នាយឧត្តមសេនីយ៍ ស ថេត ដឹកនាំប្រតិភូនគរបាលជាតិ ទៅចូលរួមសន្និសីទអាស៊ានណាប៉ូល នៅម៉ានីល

លោកនាយឧត្តមសេនីយ៍ ស ថេត អគ្គស្នងការនគរបាលជាតិ កាលពីព្រឹកថ្ងៃទី២២ ខែកក្កដា ឆ្នាំ២០២៦ បានដឹកនាំគណៈប្រតិភូជាន់ខ្ពស់នៃអគ្គស្នងការដ្ឋាននគរបាលជាតិ អញ្ជើញចូលរួមសន្និសីទអាស៊ានណាប៉ូល លើកទី៤៤ នៅទីក្រុងម៉ានីល ប្រទេសហ្វីលីពីន។

ដំណើរចូលរួមសន្និសីទនេះ គឺតបតាមការអញ្ជើញរបស់នគរបាលហ្វីលីពីន​ និងអនុវត្តតាមសេចក្តីថ្លែងការណ៍រួម (JC) នៃសន្និ​សីទអាស៊ានណាប៉ូល លើកទី៤៣​ នៅប្រទេសថៃ ហើយដោយទទួលបានការអនុញ្ញាតពីសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។

បើតាមអគ្គស្នងការដ្ឋាននគរបាលជាតិ សន្និសីទអាស៊ានណាប៉ូល លើកទី៤៤នេះ ប្រព្រឹត្តទៅពីថ្ងៃទី២២ ដល់ថ្ងៃទី២៦​ ខែកក្កដា​ ឆ្នាំ២០២៦​ នៅឯទីក្រុងម៉ានីល​។

សន្និសីទអាស៊ានណាប៉ូល គឺជាវេទិកាសំខាន់ប្រចាំឆ្នាំសម្រាប់ប្រធាននគរបាលជាតិនៃបណ្តាប្រទេសជាសមាជិកអាស៊ានបានជួបប្រជុំគ្នាដើម្បីលើកកម្ពស់ទំនាក់ទំនងសហប្រតិបត្តិការអនុវត្តច្បាប់ និងកិច្ចសហការប្រយុទ្ធប្រឆាំងបទល្មើសឆ្លងដែនគ្រប់ប្រភេទ ជាពិសេសកិច្ចប្រជុំទ្វេភាគីជាមួយបណ្តាប្រទេសប្រធានស្ថាប័ននគរបាលជាតិនៃបណ្តាប្រទេស ស្ថាប័នជាដៃគូពិភាក្សា(DP) និងអ្នកសង្កេតការណ៍(OB)។

គួរឱ្យដឹងថា មុនសន្និសីទអាស៊ានណាប៉ូលនេះត្រូវបើកជាផ្លូវការ គឺមានកិច្ចប្រជុំកម្រិតក្រុមការងារនាំមុខ ដោយក្នុងនោះក្រុមការងារនាំមុខនៃអគ្គស្នងការដ្ឋាននគរបាលជាតិកម្ពុជា ចំនួន ៣រូប ដឹកនាំដោយឧត្តមសេនីយ៍ឯក ម៉ៅ ពៅ អនុប្រធានសេនាធិការ បានចូលរួមសម្រាប់កិច្ចប្រជុំគណៈកម្មាធិការប្រតិបត្តិ លើកទី១៥។

កិច្ចប្រជុំក្រុមការងារនាំមុខនេះ គឺដើម្បីពិភាក្សា និងពិនិត្សសម្រេចចុងក្រោយនូវខ្លឹមសារ ដែលកិច្ចប្រជុំបានឯកភាពគ្នាជាឯកច្ឆន្ទ ដេីម្បីត្រៀមដាក់ជូនវេទិកាពិភាក្សា ដោយប្រធានប្រតិភូ​ ប្រកាសអនុម័តដាក់បញ្ជូលក្នុងសេចក្តីថ្លែងការណ៍រួមនៃសន្និសីទអាស៊ានណាប៉ូល លើកទី៤៤៕