ផ្ទះបណ្ដែតទឹក និងបែត្រីជាង ១០០ ជម្លៀសទៅដល់ក្បែរព្រំដែន មិនទាន់រើទៅណា ខណៈ​​អាជ្ញាធរពន្លឿន​ម្ចាស់​លក់កូនត្រីចេញឱ្យបានឆាប់

ផ្ទះបណ្ដែតទឹក និងបែចិញ្ចឹមត្រី របស់ជនជាតិវៀតណាមជាង ១៣០ បែដែល​អាជ្ញាធរ​រាជធា​នី​ភ្នំពេញ បានបង្គាប់ឱ្យរុះរើចេញពីផ្ទៃទឹក កាលពីដើមខែមិថុនា ហើយបានភៀសខ្លួន​ទៅដល់ស្រុក​លើកដែក ខេត្តកណ្ដាល និងស្រុកពាមជរ ខេត្តព្រៃវែង មិនទាន់បានរុះរើ ឬក៏អនុញ្ញាតឱ្យ​ចូល​ប្រទេស​របស់​ខ្លួន​វិញនោះទេ ខណៈអាជ្ញាធរកំពុងពន្លឿនពិនិត្យលើលទ្ធភាព ពន្លឿនការលក់កូនត្រីចេញរបស់ពួកគាត់។ ផ្ទះបែដែលមានចំនួនជាង ១០០ កំពុងចតនៅចំណុចឃុំខ្ពបអាទាវ ស្រុកលើកដែក ខេត្តកណ្ដាល។

អភិបាលស្រុក លើកដែក លោក ចាប ច័ន្ទវិទ្យា បានប្រាប់សារព័ត៌មានកម្ពុជាថ្មី នៅថ្ងៃព្រហស្បតិ៍ ទី ០៨ ខែកក្កដានេះថា ផ្ទះបណ្ដែតទឹក និងបែត្រីទាំងនោះ មិនទាន់រុះរើនោះទេ ដោយសារតែអាជ្ញាធរ​យោគ​យល់លើការចិញ្ចឹមកូនត្រីរបស់អ្នកទាំងនោះ។

លោកបញ្ជាក់ថា វិធានការរបស់អាជ្ញាធរនៅពេលនេះ គឺ ការរក្សាសន្តិសុខ និងសណ្ដាប់ធ្នាប់ ហើយ​មិន​អនុញ្ញាតិឱ្យពួកគាត់ឡើងមកលើគោកបាននោះទេ។

លោកបន្តថា អាជ្ញាធរបានបង្គាប់ឱ្យ​ម្ចាស់​ផ្ទះ និងបែទាំងនោះ ពន្លឿនការលក់កូនត្រី ដើម្បីឆាប់បានរើផ្ទះបែចេញ ខណៈ​បច្ចុប្បន្នមិន​ទាន់បង្ខំ​ចិត្ត​រុះរើចេញបានទេ នឹងធ្វើឱ្យប៉ះពាល់ដល់ជីវភាព សេដ្ឋកិច្ចគ្រួសាររបស់ពួកគាត់ ដូច្នេះអាជ្ញាធរ​ទុករយៈពេលមួយសមស្រប ប៉ុន្តែមិនយូរនោះទេគឺឆាប់ៗនេះហើយ អាជ្ញាធរនឹងចុះពិនិត្យ​មើល​បន្ថែម​ទៀត ថាពួកគាត់បានអនុវត្តតាមគោលការណ៍ណែនាំ និងកិច្ចសន្យាជាមួយ​អាជ្ញាធរបាន​ត្រឹមត្រូវកម្រិតណា។

លោកប្រាប់ថា “ប្រសិនបើពួកគាត់អនុវត្តបានតាមកម្រិតតាមការណែនាំរបស់យើង យើងពិនិត្យ​លទ្ធ​ភាព​របស់គាត់ តើកូនត្រីនិង នៅសល់ប៉ុន្មានភាគរយ យើងអនុញ្ញាតឱ្យគាត់រុះរើ ឬក៏លក់ចេញ​ឱ្យ​អស់​ក្នុងពេលវេលាណាមួយសមស្រប”។

បើតាមលោកអភិបាលស្រុកលើកដែក ជាគោលការណ៍តម្រូវឱ្យពួកគាត់ ត្រូវតែពន្លឿនការលក់​កូន​ត្រី​ចេញ ហើយពួកគាត់ក៏ស្ម័គ្រចិត្តរុះរើដែរនាពេលឆាប់ៗនេះ។

លោក គ្រុយ ម៉ាឡែន នាយករដ្ឋបាលខេត្តកណ្តាល បានបញ្ជាក់ប្រាប់កម្ពុជាថ្មីដែរថា អាជ្ញាធរបានអនុវត្តតាមគោល​ការណ៍ពីថ្នាក់លើ មិនអនុញ្ញាតឱ្យមានផ្ទះបណ្ដែតទឹក ឬបែចិញ្ចឹមត្រី ចត ឬតាំងលំនៅតាមដឹងទន្លេនោះទេ។

ក្រុមជនជាតិវៀតណាម ដែលជាម្ចាស់បែត្រីទាំងនោះ បានបណ្ដែតផ្ទះ និងបែត្រីចេញពីច្បារអំពៅ ចេញ​ពីដងទន្លេមេគង្គ ទៅដល់ចំណុចកោះខ្ពបអាទាវ ស្រុកលើកដែកខេត្តកណ្ដាល ដែលមាន​ចម្ងាយ​ ២០ គីឡូម៉ែត្រទៅកាន់ព្រំដែនទឹក នៃប្រទេសវៀតណាម។

នៅថ្ងៃទី ១២ ខែមិថុនា អាជ្ញាធរប្រើវិធានការរដ្ឋបាល ចុះទៅរុះរើ បែចិញ្ចឹមត្រី ផ្ទះបណ្តែតទឹក ផ្ទះតូចៗ និង សំណង់មិនរៀបរយនៅលើផ្ទៃទន្លេ ដើម្បីបើកផ្លូវនាវាចរ កុំអោយប៉ះពាល់ដល់ប្រព័ន្ធ​អេកូឡូហ្ស៊ី មានចរន្តទឹកហូរ គោករាក់ ពិសេសកុំអោយបន្តការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឱ្យខូចខាតយ៉ាងធ្ងន់​ធ្ងរដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន និងប៉ះពាល់ដល់សោភ័ណ​ភាពរាជធានី​ភ្នំពេញ ព្រមទាំងប៉ះពាល់ដល់សុខភាពប្រជាពលរដ្ឋ ដែលបានប្រើប្រាស់ទឹកមិនស្អាតផងដែរ ហើយ​ការ​ងារនេះ បើគិតមកដល់ពេលនេះអាជ្ញាធររាជធានីភ្នំពេញ អនុវត្តបានជោគជ័យនិងទទួលបានការ​គាំទ្រយ៉ាងពេញ​ទំហឹងពីប្រជាពលរដ្ឋគ្រប់មជ្ឈដ្ឋាន៕ ដោយៈ ឡេង ដេត