ក្រសួងវប្បធម៌ បញ្ជាក់ថា ប្រាសាទ​ដែលថៃកំពុងសាង​សង់ មិនបានចម្លងតាមរចនា​បថប្រាសាទអង្គរវត្តនោះទេ

ក្រសួងវប្បធម៌ និងវិចិត្រសិល្បៈ នៅថ្ងៃទី ០៧ ខែកក្កដានេះ បានចេញសេចក្តីប្រកាសព័ត៌មានមួយ បញ្ជាក់ថា ប្រាសាទ​ដែលថៃកំពុងសាង​សង់ មិនបានចម្លងតាមរចនា​បថប្រាសាទអង្គរវត្តនោះទេ។

សេចក្តីប្រកាសព័ត៌មានលើកឡើងថា តាមរយៈបណ្តាញសង្គមហ្វេសប៊ុក ពាក់ព័ន្ធនឹងការសាងសង់ប្រាសាទមួយនៅខេត្ត បុរីរម្យ ក្នុងប្រទេសថៃ រយៈពេលប៉ុន្មានថ្ងៃកន្លងមកនេះ ក្រសួងវប្បធម៌ បានទំនាក់ទំនងធ្វើការជាមួយ ស្ថានទូតកម្ពុជាប្រចាំប្រទេសថៃ ដើម្បីចុះស្រាវជ្រាវត្រួតពិនិត្យ។

ក្រសួងវប្បធម៌ និងវិចិត្រសិល្បៈ បញ្ជាក់ថា សំណង់ប្រាសាទនេះ ជាសំណង់មួយក្នុងចំណោមប្រាសាទថ្មដទៃៗទៀត មាភាពចម្រុះគ្នា ជាទីប្រតិដ្ឋាននៃ ពុទ្ធរូបសម្រាប់បូជា ស្ថិតក្នុងវត្តពុទ្ធបាទសិលាភូម៉ានហ្វា នៃភូមិណងបួឡាយ ឃុំបានស៊ិង ស្រុកណាងរ៉ង ខេត្តបុរីរម្យប្រទេសថៃ។

តាមក្រសួងវប្បធម៌ “តាមរយៈការបំភ្លឺ និងបង្ហាញឯកសារ ប្លង់ សំណង់នានា ព្រះចៅអធិការវត្តបានបញ្ជាក់ថា ការសាង​សង់ប្រាសាទនេះ មិនបានលួចចម្លងប្លង់ ឬសាងសង់តាមរចនាបថស្ថាបត្យកម្មដូចគ្នា ទៅនឹងប្រាសាទអង្គរវត្ត ឬប្រាសា​ទ​បុរាណណាមួយ នៅក្នុងប្រទេសកម្ពុជាឡើយ ពោលគឺសាងសង់តាមគំរូប្លង់ដោយខ្លួនឯង និងរចនាទៅតាមស្ថាប​ត្យកម្មប្រាសាទមួយចំនួន ដែលមានក្នុងតំបន់នោះ”៕