ជំនន់ទឹកភ្លៀង នៅតែបន្តលិចស្រុកមង្គលបូរី ខណៈស្រុក ៣ ផ្សេងទៀត​ទឹកបានស្រកចុះ

រដ្ឋបាលខេត្តបន្ទាយមានជ័យបានឱ្យដឹងថា ជំនន់ទឹកភ្លៀង ដែលបានហូរធ្លាក់​មកពី​ប្រទេស​ថៃ បណ្ដាលឱ្យ​ស្រុកមួយចំនួននៅជាប់ព្រំដែនដូចជា ស្រុកថ្មពួក ស្រុកអូរជ្រៅ ស្រុកម៉ាឡៃ ក្រុងប៉ោយប៉ែត រងការជន់លិច​រយៈពេលខ្លីនោះ បានស្រកចុះវិញអស់ហើយ តែស្រុកមង្គលបូរី ទឹកជំនន់កំពុងជន់លិច។

អភិបាលក្រុងប៉ោយប៉ែត លោក គាត ហ៊ុល បានចុះផ្ទាល់ និងបញ្ជូនគ្រឿងចក្រទៅកាយប្រឡាយដើម្បីពន្លឿនឱ្យទឹកហូរស្រកទៅក្រោមវិញយ៉ាងលឿន។

លោក ឡាយ សូធី អនុប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានឱ្យដឹងថា​កម្រិតទឹកនៅពេលនេះមិនទាន់មានសភាពធ្ងន់ធ្ងរ រហូតដល់ប្រកាសអាសន្ន​នៅឡើយទេ​សម្រាប់​ខេត្តបន្ទាយមានជ័យ។

ចំណែកនៅតាមបណ្ដាស្រុកមួយចំនួនក៏រងផលប៉ះពាល់ដោយជំនន់ទឹកភ្លៀង​ ហើយក្នុងភូមិសាស្ត្រខ្លះមិនធ្វើឱ្យប៉ះពាល់ដល់ផលដំណាំប្រជាពលរដ្ឋនោះទេ។

ស្រុកមង្គលបូរីថ្ងៃទី១៤ ឡើងដល់ ៥ហ៊ុន បើប្រៀបធៀបថ្ងៃទី១៣ ខែកញ្ញាចំពោះស្រុកម៉ាឡៃ និងទីក្រុងប៉ោយប៉ែត មិនមានលិចទឹកនោះទេ ចំណែកស្រុកអូរជ្រៅមានការលិចលង់ខ្លះដែរ ប៉ុន្តែ​មិនទាន់ដល់កម្រិតប្រកាសអាសន្ន៕

អត្ថបទៈ វ៉ាន់ ណាង