ពលករខ្មែរ១៣៨នាក់ទៀតហើយ ត្រូវបានថៃចាប់បញ្ជូនមកវិញ ក្នុងនោះ ៣១នាក់ មានឆ្លងកូវីដ១៩

ពលករខ្មែរចំនួន១៣៨នាក់ទៀតហើយដែលភាគីថៃ បានចាប់បញ្ជូនត្រឡប់មកកម្ពុជាវិញតាមច្រកតំបន់អូរអន្លក់ ស្ថិតក្នុងភូមិអូរអន្លក់ ឃុំតាសែន ស្រុកកំរៀង នៅថ្ងៃទី១៤ ខែធ្នូ ឆ្នាំ២០២១នេះ ។ នេះបើតាមការឲ្យដឹងរបស់លោកវរសេនីយ៍ឯក សួន ស៊ីរ៉ា នាយការិយាល័យផ្សព្វផ្សាយអប់រំនៃស្នងការដ្ឋាននគរបាលខេត្តបាត់ដំបង។

លោកវរសេនីយ៍ឯក សួន ស៊ីរ៉ា បានឱ្យដឹងទៀតថា ពលករខ្មែរចំនួន ១៣៨ នាក់ដែលភាគីថៃបានចាប់បញ្ជូនមកតាមច្រកព្រំដែនអូរអន្លក់ ត្រូវបានក្រុមគ្រូពេទ្យជំនាញរបស់មន្ទីរសុខាភិបាលខេត្តបាត់ដំបង ធ្វើការត្រួតពិនិត្យ​ និងធ្វើតេស្តរហ័សរកឃើញមានវិជ្ជមានវីរុសកូវីដ១៩ចំនួន ៣១ នាក់ ។ អាជ្ញាធរមានសមត្ថកិច្ច បានចាត់បញ្ជូនពួកគាត់បន្តទៅធ្វើចត្តាឡីស័កនៅមណ្ឌលចត្តាឡីស័កតាមខ្សែបន្ទាត់ព្រំដែនក្នុងស្រុកសំពៅលូនដើម្បីថែទាំសុខភាព ។ ចំពោះពលករដែលមានកាតចាក់វ៉ាក់សាំងពេញលេញចំនួន ១០៧ នាក់ ស្រី៤២ នាក់ ក្មេង២៨នាក់ ត្រូវបានក្រុមគ្រូពេទ្យអនុញ្ញាតឲ្យត្រឡប់ទៅស្រុកកំណើតសាម៉ីរៀងៗខ្លួនវិញ ។

មូលហេតុដែលធ្វើឲ្យពលករខ្មែរនៅតែប្រថុយប្រថានឆ្លងដែនទៅកាន់ប្រទសថៃដោយខុសច្បាប់ទាំងដែលស្ថានភាពប្រទេសទាំងពីរកំពុងជួបវិបត្តិកូវីដ-១៩នោះ គឺដោយសារតែការមិនមានមុខរបរ និងការងារជាក់លាក់ ។ រីឯ បញ្ហាមួយទៀត គឺបញ្ហាបំណុលដែលពួកគេមិនទាន់មានលទ្ធភាពសងទៅកាន់គ្រឹះស្ថានមីក្រូហិរញ្ញវត្ថុ និងធនាគារ។ ទាំងនេះ សុទ្ធតែជាមូលហេតុដែលពលករចំណាកស្រុកបានអះអាង។

ពួកគេ បានអះអាងទៀតថា ការធ្វើចំណាកស្រុកខុសច្បាប់ពេលនេះ គឺធ្វើឡើងនៅតាមច្រករបៀងតូចៗនៃព្រំដែនប្រទេសទាំងពីរ ហើយភាគច្រើន គឺពលករត្រូវបានមេខ្យល់បញ្ចុះបញ្ចូលឲ្យទៅរកការងារធ្វើវិញ។ បើតាមអាជ្ញាធរខេត្តព្រំដែនជាប់ប្រទេសថៃនេះ បើទោះបីជាពលករអាចឆ្លងដែនទៅដល់ទឹកដីប្រទេសថៃក៏ដោយ ក៏ត្រូវបានអាជ្ញាធរថៃចាប់ខ្លួនបញ្ជូនមកកម្ពុជាវិញជាបន្តបន្ទាប់ដែរ ៕

អត្ថបទ ៖ ណារី