ឈ្លោះគ្នាក្នុងបារ៍មួយកន្លែងនៅអាមេរិក បាញ់រះប្រាវៗ ស្លាប់ និងរបួស ៨ នាក់

យោងតាមសារព័ត៌មាន CNN ដោយដកស្រង់ប្រភពពីប៉ូលិសក្នុងស្រុក បានឲ្យដឹងថា មនុស្ស ៣ នាក់ត្រូវបានបាញ់សម្លាប់ និង ៥ នាក់ផ្សេងទៀតបានរងរបួស នៅឯបារ៍មួយកន្លែងក្នុងទីក្រុង Youngstown រដ្ឋ Ohio សហរដ្ឋអាមេរិកកាលពីថ្ងៃអាទិត្យ ។

សារព័ត៌មាន CNN បាននិយាយថា ប៉ូលិសបានទៅដល់កន្លែងកើតហេតុភ្លាមៗ នៃការបាញ់ប្រហារនៅឯបារ៍ Torch Club Bar & Grille ក្នុងទីក្រុង នៅម៉ោង ២ ព្រឹក (ម៉ោងនៅសហរដ្ឋអាមេរិក) ។ បណ្តាញសារព័ត៌មានក្នុងស្រុក WKBN ក៏បានឲ្យដឹងដែរថា ហេតុការណ៍នោះ ផ្ដើមចេញពីការឈ្លោះប្រកែកគ្នានៅជិតបារ៍ បន្ទាប់មកក៏មានការបាញ់តបតគ្នា ដោយកាំភ្លើង ។

សារព័ត៌មាន WKBN បន្តថា ទីក្រុងនេះមានករណីឃាតកម្មចំនួន ១១ ករណីហើយនៅឆ្នាំនេះ ខណៈមនុស្ស ៤២ នាក់ត្រូវបានបាញ់ និងរងរបួស ៕

ប្រែសម្រួលដោយ ៖ ជីវ័ន្ត

ប្រភព ៖ CGTN