ព័ត៌មានជាតិ

ខេត្តបន្ទាយមានជ័យ ពង្រីកមណ្ឌលចត្តាឡីស័ក និង កន្លែងព្យាបាល ក្រោយពលករមកពីថៃកើនឡើង

បានផុស

៥ years មុន

នៅ

ថ្ងៃអង្គារ ១៣ កក្កដា ២០២១

ដោយ

ខេត្តបន្ទាយមានជ័យ បានរៀបចំមណ្ឌលចត្តាឡីស័ក និងកន្លែងព្យាបាលអ្នកជំងឺកូវីដ១៩ កម្រិតស្រាលបន្ថែមទៀត ក្រោយពលករខ្មែរវិលត្រឡប់មកពីថៃ មានការកើនឡើងជាបន្តបន្ទាប់។

ជាក់ស្តែងនៅព្រឹកថ្ងៃទី១៣ ខែកក្កដា ឆ្នាំ២០២១ លោក អ៊ុំ រាត្រី អភិបាលខេត្តបន្ទាយមានជ័យ បានអញ្ជើញចុះពិនិត្យមើលទីតាំង នៅសាលាបឋមសិក្សាថ្មពួក និង វិទ្យាល័យថ្មពួក ក្នុងស្រុកថ្មពួក ខេត្តបន្ទាយមានជ័យ ដើម្បីរៀបចំទៅជាមណ្ឌលធ្វើចត្តាឡីស័កសម្រាប់បងប្អូនប្រជាពលរដ្ឋ និងបន្តពិនិត្យមើលទីតាំងវិទ្យាល័យខ្លាកូន ក្នុងក្រុងសិរីសោភ័ណ រៀបចំជាមណ្ឌលព្យាបាលអ្នកជំងឺកូវីដ១៩ កម្រិតស្រាល។

ក្នុងឱកាសនោះ អភិបាលខេត្តបន្ទាយមានជ័យ បានគូសបញ្ជាក់ថា« ដោយសារស្ថានភាពបងប្អូនធ្វើចត្តាឡីស័ក និងត្រឡប់មកពីប្រទេសថៃ មានចំនួនកើនឡើង។ ដូច្នេះក្នុងនាមអាជ្ញាធរខេត្ត គណៈកម្មាការខេត្តប្រយុទ្ធនឹងជំងឺកូវីដ១៩ បន្តធ្វើការរៀបចំបន្ថែមមណ្ឌលធ្វើចត្តាឡីស័ក ដើម្បីសម្របសម្រួលដាក់ធ្វើចត្តាឡីស័កបងប្អូនប្រជាពលរដ្ឋ ឲ្យបានត្រឹមត្រូវតាមវិធានការសុខាភិបាល»។

ជាមួយគ្នានោះ លោក អភិបាលខេត្តក៏បានណែនាំក្រើនរំលឹកដល់អាជ្ញាធរមូលដ្ឋានស្រុកឃុំ ក្រុមការងារចម្រុះកងកម្លាំង ត្រូវបន្តយកចិត្តទុកដាក់ខ្ពស់ ក្នុងការពិនិត្យ គ្រប់គ្រងបងប្អូនក្នុងមណ្ឌលឲ្យបានល្អ ត្រឹមត្រូវ ដើម្បីចូលរួមទប់ស្កាត់ជំងឺកូវីដ១៩៕

អត្ថបទ៖ សំអឿន

Related Topics:ចត្តាឡីស័ក