ទុកពេល៧ថ្ងៃដល់ម្ចាស់អាជីវកម្មរំលោភលើទ្រូងផ្លូវសាធារណៈ មុនចាត់វិធានការច្បាប់

រដ្ឋបាលខណ្ឌទួលគោក បានសម្រេចដោយទុករយៈពេល០៧ថ្ងៃ ចំពោះម្ចាស់អាជីវកម្មគ្រប់ប្រភេទដែលបាន និងកំពុងលក់ដូរ​ទំនិញនៅលេីកំណាត់ផ្លូវលេខ​ ២៤៥ (ចាប់ពីផ្លូវលេខ ២៣០​ ដល់ផ្លូវលេខ ៣៣៦)​ ស្ថិតក្នុងសង្កាត់ផ្សារដេីមគរ​ និង​ សង្កាត់បឹងសាឡាង​ បើនៅតែរឹងទទឹងប្រកបអាជីវកម្មលក់ដូរទំនិញគ្រប់ប្រភេទនៅលើចិញ្ចើមផ្លូវ និងទ្រូងផ្លូវសាធារណៈទៀត រដ្ឋបាលខណ្ឌទួលគោក នឹងចាត់វិធានការរដ្ឋបាល វិធានការច្បាប់ និងមិនទទួលខុសត្រូវលើការខូតខាត ឬបាត់បង់ទ្រព្យសម្បត្តិណាមួយឡើយ។

មន្ត្រីរដ្ឋបាលខណ្ឌទួលគោកបានបញ្ជាក់ឱ្យដឹងនៅព្រឹកថ្ងៃទី០៤ ខែវិច្ឆិកានេះថា ដើម្បីកាត់បន្ថយការកកស្ទះចរាចរណ៍ ការរក្សាសណ្ដាប់ធ្នាប់សាធារណៈ ឱ្យមានរបៀបរៀបរយតាមដងផ្លូវ និងលើកកម្ពស់សោភ័ណភាពក្នុងមូលដ្ឋាន ឱ្យបានល្អប្រសើរ រដ្ឋបាលខណ្ឌទួលគោក បានរៀបចំសណ្តាប់ធ្នាប់នៅតាមបណ្តោយផ្លូវលេខ ២៤៥ (ផ្លូវម៉ៅសេទុង) ក្នុងភូមិសាស្ត្រខណ្ឌទួលគោក រាជធានីភ្នំពេញ ជាបន្តបន្ទាប់។ ក៏ប៉ុន្តែក្នុងរយៈពេលកន្លងមកនេះ ក៏ឃើញមានបងប្អូនម្ចាស់អាជីវកម្មលក់ដូរគ្រប់ប្រភេទ បានធ្វើឱ្យមានការកកស្ទះចរាចរណ៍ និងការចោលសំរាមគ្មានសណ្តាប់ធ្នាប់ បណ្ដាលឱ្យមានការកកស្ទះ ប្រព័ន្ធលូនៅពេលមានភ្លៀងធ្លាក់ម្ដងៗ និងធ្វើឱ្យបាត់បង់សោភ័ណភាព របៀបរៀបរយ និងសណ្តាប់ធ្នាប់សាធារណៈ។

ដើម្បីបង្កលក្ខណៈងាយស្រួលដល់ការរៀបចំផ្លូវខាងលើឱ្យបានល្អប្រសើរ រដ្ឋបាលខណ្ឌទួលគោកបានដាក់ចេញជាវិធានការមួយចំនួន ដោយឱ្យបងប្អូនម្ចាស់អាជីវកម្មទាំងអស់បញ្ឈប់រាល់ការប្រកបអាជីវកម្មលក់ដូរទំនិញគ្រប់ប្រភេទលើចិញ្ចើមផ្លូវ និងទ្រូងផ្លូវសាធារណៈជាដាច់ខាត។ មិនអនុញ្ញាតឱ្យមានការចត ឬឈប់យានយន្តដឹកជញ្ជូនទំនិញ ដើម្បីផ្ទេរទំនិញគ្រប់ប្រភេទ តាមគ្រប់មធ្យោបាយនៅរលីចិញ្ចឹម និងទ្រូងផ្លូវសាធារណៈ នៅលើកំណាត់ផ្លូវលេខ ២៤៥ (ចាប់ពីផ្លូវលេខ ១៨២ ដល់ ផ្លូវលេខ ៣៣៦)។ ចំពោះបងប្អូនដែលប្រកបអាជីវកម្មគ្រប់ប្រភេទនៅក្នុងដីកម្មសិទ្ធផ្ទាល់ខ្លួនដែលមិនទាន់មានលិខិតអនុញ្ញាតបើកអាជីវកម្ម សូមបងប្អូនស្នើសុំលិខិតអនុញ្ញាតប្រកបអាជីវកម្មនៅការិយាល័យច្រកចេញចូលតែមួយ ខណ្ឌទួលគោក។

រដ្ឋបាលខណ្ឌទួលគោក ទុករយៈពេល០៧ថ្ងៃ ចាប់ពីថ្ងៃជូនសេចក្តីណែនាំនេះតទៅ ក្នុងករណីមិនអនុវត្តតាមការណែនាំ ពោលគឺនៅថ្ងៃទី០៩ ខែវិច្ឆិកា រដ្ឋបាលខណ្ឌទួលគោក នឹងចាត់វិធានការរដ្ឋបាល វិធានការច្បាប់ និងមិនទទួលខុសត្រូវលើការខូតខាត ឬបាត់បង់ទ្រព្យសម្បត្តិណាមួយឡើយ។

រដ្ឋបាលខណ្ឌទួលគោក ធ្វេីសេចក្តីណែនាំរួចហើយកាលពីថ្ងៃទី០២ ខែវិច្ឆកានេះ ដើម្បីឱ្យម្ចាស់អាជីវកម្មគ្រប់ប្រភេទដែលបាន និងកំពុងលក់ដូរ​ទំនិញនៅលេីកំណាត់ផ្លូវលេខ ​២៤៥ (ចាប់ពីផ្លូវលេខ ២៣០​ ដល់ផ្លូវលេខ ៣៣៦)​ ស្ថិតក្នុងសង្កាត់ផ្សារដេីមគរ​ និង​ សង្កាត់បឹងសាឡាង​ ចូលរួមរក្សាសណ្តាប់ធ្នាប់​ របៀបរៀបរយសាធារណៈ ទប់ស្កាត់ការរំលោភយកចិញ្ចេីមផ្លូវ​ និងទ្រូងផ្លូវសាធារណៈ​សម្រាប់អាជីវកម្មរបស់ខ្លួន ដែលនាំឱ្យមានការកកស្ទះចរាចរណ៍នៅលេីដងផ្លូវ​ ប៉ះពាល់​ដល់ផលប្រយោជន៍ និងការរស់នៅប្រចាំថ្ងៃរបស់ប្រជាពលរដ្ឋក្នុងរាជធានីភ្នំពេញ​៕

ស្រីរ័ត្ន