ព័ត៌មានជាតិ

ថ្ងៃដែលយើងទន្ទឹងរង់ចាំ បានមកដល់ហើយ ចំពោះការផ្ទេរតំណែងជាប្រធានអាស៊ានដល់កម្ពុជាសម្រាប់ឆ្នាំ២០២២

បានផុស

៥ years មុន

នៅ

ថ្ងៃសុក្រ ២៩ តុលា ២០២១

ដោយ

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជាបានអះអាងថា ថ្ងៃដែលយើងទន្ទឹងរង់ចាំជាយូរមកនោះឥឡូវបានមកដល់ហើយ ដោយប្រទេសព្រុយណេដារូស្សាឡាម បានផ្ទេរតំណែងជាប្រធានអាស៊ានដល់កម្ពុជាសម្រាប់ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់ប្រមុខការទូតកម្ពុជា នៅក្នុងបណ្តាញសង្គមហ្វេសប៊ុករបស់ខ្លួន និងបន្ទាប់ពីថ្នាក់ដឹកនាំប្រទេសព្រុយណេ ព្រះចៅស៊ុលតង់ ហាជី ហាសសាណាល់ បុលគីយ៉ាស ព្រះមហាក្សត្រ នៃប្រទេសព្រុយណេដារូស្សាឡាម បានប្រគល់ញញួរជាប្រធានអាស៊ានមកដល់កម្ពុជា នៅក្នុងពិធីបិទជាផ្លូវការកិច្ចប្រជុំកំពូលអាស៊ានលើកទី៣៨ និង៣៩ និងកិច្ចប្រជុំកំពូលពាក់ព័ន្ធ កាលពីរសៀលថ្ងៃទី២៨ ខែតុលា ឆ្នាំ២០២១។

លោកឧបនាយករដ្ឋមន្ត្រី ប្រាក់ សុខុន បានកោតសរសើរប្រទេសព្រុយណេ និងបុគ្គលពាក់ព័ន្ធទាំងអស់ ដែលបានចូលរួមចំណែកក្នុងការសម្រេចបាននូវសមិទ្ធផលសំខាន់មួយទៀត ទាំងសម្រាប់ព្រុយណេ និងសម្រាប់អាស៊ាន។ លោកអះអាងថា ក្រោមប្រធានបទ “អាស៊ានរួមគ្នាធ្វើ-ដោះស្រាយបញ្ហាប្រឈមទាំងអស់គ្នា” កម្ពុជានឹងខិតខំជំរុញវិធីសាស្ត្ររួម និងកៀរគរកិច្ចខិតខំប្រឹងប្រែងរបស់ប្រទេសសមាជិកអាស៊ានទាំងអស់ ដើម្បីធានាបាននូវសុខដុមរមនា សន្តិភាព និងវិបុលភាព ដែលនឹងជាប្រយោជន៍សម្រាប់តំបន់ និងប្រជាជនរបស់យើង។

កាលពីរសៀលថ្ងៃទី២៨ ខែតុលា ឆ្នាំ២០២១ នៅក្នុងពិធីបិទកិច្ចប្រជុំកំពូលអាស៊ានលើកទី៣៨ និង៣៩ និងកិច្ចប្រជុំកំពូលពាក់ព័ន្ធ ព្រះចៅស៊ុលតង់ ហាជី ហាសសាណាល់ បុលគីយ៉ាស ព្រះមហាក្សត្រ នៃប្រទេសព្រុយណេដារូស្សាឡាម បានប្រគល់ញញួរប្រធានអាស៊ានជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងបានជូនពរជ័យដល់ព្រះរាជាណាចក្រកម្ពុជា ឱ្យទទួលបានជោគជ័យត្រចះត្រចង់ក្នុងការកាច់ចង្កូតកិច្ចខិតខំប្រឹងប្រែងកសាងសហគមន៍អាស៊ានឆ្នាំ២០២២៕

អត្ថបទ៖ កោះកែវ