សម្ដេចតេជោ ហ៊ុន សែន ៖ ពាក្យថាអាស៊ាន គឺមាន ១០ យើងមិនអាចទទួលបានអាស៊ាន ៩ ទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា អាស៊ាន គឺមានសមាជិក ១០ប្រទេ​ស ហើយមិនអាចទទួលបានអាស៊ាន ៩ ទេ បើទទួលអាស៊ាន ៩ ថ្ងៃក្រោយនឹងមានអាស៊ាន ៨ រួច ៧ ជាបន្តបន្ទាប់។ នេះបើតាមការឲ្យដឹងពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលបានចូលរួមកិច្ចប្រជុំពេញអង្គគណៈរដ្ឋមន្ត្រី ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នាថ្ងៃទី ១៦ ខែធ្នូ ឆ្នាំ ២០២១នេះ។

លោក ខៀវ កាញារីទ្ធ​ រដ្ឋមន្ត្រីក្រសួងព័ត៌មាន បានស្រង់ប្រសាសន៍របស់សម្ដេចតេជោ ហ៊ុន សែន បង្ហោះនៅលើហ្វេស ប៊ុករបស់លោកថា ពាក្យថាអាស៊ាន គឺមាន ១០ យើងមិនអាចទទួលបានអាស៊ាន ៩ ទេ បើយើងទទួលអាស៊ាន ៩ ថ្ងៃក្រោយនឹងមានអាស៊ាន ៨ រួច ៧ ជាបន្តបន្ទាប់ ដោយហេតុថា ការអញ្ជើញប្រជុំកំពូលអាស៊ាន គឺជាសិទ្ធិសម្រេចរបស់ប្រធានប្រចាំឆ្នាំ មិនមែនមានយន្តការពិនិត្យសុពលភាពដូចអង្គការសហប្រជាជាតិនោះទេ។ 

លោករដ្ឋមន្ត្រីក្រសួងព័ត៌មាន បានស្រង់ប្រសាសន៍របស់សម្ដេចតេជោ បន្តថា «ហេតុនេះ បើប្រធានមិនចូលចិត្តប្រទេសណា គាត់មិនអញ្ជើញពិតជាបាន»៕