ទឹកទន្លេមេគង្គ​ខេត្តកំពង់ចាម​ ចាប់ផ្តើមឡេីង​

ស្ថានភាពអាកាសធាតុក្នុងខេត្តកំពង់ចាម ខេត្តត្បូងឃ្មុំ មួយរយៈចុងក្រោយនេះ មេឃមានធ្លាក់ភ្លៀងតាមតំបន់ហេីយទឹកទន្លេមេគង្គ ក៍បានបន្តហក់ឡើងជាបន្តបន្ទាប់ដែរ ប៉ុន្តែមិនទាន់ដល់កម្រិតប្រកាសអាសន្ននៅឡេីយទេ។

នេះយោងតាមរបាយការណ៍កម្ពស់ទឹក ពីមន្ទីរធនធានទឹក និងឧត្តុនិយម ខេត្តកំពង់ចាម បានបញ្ជាក់ថា នៅថ្ងៃទី១០ ខែកញ្ញា ឆ្នាំ២០២១នេះ កម្ពស់ទឹកទន្លេមេគង្គបានឡើងសន្សឹមៗ ដល់កម្ពស់៨.៩៧ម៉ែត្រ បេីធៀបថ្ងៃដដែល ឆ្នាំមុន កម្ពស់ទឹកទន្លេមេគង្គកំពង់ចាម មានកម្ពស់៦.៩២ម៉ែត្រ កម្រិតដែលត្រូវប្រកាសអាសន្នសម្រាប់ខេត្តកំពង់ចាមគឺកម្ពស់១៥.២០សង់ទីម៉ែត្រ។

ហេីយកម្ពស់ទឹកទន្លេឡេីងនៅពេលនេះ មិនទាន់បានហូរចូលទៅតំបន់វាលទំនាបនូវឡេីយ ពោលគឺបច្ចប្បន្ន តាមដងទន្លេតូច ក្នុងស្រុកកោះសូទិន ការធ្វេីដំណេីររបស់ប្រជាពលរដ្ឋ នៅរដូវនេះ គឺធ្វេីដំណេីរតាមទូកចម្លង ឬកាណូត ឆ្លងពីត្រេីយម្ខាងទៅម្ខាង។

សម្រាប់បងប្អូនប្រជាពលរដ្ឋ ដែលរស់នៅតាមដងទន្លេមេគង្គ ដូចក្នុងខេត្តកំពង់ចាម-ត្បូងឃ្មុំ បានលើកការព្រួយបារម្ភថា បើទឹកទន្លេឡើងតូចដូចឆ្នាំទៅ គឺពួកគាត់ជួបការលំបាក ក្នុងការងារបង្កបង្កើនផលហើយ ជាពិសេសធ្វើឱ្យដីរឹងពិបាកភ្ជួររាស់ សម្បូរសត្វកណ្តុរ និងស្រមោចមករំខាន។

ក្រៅពីនោះទឹកតូចពេក ក៏មិនបាននាំមកនូវដីល្បាប់សម្រាប់ការងារដាំដុះដំណាំផ្សេងៗ ប៉ុន្តែបើទឹកជំនន់ធំ និងអូសបន្លាយយូរពេក ក៏ពួកយើងមិនចង់បានដែរ ពោលគឺពួកគាត់ប្រាថ្នាចង់បាននូវកម្ពស់ទឹកជំនន់សមល្មម និងអាចលិចដីបង្កបង្កើនផល ត្រឹមតែរយៈពេលខ្លីប៉ុណ្ណោះ គឺវាគ្រប់គ្រាន់ហើយសម្រាប់ពួកគាត់ទៅហើយ៕

អត្ថបៈ ហុង ម៉េងហៀ