អណ្តូងទឹកដើរដោយប្រព័ន្ធស្វ័យប្រវត្តិសូឡា របស់គម្រោងរេដបូកសំកុស កំពុងជួយប្រជាសហគមន៍មានទឹកស្អាតប្រើដោយមិនបាច់ចំណាយថវិកា

អណ្តូងទឹកធំចំនួន២ ស្ថិតនៅភូមិតាដេស ឃុំសំរោង ស្រុក ភ្នំក្រវាញខេត្តពោធិ៍សាត់ ដែលផ្តល់ទឹកចំណុះ១ម៉ឺនលីត្រ របស់ អង្គការសម្ព័ន្ធមិត្តសត្វព្រៃ (Wildlife Alliance) ក្រសួងបរិស្ថាន ក្រោមក្របខណ្ឌគម្រោងរេដបូកភ្នំសំកុស កំពុងបានផ្តល់ភាពងាយស្រួលដល់ប្រជាសហគមន៍ប្រើប្រាស់ដោយមិនត្រូវចំណាយថវិកាហើយ និងពិសេសជាទឹកស្អាតសម្រាប់ប្រើប្រាស់ថែមទៀត។

គម្រោងរេដបូក (REDD+) បានសាងសង់អណ្តូងទឹកស្អាតដើរដោយប្រព័ន្ធស្វាយប្រវត្តិសូឡា ដើម្បីជួយលើកកម្ពស់ជីវភាពសហគមន៍តំបន់ការពារធនធានធម្មជាតិ។អណ្តូងទឹកស្អាតចំនួន២កន្លែងនៅភូមិ តាដេសដោយក្នុងនេះមួយបានកសាងឡើងក្នុងឆ្នាំ ២០២៣ និងមួយទៀតកសាងឡើងក្នុងឆ្នាំ ២០២៥។តាមរយៈគម្រោងរេដបូក ដែលកំពុងអនុវត្តដោយអង្គការសម្ព័ន្ធមិត្តសត្វព្រៃ នៅក្នុងតំបន់ជួរភ្នំក្រវាញ អណ្តូងទឹកស្អាតដើរដោយថាមពលពន្លឺព្រះអាទិត្យចំនួន៩៤ អណ្តូង បានផ្តល់សហគមន៍ និងនៅក្នុងដែនជម្រកសត្វព្រៃភ្នំសំកុស មានចំនួន៦៨អណ្តូង។

លោក ហឿន សាម៉េត ប្រជាពលរដ្ឋ រស់នៅភូមិតាដេស ឃុំសំរោង ស្រុកភ្នំក្រវាញ ខេត្តពោធិ៍សាត់បានបញ្ជាក់ប្រាប់ថាអណ្តូងដែលបានតាមរយៈគម្រោងរេដបូកនេះកំពុងដើរតួនាទីយ៉ាងសំខាន់សម្រាប់ប្រើប្រាស់របស់ប្រជាសហគមន៍។វាបានជួយឱ្យមានទឹកស្អាតប្រើប្រាស់មិនជួបការលំបាកទៀតឡើយពិសេសមានទឹកស្អាតប្រើប្រាស់ក្នុងសហគមន៍។

លោកថាមានអណ្តូងទឹកនេះអាចជួយសម្រាលការលំបាកពិសេសនៅរដូវប្រាំងមិនចាំបាច់ត្រូវទិញទឹកប្រើប្រាស់ ឬដើររកទឹកដូចមុនទៀតឡើយគឺមានត្រឹមអណ្តូងទឹកមួយនេះអាចប្រើប្រាស់ច្រើនគ្រួសារ។

រីឯអ្នកស្រី ធួន ស្រីអូន បានបញ្ជាក់ប្រាប់ដែរថា ទឹកអណ្តូងនេះកំពុងបានជួយមិនត្រឹមតែប្រើប្រាស់ប្រចាំថ្ងៃទេ តែវាបានកំពុងជួយស្រោចដំណាំកសិកម្មខ្លះៗក្បែរផ្ទះ និងពិសេសការចិញ្ចឹមសត្វដោយមិនបាច់ចំណាយថវិការលើការប្រើប្រាស់ទឹកដូចមុនទៀត។

អ្នកស្រីថា  ក្រោយពេលមានការគាំទ្រសាងសង់អណ្តូងទឹកស្អាត នៅក្នុងមូលដ្ឋាន ប្រជាពលរដ្ឋមានប្រភពទឹកគ្រប់គ្រាន់ និងអនុញ្ញាតឱ្យសហគមន៍អាចពង្រីកការដាំដុះដំណាំ បង្កើនសកម្មភាពកសិកម្ម និងការចិញ្ចឹមសត្វ ដែលជួយបង្កើតប្រាក់ចំណូលបន្ថែមដល់គ្រួសារ។

លោក សារូ វុធ  ប្រធានសហគមន៍ដៃគូសំរោង បានបញ្ជាក់ថាអណ្តូងទឹកនៅសហគមន៍លោកបានជួយច្រើនទៅការប្រើប្រាស់ទឹក។វាកាត់បន្ថយច្រើនទាំងថវិការ និងក៏ដូចជាជួយលើកស្ទួយជីវភាពប្រជាសហគមន៍។

ដោយឡែក លោក ទូច សុផានី ប្រធានគម្រោងអភិវឌ្ឍន៍សហគមន៍នៃអង្គការសម្ព័ន្ធមិត្តសត្វព្រៃ (Wildlife Alliance)ឱ្យដឹងថាក្នុងគម្រោងរដ្ឋបូក សំកុស គឺបានកំពុងផ្តោតការយកចិត្តទុកដាក់ផ្តល់ផលប្រយោជន៍ ពីគម្រោងដល់ ២៧សហគមន៍ ដែលក្នុងនេះមានខេត្តពោធិ៍សាត់ និងខេត្តបាត់ដំបង។ដោយឡែកសម្រាប់ក្នុងភូមិតាដេសនេះគម្រោងរេដបូកសំកុសបានផ្តល់អណ្តូងទឹកស្អាតដើរដោយប្រពន្ធ័សូឡាស្វ័យប្រវត្តិចំនួន២ឈុត និងបានជួយសម្របសម្រួលកំណត់ពង្រាងទីតាំង ដីព្រៃអារក្ស និងដីកប់សព របស់សហគមន៍ជនជាតិដើមភាគតិចជង និងព័រ ក្នុងចូលរួមលើកកំពស់ សិទ្ធជនជាតិដើមភាគតិចសម្រាប់ការប្រើ់ប្រាស់ទីតាំងដីព្រៃអារក្ស និងដីកប់សពតាមបែបប្រពៃណីដែលមានការគោរពបូជាដែលជាជំនឿតាំងតែពីយូរមកហើយ។

លោកបានប្រាប់ថាបើតាមការកំណត់ពង្រាងទីតាំង ដីព្រៃអារក្ស និងដីកប់សព បានបង្ហាញថា៖ ទីតាំងដីព្រៃអារក្ស មានសរុបចំនួន ២៤ហិកតា និងព្រៃកប់សព មានចំនួន ៤ហិកតា ។ គម្រោងរេដបូកសំកុស នឹងបន្តជួយសម្របសម្រួលដាក់ជូនអាជ្ញាធរមូលដ្ឋាន ក្រសួងបរិស្ថានពិនិត្យនិងពិចារណា។

លោកថាប្រជាពលរដ្ឋរស់នៅក្នុងភូមិតាដេស បានលើកឡើងថា ប្រជាពលរដ្ឋលែងត្រូវចំណាយថវិកាទិញទឹក ឬចំណាយពេលដើររាប់គីឡូម៉ែត្រ ដើម្បីទៅដងទឹកពីអូរឆ្ងាយៗដូចមុន បន្ទាប់ពីមានអណ្តូងទឹកស្អាត ក្នុងភូមិ។ លើសពីនេះ ប្រជាពលរដ្ឋ មិនចំណាយលើប្រេងឥន្ធនៈ ឬអគ្គិសនីឡើយ នៅពេលអណ្តូទឹក ដើរដោយប្រព័ន្ធដើរដោយថាមពលព្រះអាទិត្យ។

លោក ខ្វៃ អាទិត្យា អនុរដ្ឋលេខាធិការក្រសួងបរិស្ថាន បានឱ្យដឹងថា អណ្តូងទាំងនេះជួយកាត់បន្ថយការចំណាយ របស់ប្រជាពលរដ្ឋ ដូចជាការចំណាយលើប្រេងឥន្ធនៈ ការថែទាំសុខភាព ព្រោះវាបាន ធានាបាននូវការផ្គត់ផ្គង់ទឹកស្អាតប្រើប្រាស់ប្រចាំថ្ងៃ ទ្រទ្រង់ដល់ការដាំដុះនិងការចិញ្ចឹមសត្វរបស់ប្រជាពលរដ្ឋ និងលើសពីនេះវាជាថាមពលស្អាតឆ្លើយតបនឹង ការប្រែប្រួលអាកាសធាតុ ដែលមធ្យោបាយនេះ រួមចំណែកដល់យុទ្ធសាស្រ្តប្រែក្លាយសហគមន៍អព្យាក្រឹតកាបូនទៅថ្ងៃអនាគត។ នៅពេលដែលប្រជាពលរដ្ឋនៅតាមសហគមន៍តំបន់ការពារធម្មជាតិ មានជីវភាពរស់នៅ និងអាចបង្ផលកសិកម្មមានភាពល្អប្រសើរ សហគមន៍នឹងកាត់បន្ថយការចូលព្រៃកាប់ឈើ ឬបរបាញ់សត្វ ដែលនេះជាគោលដៅស្នូលនៃកិច្ចការពារព្រៃឈើប្រកបដោយនិរន្តរភាព ដូចជាឆ្លើយតបនឹងសសរសត្តម្ភទី២ នៃយុទ្ធសាស្រ្តចក្រាវិស័យបរិស្ថាន។

គូរបញ្ជាក់ថា គម្រោងរេដបូក (REDD+) គឺជាយន្តការអន្តរជាតិមួយ ដែលត្រូវបានបង្កើតឡើងដើម្បី កាត់បន្ថយការភាយឧស្ម័នផ្ទះកញ្ចក់ ពីការសឹករិចរឹល និងបាត់បង់ព្រៃឈើ។ នៅក្នុងប្រទេសកម្ពុជា ថវិកាដែលទទួលបានពីការលក់ឥណទានកាបូន (Carbon Credits) តាមរយៈគម្រោងនេះ ត្រូវបានយកមកប្រើប្រាស់ដើម្បីផ្តល់ផលប្រយោជន៍ ដើម្បីការពារបរិស្ថាន និងការគាំទ្រដល់ជីវភាពសហគមន៍មូលដ្ឋាន៕