រុះរើស្ពានដែកចាស់ សាងសង់ស្ពានលូបេតុងថ្មី នៅលើប្រឡាយមេតាហោ

ក្រុមការងារបច្ចេកទេស នៃមន្ទីរធនធានទឹក និងឧតុនិយម ខេត្តកំពង់ស្ពឺ បានចុះពិនិត្យ និងរុះរើ​ស្ពានដែក​បេឡេត្រ​ពាំងខ្យង ដែលទ្រុឌទ្រោម ខ្លាំងចេញដើម្បី រៀបចំសាងសង់ ស្ពានថ្មី ជា​ប្រភេទ​លូបេ​តុង​អាមេ។

សកម្មភាពរុះរើសស្ពានដែកចាស់ដែលទ្រុឌទ្រោមជាច្រើនឆ្នាំជួលជុលប្រចាំនោះ ធ្វើឡើង​នៅថ្ងៃ​ទី​២៧ ខែឧសភា ឆ្នាំ​​២០២១នេះ ដឹកនាំដោយលោក ញ៉ាញ់ ជាបហ៊ង ប្រធានមន្ទីរ ធនធានទឹក និង​ឧតុនិយម ខេត្តកំពង់ស្ពឺ និងមានការសហការរៀបចំបញ្ចៀសចរាចពីនគរបាលស្រុកសំរោងទង ព្រមទាំងអាជ្ញាធរឃុំផងដែរ។

ស្ពានដែកបេឡេដែលទ្រុឌទ្រោមខ្លាំងត្រូវរុះរើចេញដើម្បីសាងសង់លូបេតុងអាមេនេះ ស្ថិតលើ​ប្រឡាយមេតាហោ ក្នុងភូមិត្រពាំងខ្យង ឃុំត្រពាំងគង ស្រុកសំរោងទង ខេត្តកំពង់ស្ពឺ។

ស្ពាននេះ រងការខួចខាត និងទ្រុឌទ្រោមជាច្រើនឆ្នាំកន្លងមកហើយដោយរថយន្តធំៗដឹកថ្ម ខ្សាច់ឆ្លងកាត់ទាំងយប់ទាំងថ្ងៃ។

លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ បានលើកឡើងថា ក្រុមការងារបច្ចេកទេស បានចុះត្រួតពិនិត្យផ្ទាល់ដោយបានធ្វើការរុះរើ ស្ពានដែក​ឆ្លងកាត់ប្រឡាយ​មេតាហោដើម្បីដំណើរការសាងសង់លូបេតុងអាមេ សម្រាប់សម្រួលដល់ការធ្វើដំណើរ​ឆ្លងកាត់​របស់សាធារណៈជក៍ដូចជាបងប្អូនប្រជាពលរដ្ឋ។

ចំពោះជូនប្រជាពលរដ្ឋ ដែលធ្វើដំណើរឆ្លងកាត់តាមផ្លូវនេះ សូមរកផ្លូវវៀងសិនព្រោះក្រុម​ការ​ងារ​បានផ្អាកការធ្វើចរណ៍លើស្ពាននេះត្រូវសាងសង់ថ្មីវិញ។

លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ បានបញ្ជាក់ថា សម្រាប់​ថវិការចំណាយក្នុងការសាងសង់ស្ពានថ្មីប្រឡាយមេតាហោនេះ នៅឃុំត្រពាំងគង ស្រុកសំរោង​ទង​នេះគឺបានមកពីសប្បុរសជននានាចូលរួមសហការជាមួយមន្ទីរធនធានទឹកដើម្បីឆ្លើយតមតាមការចាំបាច់របស់បងប្អូនប្រជាពើរដ្ឋ៕ អត្ថបទ៖ ភួង រដ្ឋា