អគ្គិភ័យឆាបឆេះផ្សារត្រាំកក់ ខេត្តតាកែវ បណ្តាលឲ្យខូច​ខាតតូបនិងសម្ភារៈយ៉ាងច្រើន

មានអគ្គិភ័យមួយបានកើតឡើងនៅវេលាម៉ោង១៨និង៤៥នាទី ល្ងាចថ្ងៃទី០៥ ខែឧសភា ឆ្នាំ២០២១ នៅក្នុងផ្សារត្រាំកក់ ស្ថិតនៅបណ្ដោយផ្លូវជាតិលេខ៣ ក្នុងឃុំត្រាំកក់ ស្រុកត្រាំកក់ ខេត្តតាកែវ ។

តាមប្រភពពីប្រជាពរដ្ឋនៅកន្លែងកើតហេតុបានឲ្យដឹងថា អគ្គិភ័យដែលកើតឡើងនេះ គឺដំបូងឡើយចេញពីចំណុចតូបលក់ស្បែកជើង និងសម្លៀកបំពាក់២ជួរក្បែរផ្លូវខាងលិច ហើយក៏ឆេះបន្តរាលដាលខ្លាំងឡើងៗ ទៅតូបផ្សេងៗទៀត ហើយតូបខ្លះពួកគាត់ក៏បានយកអីវ៉ាន់ចេញបានខ្លះ ឯតូបខ្លះទៀតក៏ត្រូវភ្លើងឆេះអស់គ្មានសល់នោះឡើយ ។

ក្រុមអាជីវករបន្តថា ការឆេះនេះអស់តូបប្រហែលជិត៣០តូប តែចំពោះការខូចខាតទ្រព្យសម្បត្តិពួកគាត់ក៏ពុំទាន់អាចបញ្ជាក់បានថា អស់ប៉ុន្មាននៅឡើយដែរ ហើយក៏មិនប្រាកដថា ផ្ទុស្សេខ្សែភ្លើង ឬយ៉ាងឲ្យប្រាកដនោះដែរ ។

ក្នុងហេតុការណ៍នេះដែរ មានកម្លាំងសមត្ថកិច្ចដែលដឹកនាំផ្ទាល់ដោយ លោកឧត្តមសេនីយ៍ទោ សុខ សំណាង ស្នងការនគរបាលខេត្ត លោក ខាន់ សុខា អភិបាលរងខេត្ត រួមនឹងគណៈបញ្ជាការឯកភាពស្រុក ដឹកនាំដោយ លោក កៅ វគ្ក​សែល អភិបាលស្រុកលោក អភិបាលរងស្រុក និងអាជ្ញាធរពាក់ ព័ន្ធ បានចុះជួយធ្វើការអន្តរាគមន៍ភ្លាមៗ ផងដែរ ។

ក្នុងនោះតាមការឲ្យដឹងពីកងអន្តរាគមន៍ពន្លត់អគ្គិភ័យនៃស្នងការដ្ឋាននគរបាលខេត្ត បានឲ្យដឹងថា ចំពោះការប្រើប្រាស់រយន្តដឹកទឹកពន្លត់អគ្គីភ័យឆេះផ្សារត្រាំកក់នេះដែរ គឺអស់ចំនួន១៨ ឡាន និងប្រើរយៈពេលជិត៣ម៉ោង ទើបគ្រប់ គ្រងស្ថានការអគ្គីភ័យឆាបឆេះ នេះ បានរលត់ទៅវិញទាំងស្រុងផងដែរ៕

អត្ថបទ ៖ វីរៈ