អនុរដ្ឋមន្ត្រី​ការបរទេស​អាមេរិក សន្យា​យក​កង្វល់​របស់​កម្ពុជា​ដាក់ជូន​លោក Joe Biden

ការសន្យា​របស់លោក​ស្រី Wendy R. Sherman អនុរដ្ឋមន្ត្រី​ការបរទេស​សហរដ្ឋអាមេរិក បាន​ធ្វើឡើង​នៅក្នុង​ជំនួប​ពិភាក្សា​ការងារ​ជាមួយ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា នា​ល្ងាច​ថ្ងៃទី​០១ ខែមិថុនា ឆ្នាំ​២០២១ នេះ នៅក្នុង​ដំណើរ​ទស្សនកិច្ច​រយៈពេល​មួយថ្ងៃ​នៅ​កម្ពុជា​។

លោក អៀង សុផល្លែត ជំនួយការ​ផ្ទាល់​របស់លោក​នាយករ​ដ្ឋ​មន្ត្រី​បាន​ថ្លែងប្រាប់​អ្នកសារព័ត៌មាន​ក្រោយ​ជំនួប​នោះ​ថា នៅក្នុង​ជំនួប​នោះ​លោកស្រី Wendy R. Sherman បាន​លើកឡើងថា ដំណើរ​ទស្សនកិច្ច​រប​ស់លោក​ស្រី​មកកាន់​ប្រទេស​កម្ពុជា​នាពេលនេះ គេ​ដើម្បី​នាំយក​នូវ​លិខិត​របស់​លោក​ប្រធានាធិបតី​សហរដ្ឋអាមេរិក Joe Biden ជូន​សម្ដេច​តេ​ជោ​ហ៊ុន សែន ដោយផ្ទាល់ ហើយ​នេះ​គឺជា​បំណង​ផ្ទាល់​របស់លោក ចូ បាយ​ដិ​ន ក្នុងន័យ​ធ្វើយ៉ាងណា​ឱ្យ​អ្វីៗ​មាន​ភាពល្អប្រសើរ​សម្រាប់​ប្រទេស​ទាំងពីរ​។

នៅក្នុង​ជំនួប​នោះដែរ លោកស្រី​បាន​សម្ដែង​នូវ​ការពេញចិត្ត​ចំពោះ​កិច្ចសហប្រតិបត្តិការ​រ​វាង​កម្ពុជា និង​សហរដ្ឋអាមេរិក​នាពេល​កន្លង​មកលើ​វិស័យ​ជាច្រើន ជាពិសេស​លើ​វិស័យ​រុករក​អដ្ឋិធាតុ​ទាហាន​អាមេរិក ដែល​បាត់​ខ្លួន​នៅ​ប្រទេស​កម្ពុជា និង​កិច្ចសហប្រតិបត្តិការ​ប្រយុទ្ធ​ប្រឆាំង​អំពើ​ភេរវកម្ម និង​វិស័យ​មនុស្សធម៌ ដូចជា​ការអនុញ្ញាត​ឲ្យ​កបាល់​វេស​ស្ទើ​ដាំ បាន​ចូល​ចត​នៅ​កម្ពុជា ដើម្បី​ជួយសង្គ្រោះ​ប្រជាពលរដ្ឋ ដែល​ជាប់​នៅលើ​កបាល់​នោះ​ជាដើម ក្រោយពី​ប្រទេស​ផ្សេងទៀត​មិន​អនុញ្ញាត​ឲ្យ​ចូល​ចត ដោយសារតែ​ការរីក​រាលដាល​នៃ​ជំងឺ​កូ​វីដ​១៩​។

នៅក្នុង​ជំនួប​នោះដែរ លោកស្រី Wendy R. Sherman ក៏បាន​ជម្រាបជូន​សម្តេច​តេ​ជោ​ផងដែរ អំពី​ឱកាស នៃ​កិច្ចសហប្រតិបត្តិការ​មួយចំនួនទៀត រវាង​ប្រទេស​ទាំងពីរ ដូចជា​ការលុបបំបាត់​បំណុល​របស់​កម្ពុជា និង​កិច្ច​សហ​ប្រតិបត្តិការលើ​វិស័យ​ប្រេង​ឧស្ម័ន ព្រមទាំង​ការវិនិយោគ​របស់​សហ​រដ្ឋ​អាមេរិក លើ​បញ្ហា​ទឹក​បញ្ហា​ហេដ្ឋារចនាសម្ព័ន្ធ បញ្ហា​ថាមពលបៃតង និង​បញ្ហា​ដទៃទៀត​ជាច្រើន​។

ជា​ការ​ឆ្លើយតប​សម្ដេច​តេ​ជោ​នាយករដ្ឋមន្ត្រី​បាន​សំដែង​នូវ​ការរីករាយ​ចំពោះ​អ្វី ដែល​លោកស្រី​បានលើកឡើង និង​អ្វីដែល​សហរដ្ឋអាមេរិក​បាន​ចូលរួមចំណែក​ចូលរួម​ជួយ​ដល់​កម្ពុជា​ដូចជា​ការចូលរួម​ស្វែងរក​សន្តិភាព​នៅ​កម្ពុជា ការចូលរួមចំណែក​អភិវឌ្ឍ​កម្ពុជា និង​រហូតមក​ដល់ពេលនេះ ការចូលរួម​របស់​ស​ហ​រដ្ឋ​អាមេរិក​ដោយផ្ទាល់ និង​ដោយ​ប្រយោល​តាមរយៈ​អង្គការ WHO ប្រយុទ្ធ​ប្រឆាំងនឹង​ជំងឺ Covid-19​។ ជាមួយគ្នា​នោះ​សម្តេច​តេ​ជោ ក៏បាន​អបអរសាទរ​ដល់​សហ​រដ្ឋ​អាមេរិក ដែល​បាន​ទប់ស្កាត់​ការរីក​រាលដាល​ជំងឺ​កូ​វីដ​១៩ បាន​ដោយ​ជោគជ័យ ធ្វើ​ឲ្យ​រយៈពេល​ប៉ុន្មាន​ថ្ងៃនេះ មានការ​ធ្លាក់ចុះ​គួរ​ជាទី​កត់សម្គាល់​។

ឆ្លៀត​ក្នុងឱកាស​នោះ សម្ដេច​តេ​ជោ ក៏បាន​ថ្លែងអំណរគុណ​ផងដែរ ចំពោះ​អ្វីដែល​បានលើកឡើង​របស់លោក​ស្រី​អនុរដ្ឋមន្ត្រី​ការបរទេស ជាពិសេស​ទាក់ទង​ទៅនឹង​បំណុល ដោយ​សម្ដេច​តេ​ជោ​បាន​ស្នើឱ្យ​លោក​ប្រធានាធិបតី​សហរដ្ឋ​អា​មេ​រិច Joe Biden ពិនិត្យ និង​ពិចារណា​ដោះស្រាយ​លើ​បញ្ហា​បំណុល ដែល​កម្ពុ​ជាមាន​លើ​សហរដ្ឋអាមេរិក តាមរយៈ​យន្តការ​ទ្វេភាគី ដោយ​អនុញ្ញាត​ឲ្យ​កម្ពុជា​សង់បំណុល​នេះ ទី​១, តាម​កម្មវិធី​សង​ឡើងវិញ​បន្តិច​ម្ដង​បន្តិច​ម្ដង ទី​២, សង​តាម​កម្មវិធី​ដែលមាន​ការប្រាក់​មិន​លើសពី​៦​ភាគរយ និង​ទី​៣, បំណុល​ប្រមាណ​៧០ ភាគរយ ត្រូវ​បង្វិល​មកជា​ជំនួយ​ដល់​កម្ពុជា​វិញ លើ​វិស័យ​អប់រំ វិស័យ​វប្បធម៌ និង​វិស័យ​ដោះមីន​ជាដើម​។

ជាមួយគ្នា​នោះ​សម្ដេច​តេ​ជោ​បាន​ស្នើ​ឲ្យ​សហរដ្ឋអាមេរិក​ពិនិត្យឡើងវិញ​លើ​កិច្ចសហប្រតិបត្តិការ ក្នុងការ​បញ្ជូន​ជនជាតិ​កម្ពុជា ត្រឡប់​ពី​សហរដ្ឋអាមេរិក​វិញ​ផងដែរ​។

​ជាការ​ឆ្លើយតប លោកស្រី​អនុរដ្ឋមន្ត្រី​ការបរទេស​បាន​ថ្លែងអំណរគុណ​ចំពោះ​សម្ដេច​តេ​ជោ ហ៊ុន សែន លើ​រាល់​កិច្ចសហប្រតិបត្តិការ​ទាំ​ង​អស់ ហើយ​លោកស្រី​សន្យាថា អ្វី​ដែលជា​សំណើ ក៏ដូចជា​ការលើកឡើង​របស់​សម្ដេច​តេ​ជោ លោកស្រី​នឹង​យក​ដាក់​ជូន​ប្រធានាធិបតី ចូ​បាយ​ដិ​ន​៕

ដោយ ៖ កោះ​កែវ