កម្ពុជាលើកឡើងពីយុទ្ធសាស្ត្រ៥ចំណុចក្នុងការគ្រប់គ្រងរ៉ែឱ្យទៅជាតម្លៃសេដ្ឋកិច្ចជាតិ

មន្ត្រីការទូតកម្ពុជាបានគូសបញ្ជាក់ពីអាទិភាពយុទ្ធសាស្ត្រចំនួន៥ចំណុចសម្រាប់តម្លៃសេដ្ឋកិច្ចជាតិប្រកបដោយចីរភាព និងអន្តរកាលថាមពលប្រកបដោយតុល្យភាព។

ថ្លែងក្នុងកិច្ចប្រជុំកម្រិតខ្ពស់ស្តីពីធនធានរ៉ែសំខាន់សម្រាប់អន្តរកាលឆ្ពោះទៅថាមពលស្អាត នៅឯទីស្នាក់ការកណ្តាលអង្គការសហប្រជាជាតិ ក្នុងទីក្រុងញូវយ៉ក កាលពីថ្ងៃទី១៤ ខែកក្កដា ឆ្នាំ២០២៦ លោក យោង ចាន់សុភារ តំណាងអចិន្ត្រៃយ៍រងកម្ពុជាប្រចាំនៅទីនោះ បានលើកឡើងពីកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការរៀបចំមូលដ្ឋានគ្រឹះបច្ចេកទេស និងគោលនយោបាយដែលចាំបាច់ដើម្បីគ្រប់គ្រងធនធានរ៉ែសំខាន់ឱ្យស្របទៅតាមបរិបទអភិវឌ្ឍន៍។

តំណាងអចិន្ត្រៃយ៍រង ​បានលើកឡើងនូវអាទិភាពយុទ្ធសាស្ត្រចំនួន៥របស់កម្ពុជា សម្រាប់ការប្រែក្លាយសក្តានុពលនៃធនធានរ៉ែសំខាន់ឱ្យក្លាយជាតម្លៃសេដ្ឋកិច្ចជាតិប្រកបដោយចីរភាព។ យុទ្ធសាស្ត្រទី១ គឺ ការពង្រឹងទិន្នន័យ និងចំណេះដឹងផ្នែកភូមិសាស្ត្រ ឯយុទ្ធសាស្រ្តទី២ គឺការអភិវឌ្ឍក្របខណ្ឌជាតិស្តីពីរ៉ែសំខាន់។

យុទ្ធសាស្ត្រទី៣ លោក បញ្ជាក់ឱ្យដឹងថា គឺការលើកកម្ពស់ការធ្វើអាជីវកម្មរ៉ែប្រកបដោយការទទួលខុសត្រូវ និងការគាំពារបរិស្ថាន និងយុទ្ធសាស្ត្រទី៤ គឺការជំរុញការបង្កើតតម្លៃបន្ថែមឱ្យកាន់តែខ្ពស់ ហើយយុទ្ធសាស្ត្រទី៥នោះ គឺការពង្រឹងកិច្ចសហប្រតិបត្តិការតំបន់ និងពហុភាគី។

តំណាងអចិន្ត្រៃយ៍រង សង្កត់ធ្ងន់ថា អន្តរកាលថាមពលសកលត្រូវតែប្រព្រឹត្តទៅឱ្យបានលឿនរហ័ស តែត្រូវយុត្តិធម៌ ហើយក៏បានអំពាវនាវដល់សហគមន៍អន្តរជាតិឱ្យផ្តល់ការគាំទ្រលើការកសាងសមត្ថភាព ផ្ទេរបច្ចេកវិទ្យា និងជំនួយបច្ចេកទេស ដើម្បីជួយឱ្យបណ្តាប្រទេសសេដ្ឋកិច្ចដែលកំពុងលូតលាស់ អាចសម្រេចបាន​លើសពីការទាញយកធនធានរ៉ែជាវត្ថុធាតុដើម ហើយចូលរួមចំណែកក្នុងអន្តរកាលថាមពលប្រកបដោយតុល្យភាព៕