រថយន្តដឹកស្រូវ យកទៅលក់នៅវៀតណាម ជាច្រើនគ្រឿង កកស្ទះនៅច្រកទ្វារ អន្តរជាតិភ្នំដិន

(តាកែវ)៖ មានរថយន្តយីឌុប មិនតិចគ្រឿងនោះទេ ក្នុងមួយថ្ងៃៗ ផ្ទុកដោយស្រូវពេញៗរថយន្ត កំពុងតែកកកុញសឹងតែរកផ្លូវដើរមិនរួច ដែលសម្រុកដឹកយក ទៅលក់នៅប្រទេសវៀតណាម តាមច្រកទ្វារអន្តរជាតិភ្នំដិន។

ទោះជាប្រទេសកម្ពុជា និងវៀតណាម កំពុងស្ថិតក្នុងស្ថានភាពជំងឺរាតត្បាតកូវីដ១៩ យ៉ាងណាក៏ដោយ ចំពោះការចរាចរណ៍ទំនិញចេញ-ចូលនៃប្រទេសទាំងពីរ តាមច្រកទ្វាអន្តរជាតិភ្នំដិន ស្រុកគីរីវង់ នៅតែរក្សាបាននូវដំណើការល្អក្រោមការយកចិត្តទុកដាក់ នៃថ្នាក់ដឹកនាំខេត្តតាកែវ និងអានយ៉ាង ដែលជាខេត្តមានព្រំប្រទល់ជាប់គ្នា។

ជាពិសេស បានបន្តអនុវត្តវិធានការសុខាភិបាល ទប់ស្កាត់ការរីករាលដាល់ នៃជំងឺកូវីដ-១៩ យ៉ាងល្អ ជាប់ជាប្រចាំក្នុងគោលដៅឆ្លងកាត់។ តាមការពិនិត្យ នៅព្រឹកថ្ងៃទី៥ ខែសីហា ឆ្នាំ២០២១ នៅច្រកទ្វាអន្តរជាតិភ្នំដិន មានរថយន្តមិនក្រោមពី ២០០គ្រឿងនោះទេ កំពុងតែកកស្ទះនៅនឹងកន្លែង ជាហេតុធ្វើឲ្យស្ទះចរាចរណ៍ សឹង តែរកផ្លូវដើរមិនរួច ហើយនៅមានរថយន្ត បានបន្តសម្រុកមកជាបន្តបន្ទាប់។

ចំពោះការកកស្ទះ រថយន្តដឹកស្រូវ នៅច្រកទ្វារអន្តរជាតិភ្នំដិននេះ លោក ស៊ុត ខុន អភិបាលស្រុកគីរីវង់ បានឲ្យដឹងថា គឺបណ្តាលមក ពីភាគីខាងវៀតណាម បានរឹតបន្តឹងវិធានការសុខាភិបាល ដើម្បីទប់ស្តាត់ការឆ្លងរីករាលដាលជំងឺកូវីដ-១៩ ដោយការចេញ-ចូល ត្រូវមានការកំណត់ ចំនួនរថយន្តច្បាស់លាស់៕ (ដោយ)៖ វីរៈ