សហជីព​ព្រួយបារម្ភការឆ្លង រាលដាលកូវីដ ក្រោយបើកខារ៉ាអូខេ ក្លឹបកម្សាន្ដ ឌីស្កូតែកឡើងវិញ

​សហជីព ដែលធ្វើការងារពាក់ព័ន្ធ ​នឹងវិស័យសេវាកម្មកម្សាន្ដ នៅមានការព្រួយបារម្ភ ជុំវិញការឆ្លងរាលដាល​នៃជំងឺកូវីដ-១៩ ក្រោយពីរាជរដ្ឋាភិបាល បានប្រកាសអនុញ្ញាតឲ្យបើកដំណើរការអាជីវកម្ម ខារ៉ាអូខេ (KTV) ក្លឹបកម្សាន្ដ រង្គសាល-ឌីស្កូតែក ឡើងវិញ។

លោក ម៉ម រិទ្ធី ប្រធានសហព័ន្ធសហជីពកម្មករ-និយោជិតវិស័យទេសចរណ៍ និងសេវាកម្មកម្ពុជា មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ១ ខែធ្នូនេះថា ចំពោះការអនុញ្ញាតឲ្យបើកឡើងវិញ នូវសេវាកម្មកម្សាន្ដទាំងនោះ គឺជាគោលនយោបាយរបស់រាជរដ្ឋាភិបាល ក្នុងការដំណើរការសង្គម-សេដ្ឋកិច្ច ហើ​យ​សម្រាប់លោកមិនមានអ្វី ដែលត្រូវលើកឡើងនោះទេ។ ប៉ុន្តែក្នុងនាមជាមេសហជីព ដែលធ្វើការងារក្នុងវិស័យនេះមួយរូប លោកបានបង្ហាញការព្រួយបារម្ភ ពាក់ព័ន្ធនឹងការឆ្លងរាលដាលនៃជំងឺកូវីដ-១៩ ជាពិសេសវីរុសបប្លែងថ្មីតែម្ដង។

លោក ម៉ម រិទ្ធី លើកឡើងថា «ខ្ញុំនៅតែមានការព្រួយបារម្ភថា ក្នុងការបើកហ្នឹង គឺវានឹងធ្វើឲ្យមានផលប៉ះ​ពាល់ សម្រាប់ការឆ្លងរីករាលដាលកាន់តែខ្លាំង ហើយមេរោគហ្នឹង វាកាន់តែបប្លែងខ្លួនទៅមួយផ្នែក ដូចពេលបច្ចុប្បន្ននេះ ខ្ញុំឃើញបប្លែងខ្លួនទៅជាស្អីថ្មីមួយទៀត ចឹងខ្ញុំព្រួយបារម្ភរឿងហ្នឹងថា អាចមានផលប៉ះពាល់ខ្ពស់»។

ចំពោះការបើកឡើងវិញនេះ មេសហជីពវិស័យសេវាកម្មកម្សាន្ដ បានអំពាវនាវដល់ម្ចាស់អាជីវកម្ម កម្មករ-និយោជិត និងភ្ញៀវដែលចូលទៅទីតាំងកម្សាន្ដនោះ ត្រូវបន្តមានការប្រុងប្រយ័ត្នខ្ពស់ ជាពិសេសត្រូវបន្តចូលរួមទប់ស្កាត់ ការឆ្លងរាលដាលជំងឺកូវីដ-១៩ ដែលកំពុងបន្តកើតមាននៅឡើយ នៅក្នុងប្រទេសកម្ពុជា។

គួរកត់សម្គាល់ថា ក្រោយពីផ្អាកដំណើរការអាជីវកម្ម លើវិស័យសេវាកម្មកម្សាន្ដ ដោយសារការរាត​ត្បា​តជំងឺកូវីដ-១៩ អស់រយៈពេលជាច្រើនខែមកនេះ គឺកម្មករ-និយោជិត ដែលធ្វើការងារពាក់ព័ន្ធក្នុងវិស័យនេះ បានត្រឡប់ទៅស្រុកកំណើតរបស់ពួកគេវិញ និងខ្លះទៀតបានទៅធ្វើការងារក្នុងវិស័យផ្សេង។

ទោះបីជារាជរដ្ឋាភិបាល បានបើកដំណើរការឡើងវិញ នូវអាជីវកម្មសេវាកម្មម្ហូបអាហារ តាំងពីដើមខែវិច្ឆិកា និងចុងក្រោយនេះ បើកដំណើរការសេវាកម្មកម្សាន្ដ ដូចជា៖ ខារ៉ាអូខេ (KTV) ក្លឹបកម្សាន្ដ រង្គសាល-ឌីស្កូតែកជាដើម ក៏កម្មករ-និយោជិត ដែលធ្វើការងារក្នុងវិស័យមួយនេះ មិនទាន់វិលត្រឡប់មកច្រើននោះដែរ។ នេះបើតាមការកត់សម្គាល់ របស់លោក ម៉ម រិទ្ធី ប្រធានសហព័ន្ធសហជីពកម្មករ-និយោជិតវិស័យទេសចរណ៍ និងសេវាកម្មកម្ពុជា។

លោកបានឲ្យដឹងថា «មកដល់ឥឡូវហ្នឹង យើងឃើញថា អត់ទាន់មានទេ អត់មានថាជាលក្ខណៈទ្រង់​ទ្រាយដូចមុនទេ បានន័យថា នៅមានតិចតួចៗ តាមហាង ហើយលក្ខណៈលំដាប់ខារ៉ាអូខេ យើងឃើ​ញ​ថា​ វាមិនទាន់មានដំណើរការល្អដូចមុនទេ ឬមួយក៏បាន ៥០ភាគរយ ដូចពេលមុនទេ បានន័យថា វានៅកម្រិតទាប»។

យ៉ាងណាក៏ដោយ មេសហជីពរូបនេះ មិនមានតួលេខសរុបសម្រាប់កម្មករ-និយោជិត ដែលធ្វើការងារពាក់ព័ន្ធ នឹងវិស័យសេវាកម្មកម្សាន្ដនេះនោះទេ ដោយគ្រាន់តែដឹងថា អំឡុងពេលកូវីដ-១៩ រាតត្បាតខ្លាំង គឺអ្នកធ្វើការងារក្នុងវិស័យនេះកន្លងមក ក៏ជួបបញ្ហាប្រឈមផ្នែកជីវភាព មិនខុសទៅនឹងអ្នកធ្វើការ​ងារ ក្នុងវិស័យកាត់ដេរនោះឡើយ។

សូមជម្រាបថា ក្រសួងទេសចរណ៍ នៅយប់ថ្ងៃទី ៣០ ខែវិច្ឆិកា ឆ្នាំ ២០២១ បានជម្រាបជូនអភិបាលរាជធានី-ខេត្ត ជុំវិញការអនុញ្ញាតឲ្យបើកដំណើរការអាជីវកម្ម ខារ៉ាអូខេ (KTV) ក្លឹបកម្សាន្ដ រង្គសាល-ឌីស្កូតែក និងម៉ាស្សាឡើងវិញ។ ការអនុញ្ញាតនេះ គឺយោងតាមប្រសាសន៍ដ៏ខ្ពង់ខ្ពស់ របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី ៣០ ខែវិច្ឆិកា ឆ្នាំ ២០២១។

ក្រសួងទេសចរណ៍ បានឲ្យដឹងថា រាជរដ្ឋាភិបាល អនុញ្ញាតឲ្យបើកដំណើរការអាជីវកម្ម ខារ៉ាអូខេ (KTV) ក្លឹបកម្សាន្ដ រង្គសាល-ឌីស្កូតែក និងម៉ាស្សា ឡើងវិញ ចាប់ពីថ្ងៃទី ៣០ ខែ វិច្ឆិកា ឆ្នាំ ២០២១តទៅ។

ប៉ុន្តែក្រសួងទេសចរណ៍ បានណែនាំថា មុននឹងបើក រដ្ឋបាលរាជធានី-ខេត្ត ត្រូវត្រួតពិនិត្យ និងវាយតម្លៃលក្ខណៈសម្បត្តិ របស់មូលដ្ឋានអាជីវកម្ម ខារ៉ាអូខេ (KTV) ក្លឹបកម្សាន្ដ រង្គសាល-ឌីស្កូតែក និងម៉ាស្សា ឲ្យបានគ្រប់ជ្រុងជ្រោយ ស្របតាមខ្លឹមសារលិខិត ចុះថ្ងៃទី ១១ ខែវិច្ឆិកា ឆ្នាំ ២០២១ និងតាមនីតិវិធីប្រតិបត្តិស្ដង់ដារអប្បបរមា (SOP) តាមគន្លងប្រក្រតីភាពថ្មី របស់ក្រសួងទេសចរណ៍ លើមូលដ្ឋាននៃគោលការណ៍ណែនាំ របស់ក្រសួងសុខាភិបាល។

ម្យ៉ាងទៀត ក្នុងដំណើរការអនុវត្ត ប្រសិនបើម្ចាស់អាជីវកម្មមិនអនុវត្ត បានត្រឹមត្រូវតាមវិធានសុវត្ថិភាពទេសចរណ៍ និងនីតិវិធីប្រតិបត្តិស្ដង់ដារអប្បបរមា (SOP) តាមគន្លងប្រក្រតីភាពថ្មី សម្រាប់អាជីវកម្ម ខារ៉ាអូខេ (KTV) ក្លឹបកម្សាន្ដ រង្គសាល-ឌីស្កូតែក និងអាជីវកម្មម៉ាស្សា រដ្ឋបាលរាជធានី-ខេត្ត ត្រូវចាត់វិធានការ ស្របតាមខ្លឹមសារលិខិត ចុះថ្ងៃទី ១១ ខែវិច្ឆិកា ឆ្នាំ ២០២១ របស់ក្រសួងទេសចរណ៍ ឲ្យបានម៉ឺងម៉ាត់៕

អត្ថបទ៖ ឃួន សុភ័ក្រ