៦ខែឆ្នាំនេះ ប.ស.ស. ផ្តល់ប្រាក់បំណាច់ប្រចាំថ្ងៃ ជាង៦០ពាន់ លានរៀល ដល់សមាជិក ជាង ៣ម៉ឺន​នាក់

នៅក្នុងរយៈពេល៦ខែ ឆ្នាំ២០២១នេះ បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ បានផ្តល់តាវកាលិក ផ្នែកថែទាំសុខភាព ឬប្រាក់បំណាច់ប្រចាំថ្ងៃជូនសមា​ជិករបស់ខ្លួនសរុបជាង ៣ម៉ឺននាក់ និងបានចំណាយ ជាទឹកប្រាក់សរុប ប្រមាណជាង៦០ពាន់លានរៀល។

ថ្លែងក្នុងកម្មវិធីវេទិកាវិស័យឯកជន ស្ដីពី បច្ចុប្បន្នភាព នៃតាវកាលិកជូនកម្មករនិយោជិត កាលពីថ្ងៃទី១១ សីហា លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម នៃ ប.ស.ស. បានឱ្យដឹងថា គិតត្រឹមឆមាសទី១ ឆ្នាំ២០២១គឺចាប់ពីថ្ងៃទី០១ មករា ដល់ ៣០មិថុនាឆ្នាំ២០២១បេឡាជាតិសន្តិសុខសង្គម (ប.ស.ស) បានផ្តល់តាវកាលិកផ្នែកថែទាំសុខភាព (ប្រាក់បំណាច់ប្រចាំថ្ងៃ) ជូនសមាជិករបស់ខ្លួនសរុបជាង ៣ម៉ឺននាក់ និងបានចំណាយជាទឹកប្រាក់សរុបប្រមាណជាង ៦០ពាន់លានរៀល មានការថយចុះជាង ២៧% បើប្រៀបធៀប ទៅនឹងឆមាសទី១ ដូចគ្នា ក្នុងឆ្នាំ២០២០ កន្លងទៅ។

លោក សុក បូរ៉ា បានបន្តទៀតថា« បើទោះបីជាមកទាល់ពេលនេះ ជំងឺកូវីដ-១៩ នៅតែមានការគម្រាមកំហែង និងបន្តរីករាលដាលយ៉ាងណាក៏ដោយ ប.ស.ស. នៅតែបន្តផ្តល់សេវា រួមទាំងការផ្តល់ជូនតាវកាលិក (អត្ថប្រយោជន៍របបសន្តិសុខសង្គម) ជូនដល់សមាជិករបស់ខ្លួន ជាមួយនឹងវិធានសុខាភិបាល និងត្រូវអនុវត្តឱ្យបានជាប់ជានិច្ចនូវវិធាន ៣ការពារ និង ៣កុំ ក្នុងន័យរួមចំណែកទប់ស្កាត់នៃការឆ្លងរីករាលដាលនៃជំងឺដ៏កាចសាហាវមួយនេះ»៕ (ដោយ)៖ សំអឿន