រដ្ឋត្រៀមបម្រុងពូជស្រូវ និង​ដំណាំ​ជាង២ពាន់តោន សម្រាប់​ជួយកសិកររងគ្រោះ ដោយ​គ្រោះ​ធម្មជាតិ

នៅឆ្នាំ២០២១នេះ រាជរដ្ឋាភិបាលកម្ពុជា បានត្រៀមបម្រុង ស្រូវប្រមាណ២ពាន់តោន និងពូជដំណាំ២៥​តោន​សម្រាប់​អន្តរាគមន៍ ជួយដល់កសិករក្រីក្រ ដែលងាយរងគ្រោះ ដោយគ្រោះមហន្តរាយធម្មជាតិ។

លោក វេង  សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងនៅក្នុងទំព័រហ្វេប៊ុក ថា​ក្រសួ​ង បានការត្រៀមបម្រុងគ្រាប់ពូជស្រូវ និងពូជដំណាំរួមផ្សំ រួចរាល់ហើយទុកសម្រាប់ អន្តរាគមន៍​ជួយ​សង្គ្រោះប្រជាកសិករ ដែលរងផលប៉ះពាល់ និងខូចខាតដោយគ្រោះធម្មជាតិដើម្បី ធ្វើការស្តារដាំដុះដំណាំ​ស្បៀង ឡើងវិញឲ្យបានទាន់ពេលវេលា និងមានប្រសិទ្ធភាព។

លោករដ្ឋមន្ត្រី បានឲ្យដឹងបន្តថា នាយកដ្ឋានដំណាំ ស្រូវបានត្រៀមគ្រាប់ពូជស្រូវ ចំនួន២ ០០០តោន ដោយ​ធ្វើ​ការវេចខ្ចប់ ២៥គ.ក្រ/បាវ សរុបមានចំនួន៨០ ០០០បាវ និងកំពុងរក្សាទុកនៅក្នុងឃ្លាំង របស់អគ្គនាយក​ដ្ឋាន​កសិកម្ម។ រីឯគ្រាប់ពូជបន្លែ និងដំណាំរួមផ្សំ ក៏បានត្រៀមចំនួន១២មុខ ស្មើនឹង២៥តោន និងវេចខ្ចប់ជា​កញ្ចប់តូចៗ បានជិត៦០ម៉ឺនកញ្ចប់ រួចហើយដែរ។

លោករដ្ឋមន្ត្រី បានបន្ថែមថា ពូជដំណាំទាំងនោះរួមមាន៖ ពោតដំណើប សណ្តែកកួរ ផ្ទីស ស្ពៃខៀវ ស្ពៃចង្កឹះ ននោង ត្រកួន ល្ពៅ ត្រប់វែង ត្រប់ក្រាំងរមាស ត្រឡាច និងប៉េងប៉ោះ ដោយគ្រាប់ពូជទាំងអស់ បានរក្សា​ទុក​នៅស្ថានីយផលិត ពូជបន្លែក្បាលកោះ ខេត្តកណ្តាល។

លោករដ្ឋមន្ត្រី បានបញ្ជាក់ថា ជារៀងរាល់ឆ្នាំ វិស័យកសិកម្ម តែងជួបបញ្ហាគ្រោះធម្មជាតិ ដែលតែងតែ​បំផ្លាញ​ផលដំណាំ របស់បងប្អូនប្រជាកសិក ដូចជាគ្រោះរាំងស្ងួត គ្រោះទឹកជំនន់ ខ្យល់កន្រ្តាក់ ជំងឺឆ្លងដំណាំ និង​សមាស​ភាព សត្វល្អិតចង្រៃបំផ្លាញផលដំណាំ។ ដូចនេះក្នុងស្មារតីទទួលខុសត្រូវ ក្រសួងតែងបានត្រៀម​បម្រុងនូវគ្រាប់ពូជស្រូវ និងដំណាំផ្សេងៗ សម្រាប់អន្តរាគមន៍ ជួយស្តារស្ថានភាពខូចខាត ផលដំណាំរបស់​កសិករឡើងវិញ ឲ្យបានទាន់ពេលវេលា៕

អត្ថបទ៖ សំអឿន