ក្រុមយុវជន ត្រៀមខ្លួនរួចរាល់ចូលរួមបំពេញកាតព្វកិច្ចយោធា ដើម្បីរួមចំណែកដល់វិស័យការពារជាតិឲ្យរឹងមាំ

ក្រុមយុវជន នៃសាកលវិទ្យាល័យជាតិគ្រប់គ្រង បានបង្ហាញគោលជំហរមុតមាំក្នុងការចូលរួមខ្ពស់ជាមួយការបំពេញកាតព្វកិច្ចយោធា និង ប្តេជ្ញាមិនគេចវេសដាច់ខាត បើជាតិមានតម្រូវការ ហើយពួកគាត់ពេញលក្ខណៈគ្រប់គ្រាន់ក្នុងការជ្រើសរើសនោះ។

ក្រុមយុវជន បានបញ្ជាក់ថា ប្រទេសកម្ពុជា ត្រូវការក្រុមយុវជនបន្តវេន ជាអ្នកការពារប្រទេសជាតិរបស់ខ្លួន មិនមានបរទេសណាមកការពារជំនួសឡើយ ។ យើងខ្លាំង ទើបគេខ្លាច ហើយប្រទេសកម្ពុជា ក៏គ្មានប្រវត្តិទៅឈ្លានពានប្រទេសជិតខាងឡើយ មានតែប្រទេសជិតខាងទេ ដែលតែងតែឈ្លានពានកម្ពុជា។

ក្នុងនោះដែរ អាណាព្យាបាលរបស់យុវជនដែលគ្រប់អាយុក្នុងការបំពេញកាតព្វកិច្ចយោធា បានសម្តែងការពេញចិត្តនឹងច្បាប់នេះ ដែលបានផ្តល់ឱកាសដល់កូនៗ របស់ពួកគាត់ ចូលរួមជាមួយរាជរដ្ឋាភិបាល ចូលរួមក្នុងបុព្វហេតុជាតិ ដើម្បីការពារជាតិពីការប៉ងឈ្លានពានពីសំណាក់រដ្ឋបរទេសណាមួយមកលើដែនអធិបតេយ្យភាពរបស់កម្ពុជា។

គួរជម្រាបថា ច្បាប់កាតព្វកិច្ចយោធា គឺកំហិតសម្រាប់យុវជនដែលមានអាយុចាប់ពី ១៨ ដល់ ២៥ ឆ្នាំ និង ផ្តល់គោលការណ៍ស្ម័គ្រចិត្តសម្រាប់នារី។ ច្បាប់ថ្មី ស្តីពី«កាតព្វកិច្ចយោធា» បានតម្រូវឲ្យយុវជនត្រូវបំពេញកាតព្វកិច្ចយោធារយៈពេល ២ ឆ្នាំ(២៤ ខែ) ជាកំហិត ហើយអាចបន្ត ៦ ខែ បន្ថែមទៀត ក្នុងករណីចាំបាច់បំផុត។ ប៉ុន្តែចំពោះជនណាដែលមានបំណងគេចវេសពីការបំពេញកាតព្វកិច្ច អាចប្រឈមទោសដាក់ពន្ធនាគារចាប់ពី ៦ ខែ រហូតដល់ ៥ ឆ្នាំ អាស្រ័យលើទម្ងន់ទោស និង កាលៈទេសៈជាក់ស្តែង លើកលែងតែ ចំពោះភិក្ខុសង្ឃ បព្វជិតសាសនា អ្នកមានពិការភាព និង អ្នកជំនាញជាន់ខ្ពស់ដែលកំពុងបំពេញបេសកកម្មសំខាន់ៗ ជូនជាតិប៉ុណ្ណោះ ដែលត្រូវបានលើកលែងសម្រាប់ការបំពេញកាតព្វកិច្ចយោធា៕
អត្ថបទ ៖ សុភា