិជ្ជកម្មកម្ពុជា បានបន្តណែនាំឱ្យស្ថានីយ និងដេប៉ូចែកចាយប្រេងឥន្ធនៈនៅតាមបណ្ដារាជធានី-ខេត្ត ត្រូវលក់ប្រេងទៅតាមតម្លៃដែលបានដាក់បង្ហាញជាសាធារណៈ ដើម្បីធានានូវតម្លាភាព៕

អត្ថបទ៖ វីរៈ