ព្រះសពសម្តេចក្រុមព្រះ នឹងយាងដង្ហែមកដល់កម្ពុជានាថ្ងៃអាទិត្យ ខាងមុខ

លោក ញឿន រ៉ាដែន អ្នកនាំពាក្យគណបក្សហ្វ៊ុនស៊ិនប៉ិច បានបញ្ជាក់ប្រាប់កម្ពុជាថ្មីនៅរសៀលថ្ងៃព្រហស្បតិ៍នេះថា ព្រះសពសម្តេចក្រុមព្រះ នរោត្តម រណឫទ្ធិ នឹងយាងដង្ហែមកដល់ប្រទេសកម្ពុជា នាថ្ងៃអាទិត្យ ទី០៥ ខែធ្នូ ឆ្នាំ២០២១ វេលាម៉ោង ១១ ថ្ងៃត្រង់។ លោក ញឿន រ៉ាដែន បានគូសបញ្ជាក់ទៀតថា ព្រះសពសម្តេចក្រុមព្រះ នរោត្តម រណឫទ្ធិ នឹងយាងដង្ហែតាមយន្តហោះពិសេសពីប្រទេសបារាំង។

សម្តេចក្រុមព្រះ នរោត្តម រណឫទ្ធិ បាន​យាង​សោយ​ព្រះ​ទិវង្គត់នា​ថ្ងៃទី​២៨ ខែវិច្ឆិកា ឆ្នាំ​២០២១​នា​វេលា​ម៉ោង ៩​និង​៤០​នាទី​ព្រឹក ត្រូវ​នឹង​ម៉ោង​៣​និង​៤០​នាទី​រសៀល​ម៉ោង​នៅ​ភ្នំពេញ ក្នុង​ព្រះជន្ម​៧៧​ព្រះវស្សា​នៅ​ប្រទេស​បារាំង ក្នុងពេលដែល​ព្រះអង្គ​កំពុង​គង់​ប្រថាប់​ព្យាបាល​ព្រះរោគ​។ ព្រះមហាក្សត្រកម្ពុជា រាជវង្សានុវង្ស និងថ្នាក់ដឹកនាំជាន់ខ្ពស់របស់ជាតិសុទ្ធតែបានចូលរួមសោកស្តាយ និងរំលែកទុក្ខចំពោះការយាងចូលទិវង្គត់របស់សម្តេចក្រុមព្រះ នរោត្តម រណឫទ្ធិ នេះ។

សម្តេច ក្រុមព្រះ នរោត្តម រណឫទ្ធិ គឺជាព្រះប្រធានគណបក្សរាជានិយមហ៊ុនស៊ិនប៉ិច និងជាអ្នកនយោបាយជើងចាស់ដ៏ឆ្នើមមួយរូប។ សម្តេច ក្រុមព្រះ ធ្លាប់ជាប់ឆ្នោត និងធ្វើជានាយករដ្ឋមន្រ្តីទី១នៃព្រះរាជាណាចក្រកម្ពុជា ក្រោយឆ្នាំ១៩៩៣ ពោល គឺក្រោយពីកម្ពុជា បានបិទបញ្ចប់សង្រ្គាមស៊ីវិលទ្រង់ទ្រាយធំ៕

អត្ថបទ៖ វណ្ណ សុគន្ធា