អាជ្ញាធរសង្កាត់ក្បាលកោះសម្រេចផ្អាកបណ្ដោះអាសន្នផ្សារចំនួន៤ រយៈ១៤ថ្ងៃ

ភ្នំពេញ៖ អាជ្ញាធរសង្កាត់ក្បាលកោះ ខណ្ឌច្បារអំពៅបានសម្រេចផ្អាកបណ្ដោះអាសន្នផ្សារចំនួន៤រយៈពេល១៤ថ្ងៃដើម្បីទប់ស្កាត់ការឆ្លងរាលដាលជំងឺកូវីដ-១៩។

យោងតាមសេចក្តីជួនដំណឹងចំនួន៤ដាច់ដោយឡែកពីគ្នាចុះថ្ងៃទី២៥ ខែមេសានេះរបស់រដ្ឋបាលសង្កាត់ក្បាលកោះបានឱ្យដឹងថា ផ្សារចំនួន៤ដែលផ្អាកដំណើរការនោះរួមមាន ទី១ផ្សារវត្តមុនី ស្ថិតនៅក្នុងភូមិយកបាត្រ សង្កាត់ក្បាលកោះ ទី២ ផ្សារគល់ស្ពាន ស្ថិតនៅក្នុងភូមិព្រែកធំ១ សង្កាត់ក្បាលកោះ ទី៣ ផ្សារដើមដូង ស្ថិតនៅក្នុងភូមិជ្រោយអំពិល១ សង្កាត់ក្បាលកោះ និងទី៤ ផ្សារមជ្ឈឹមវ័ន្ត ស្ថិតនៅក្នុងភូមិជ្រោយអំពិល១ សង្កាត់ក្បាលកោះ។

រដ្ឋបាលសង្កាត់បានបន្តថា ការផ្អាកផ្សារទាំងបួនខាងលើនេះដោយសារតែក្នុងរយៈពេលប៉ុន្មានថ្ងៃចុងក្រោយនេះអាជីវករ និងប្រជាពលរដ្ឋបានឆ្លងជំងឺកូវីដ-១៩​ ក្នុងព្រឹត្តិការណ៍សហគមន៍២០កុម្ភៈ យ៉ាងរហ័សគួរឱ្យព្រួយបារម្ភដែលចាំបាច់ត្រូវមានវិធានការដើម្បីទប់ស្កាត់ជាបន្ទាន់។

រដ្ឋបាលសង្កាត់បានបន្ថែមថា ចំពោះមុខរដ្ឋបាលសង្កាត់ក្បាលកោះបានសម្រេចផ្អាកផ្សារទាំង៤ខាងលើរយៈពេល១៤ថ្ងៃ ដោយចាប់ពីម៉ោងសូន្យថ្ងៃទី២៥ ខែមេសា ឆ្នាំ២០២១ រហូតដល់ថ្ងៃទី០៨ ខែឧសភា ឆ្នាំ២០២១ ដើម្បីបង្ការ និងទប់ស្កាត់ការឆ្លងរាលដាលវីរុសកូវីដ-១៩ទៅដល់អាជីវករ​ ក៏ដូចជាប្រជាពលរដ្ឋដែលបានចេញចូលក្នុងផ្សារទាំង៤ខាងលើ។

ជាមួយគ្នានេះដែរ រដ្ឋបាលសង្កាត់ក្បាលកោះ សូមអំពាវនាវដល់អាជីវករ សន្តិសុខ បុគ្គលិក កម្មករបម្រើការងារក្នុងផ្សារ និងក្រុមគ្រួសារពាក់ព័ន្ធព្រមទាំងប្រជាពលរដ្ឋ បើមានអាការៈក្តៅខ្លួន ក្អកពិបាកដកដង្ហើម ហើយសង្ស័យថាឆ្លងមេរោគកូវីដ-១៩ សូមអញ្ជើញមកយកសំណាករកជំងឺកូវីដ-១៩ ជាបន្ទាន់នៅទីតាំងទល់មុខការដ្ឋានសាងសង់ផ្សារក្រុមហ៊ុន ប៉េង ហួត ស្ថិតនៅខាងជើងផ្លូវជាតិលេខ១ ក្នុងភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ព្រមទាំងអនុវត្តវិធានការចត្តាឡីស័កស្របតាមការណែនាំរបស់ក្រសួងសុខាភិបាល៕

អត្ថបទ៖ សំអឿន