ព័ត៌មានជាតិ

ក្រៅពីទស្សនាប្រាសាទបុរាណ តើទេសចរអាចកម្សាន្តអ្វីខ្លះថែមទៀត នៅក្នុងបរិវេណតំបន់អង្គរ?

បានផុស

១ ខែ មុន

នៅ

ថ្ងៃពុធ ២៧ ឧសភា ២០២៦

ដោយ

នៅក្នុងតំបន់រមណីយដ្ឋានអង្គរ ក្រៅពីប្រាសាទអាយុរាប់ពាន់ឆ្នាំជាគោលដៅដែលទេសចរចង់មកទស្សនា អាជ្ញាធរក៏បានរៀបចំសេវាកម្មមួយចំនួនទៀតដើម្បីបង្កើតឲ្យមានផលិតផលកាន់តែសំបូរបែបផ្តល់ជម្រើសសម្រាប់ភ្ញៀវមកកម្សាន្ត។

លោក ទេស សុធី អនុប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌នៃអាជ្ញាធរជាតិអប្សរាបានគូសបញ្ជាក់ថា នៅតំបន់រមណីយដ្ឋានអង្គរ ក្រៅពីប្រាសាទជាគោលដៅទេសចរណ៍ដ៏ទាក់ទាញសំខាន់ នៅមានផលិតផលទេសចរណ៍ជាច្រើនទៀត ដែលភ្ញៀវទេសចរអាចជ្រើសរើសបង្កើនការកម្សាន្តបន្ថែម។

លោកបានលើកឡើងផលិតផលទេសចរណ៍ទាំងនោះមានដូចជា ការជិះកង់ ជិះទូក ជិះទោង និងជិះខ្សែរ៉ត (Zipline) មើលព្រៃព្រឹក្សា ដើម្បីទទួលបានបទពិសោធន៍ហោះហើរឆ្លងកាត់ព្រៃធម្មជាតិ និងដើមឈើធំៗនៅក្នុងតំបន់ឧទ្យានអង្គរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្លោងទ្វារទន្លេអ៊ុំភ្ញៀវទេសចរក៏អាចជួលសេវាកម្មជិះទូកកម្សាន្ត ហើយអាចទទួលទានអាហារប៊ូហ្វេនៅលើទូកនោះបានផងដែរ។

នៅពេលរាត្រី ភ្ញៀវទេសចរអាចរៀបចំកម្មវិធីអាហារពេលល្ងាច អមដោយការទស្សនារបាំផ្សេងៗនៅទីតាំងប្រាសាទធម្មនន្ទ និងប្រាសាទក្រវ៉ាន់ ហើយក៏អាចរៀបចំនៅប្រាសាទអង្គរវត្ត ឬប្រាសាទបាយ័នសម្រាប់កម្មវិធីខ្នាតធំ ឬកម្រិតជាតិ។

ពាក់ព័ន្ធកិច្ចការអភិវឌ្ឍនៅតំបន់រមណីយដ្ឋានអង្គរ ដែលត្រូវបានចុះបញ្ជីជាសម្បត្តិបេតិកភណ្ឌពិភពលោករបស់អង្គការយូណេស្កូ លោក ទេស សុធី បានគូសបញ្ជាក់ថា អាជ្ញាធរបានខិតខំកែលម្អតំបន់រមណីយដ្ឋានអង្គរទាំងផ្នែកបរិស្ថាន ការរៀបចំសណ្តាប់ធ្នាប់ និងបង្កើតផលិតផលទេសចរណ៍ថ្មីៗបន្ថែមទៀត ជាផ្នែកមួយក្នុងការទាក់ទាញភ្ញៀវទេសចរអន្តរជាតិ ឱ្យមកទស្សនាកើនឡើង។

អាជ្ញាធរបានរៀបចំការិយាល័យបាត់បង់និងរកឃើញ (Lost and Found) នៅខាងមុខប្រាសាទអង្គរវត្ត និងខាងលិចប្រាសាទបាយ័ន សម្រាប់រក្សាទុកឬស្វែងរករបស់របរដែលបាត់បង់។ ការិយាល័យនេះមានការសហការយ៉ាងជិតស្និទ្ធជាមួយប៉ូលិសទេសចរណ៍ ដើម្បីជួយដោះស្រាយបញ្ហាជូនភ្ញៀវទេសចរ។

នៅតាមប្រាសាទមួយចំនួនដូចជាប្រាសាទអង្គរវត្ត អាជ្ញាធរបានរៀបចំកៅអីឈើនៅក្រោមដើមឈើ ដើម្បីផ្តល់ភាពងាយស្រួលដល់ភ្ញៀវទេសចរក្នុងការអង្គុយសម្រាក បន្ទាប់ពីការដើរទស្សនាហត់នឿយ។

បន្ថែមពីនេះ ក្រុមការងារក៏បានខិតខំបង្កើតនូវផលិតផលថ្មីៗបន្ថែមទៀត ដូចជារៀបចំផ្លូវជិះកង់នៅជុំវិញប្រាសាទ និងផ្លូវកាត់ក្នុងព្រៃដែលមានប្រវែងជាង ៣ គីឡូម៉ែត្រ ពីប្រាសាទតានៃឆ្ពោះទៅកាន់ប្រាសាទព្រះខ័ន សម្រាប់ភ្ញៀវទេសចរដែលចូលចិត្តការផ្សងព្រេង។

នៅបារាយណ៍ប្រាសាទនាគព័ន្ធ មានបង្កើតសេវាកម្មជិះទូកកម្សាន្តពីសហគមន៍ ដើម្បីឱ្យអ្នកភូមិអាចទទួលបានប្រាក់ចំណូលពីវិស័យទេសចរណ៍ដោយផ្ទាល់ ដែលនេះជាការរួមចំណែកដ៏សំខាន់ក្នុងការលើកស្ទួយជីវភាព និងសេដ្ឋកិច្ចរបស់សហគមន៍ក្នុងស្រុក។

លោក ទេស សុធី បញ្ជាក់ថា រាល់ការរៀបចំសេវាកម្មទេសចរណ៍បន្ថែមនៅក្នុងបរិវេណរមណីយដ្ឋានអង្គរ មានការសិក្សាយ៉ាងច្បាស់លាស់ទៅលើទីតាំងនីមួយៗ ដើម្បីវាយតម្លៃពីផលប៉ះពាល់ទៅលើប្រាសាទ និងកំណត់ចំនួនភ្ញៀវទេសចរឲ្យបានត្រឹមត្រូវ ខណៈដំណើរការរៀបចំទៀតសោត ក៏ត្រូវឆ្លងកាត់ការពិគ្រោះយោបល់ជាមួយអ្នកជំនាញបរទេស ដើម្បីស្នើសុំមតិយោបល់និងធានាថាការរៀបចំសកម្មភាពទេសចរណ៍ទាំងនេះ អាចជួយកាត់បន្ថយផលប៉ះពាល់ដល់ប្រាសាទឲ្យនៅកម្រិតទាបបំផុត៕