ព័ត៌មានជាតិ

ជនបរទេសចាំបាច់មានឯកសារអ្វីខ្លះ ដើម្បីអាចបើកបរក្នុងប្រទេសកម្ពុជាបាន?

បានផុស

៥ years មុន

នៅ

ថ្ងៃពុធ ១៧ វិច្ឆិកា ២០២១

ដោយ

កន្លងទៅមានករណីជនបរទេសបើកបរយានជំនិះ ហើយពេលខ្លះត្រូវបានសមត្ថកិច្ចឃាត់សួរនាំរកឯកសារនានា។

លោក ថី វិសាល អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានឲ្យកម្ពុជាថ្មីដឹងថា បើយោងតាមមាត្រា ៤៥ នៃច្បាប់ចរាចរណ៍ផ្លូវគោកបានចែងពីសិទ្ធិសម្រាប់ជនបរទេស ដែលចូលមកស្នាក់នៅស្របច្បាប់ ហើយមានបំណងចង់បើកបរនៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងច្បាប់បានកំណត់សិទ្ធិក្នុងការបើកបររបស់ជនបរទេស លើកលែងមានកិច្ចព្រមព្រៀងឬអនុសញ្ញាអន្តរជាតិដែលមានការទទួលស្គាល់បណ្ណបើកបរទៅវិញទៅមកជាទ្វេភាគី ឬពហុភាគី។

បើតាមលោកថី វិសាល រាល់ជនបរទេសដែលមានបំណងចង់បើកបរលើផ្លូវនៅប្រទេសកម្ពុជា ចាំបាច់ត្រូវមានប័ណ្ណបើកបរ។ ការទទួលបានប័ណ្ណបើកបរអាចធ្វើឡើងតាមមធ្យោបាយពីរយ៉ាងគឺទីមួយ ត្រូវប្រឡងយកប័ណ្ណបើកបរដូចពលរដ្ឋខ្មែរទូទៅដែរ និងទីពីរអាចយកបណ្ណបើកបរពីប្រទេសកំណើតមកប្តូរយកបណ្ណបើកបរកម្ពុជា ដោយដាក់ពាក្យស្នើសុំនៅក្រសួងសាធារណការនិងដឹកជញ្ជូន។

លោកបន្តថា ប្រទេសកម្ពុជាជាប្រទេសហត្ថលេខីដែលទទួលស្គាល់បណ្ណបើកបរអន្តរជាតិដែលមានជាង ១០០ ប្រទេស ហើយជនបរទេសដែលកាន់បណ្ណបើកបរអន្តរជាតិ ក៏អាចមានសិទ្ធិស្របច្បាប់ក្នុងការបើកបរនៅប្រទេសកម្ពុជាដោយមិនបាច់ប្តូរយកបណ្ណបើកបរកម្ពុជា ឬប្រឡងយកបណ្ណបើកបរថ្មីនោះទេ។

លោកថី វិសាលបានបញ្ជាក់បន្ថែមថា នៅពេលធ្វើដំណើរអ្នកបើកបរត្រូវភ្ជាប់ជាមួយបណ្ណបើកបរ លិខិតឆ្លងដែន និងអត្តសញ្ញាណប័ណ្ណ។ នៅពេលមានកំហុសសមត្ថកិច្ចអាចសួររកបណ្ណបើកបរ ដោយផ្ទៀងផ្ទាត់ជាមួយលិខិតឆ្លងដែន ឬអត្តសញ្ញាណប័ណ្ណ។

ទាក់ទងការត្រួតពិនិត្យបណ្ណបើកបរអាចធ្វើឡើងនៅពេលណាដែរ បើតាមមន្រ្តីរូបនេះការឆែកសួររកបណ្ណបើកបរ ករណីប្រព្រឹត្តិកំហុសដូចជាល្មើសភ្លើងស្តុប ផ្លាកសញ្ញា ឬល្បឿនគឺសមត្ថកិច្ចអាចឃាត់ ហើយសួររកប័ណ្ណបើកបរ។

បើតាមលោក ថី វិសាល នៅពេលចាប់បានបទល្មើសការបើកបររបស់ជនបរទេស ក៏ត្រូវអនុវត្តការផាកពិន័យតាមទោសកំហុសមិនខុសពីពលរដ្ឋខ្មែរទូទៅដែរ យោងទៅតាមច្បាប់ដែលបានកំណត់៕

អត្ថបទ៖ ប៊ុណ្ណារ៉ា

Related Topics:ចំណេះដឹង