ទឹកទន្លេមេគង្គ ខេត្តកំពង់ចាម ហក់ឡើងខ្លាំង កំពុង​ហូរចូលព្រែកជាច្រើន

មន្ទីរធនធានទឹក និងឧតុនិយម ខេត្តកំពង់ចាម បានឱ្យដឹង នៅថ្ងៃទី ១៥ ខែកញ្ញានេះថា ទឹកទន្លេមេគង្គខេត្តកំពង់ចាម បានហក់ឡើងជាង ១ ម៉ែត្រ (១,៤១) និងបានហូរចូលព្រែកជាច្រើន ក្នុងស្រុកចំនួន៤ក្នុងខេត្តកំពង់ចាម។

របាយការណ៍របស់មន្ទីរធនធានទឹក និងឧតុនិយម ខេត្តកំពង់ចាមបញ្ជាក់ថា មួយថ្ងៃ១យប់ទឹកទន្លេមេគង្គខេត្តកំពង់ចាមបន្តឡើងកម្ពស់ ជិត១ម៉ែត្រកន្លះ ដោយស្ថានភាពកម្ពស់ទឹក បានបន្តឡើងបន្ថែមទៀតដល់កម្ពស់១១,៩២ម៉ែត្រ ធៀបទៅនឹងថ្ងៃម្សិលមិញ ទឹកឡើង ១,៤១ម៉ែត្រ។

លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាមបានបញ្ជាក់ថា ព្រែកចំនួន១៣ក្នុងចំណោមព្រែកទាំង៤១បានទទួលរបបទឹកទន្លេមេគង្គក្នុងនោះរួមមានស្រុកស្ទឹងត្រង់៤ព្រែក កំពង់សៀម២ កោះសូទិន១ និងស្រុកកងមាស៦។

យោងតាមការព្យាការណ៍របស់ក្រសួងធនធានទឹក និងឧតុនិយម ទឹកទន្លេមេគង្គខេត្តស្ទឹងត្រែង ក្រចេះ កំពង់ចាម នៅថ្ងៃទី១៧ខែកញ្ញាឆ្នាំ២០២១នឹងស្រកចុះវិញ៕