កម្លាំងការពារព្រំដែន សហការជាមួយយោធាឈរជើងល្បាតការពារតាមព្រំដែនស្រុកលើកដែក និងស្រុកកោះធំ

កម្លាំងកងការពារព្រំដែនលេខ៦០១ នៅថ្ងៃទី ១៦ ខែមិថុនា បានសហការជាមួយកម្លាំង​យោធភូមិ​ភាគ​ពិសេស កម្លាំងតំបន់ប្រតិបត្តិការសឹករងកណ្តាល រួមទាំងកម្លាំង​សមត្ថកិច្ច ឈរជើងតាមព្រំដែន ចុះល្បាតទាំងថ្ងៃ ទាំងយប់ ក្នុងភូមិ​សាស្ត្រ ឃុំសំពៅពូន ឃុំព្រែកជ្រៃ ឃុំឈើខ្មៅ ស្រុកកោះធំ និងឃុំក្អមសំណ ស្រុកលើកដែក ក្នុងការទប់ស្កាត់​ការលួចឆ្លងដែន​ចេញ​ចូល ដើម្បីបង្ការការឆ្លងរីករាលដាលជំងឺកូវីដ-១៩។

ក្រៅពីតំបន់ខាងលើ ក៏មានកម្លាំងឈរជើងនៅទីបញ្ជាការ ក្នុងភូមិក្បាលជ្រោយ ឃុំឈើខ្មៅ ស្រុក​កោះធំ សម្រាប់សហការ និងអន្តរាគមន៍ឱ្យកម្លាំងជួរមុខ ២៤ម៉ោង លើ២៤ម៉ោងផងដែរ។

ទំព័រហ្វេសប៊ុកផេកផ្លូវការរបស់កងទ័ពជើងគោកនៃកងយោធពលខេមរភូមិន្ បានបញ្ជាក់ថា​ទោះបីក្រោមកម្តៅថ្ងៃ ភ្លៀង ខ្យល់ យ៉ាងណា ក៏កងកម្លាំងការពារព្រំដែននៅតែអនុវត្តបទបញ្ជា ឈរ​ជើង និងល្បាត ក្នុ្ងងភារកិច្ច ការពារបូរណភាពទឹកដី និងរក្សាសន្តិភាពតាមខ្សែបន្ទាត់​ព្រំដែន​រវាង​ប្រទេស​ទាំងពីរ ទៅតាមបទបញ្ជាបានដាក់ចុះ៕