ខេត្តស្វាយរៀង កំពុងទាក់ទាញវិនិយោគ​ក្នុងវិស័យអចលនទ្រព្យ

វិនិយោគគិនបរទេស ពិសេសអ្នកវិនិយោគចិន កំពុងសម្លឹងមើលវិស័យអចលនទ្រព្យក្នុងទឹកដីខេត្តស្វាយរៀង ក្រោយពេលសេដ្ឋកិច្ចកម្ពុជា បានងើបឡើងវិញជាបណ្តើរៗចាប់ពីចុងឆ្នាំ ២០២១ និងដើមឆ្នាំ ២០២២នេះ។

ជាក់ស្តែងអភិបាលខេត្តស្វាយរៀងលោក ម៉ែន វិបុល កាលពីចុងឆ្នាំ ២០២១ បានថ្លែង​គាំទ្រ និង​លើកទឹកចិត្ត ដល់​វិស័យ​ឯកជន​ទាំងអស់ នៅក្នុង​ខេត្តស្វាយរៀង ដែល​វិនិយោគ​វិស័យ​អចលនទ្រព្យ​ដីធ្លី ស្រប​ពេលដែល​ប្រទេសជាតិ មាន​សុខសន្តិភាព និង​ការអភិវឌ្ឍ លើ​គ្រប់​វិស័យ ដែលជា​ឱកាស​មួយ សម្រាប់​អ្នកវិនិយោគទុន​ទាំងអស់ មក​បណ្តាក់ទុន​រកស៊ី​នៅ​ខេត្ត ដែលមាន​ទីតាំង​ដី អំណោយផល​ជាច្រើន សម្រាប់​អ្នកវិនិយោគ។​

 លោក​អភិបាលខេត្ត តែងតែ​ជំរុញ និង​សហការ ក្នុង​ការផ្តល់​ទំនុកចិត្ត ចំពោះ​ការអភិវឌ្ឍ ហើយ​រាល់​ការវិនិយោគ វិស័យ​ឯកជន ពិតជា​បានរួម​ចំណែក នូវ​គោលនយោបាយ កាត់បន្ថយ​ភាព​ក្រី​ក្រី ជាមួយ​រាជរដ្ឋាភិបាល បាន​មួយកម្រិត ដូចជា បានផ្តល់​នូវ​លំនៅឋាន និងដីមានតម្លៃ​សមរម្យ ជាពិសេសបានផ្តល់​ការងារ ដល់​ប្រជាពលរដ្ឋផងដែរ​។​

ជាមួយគ្នានេះ កាលពីថ្ងៃទី៧ ខែមករា ឆ្នាំ២០២២ ថ្នាក់ដឹកនាំគម្រោងអចលនទ្រព្យ ភូមិមរតក ក្នុងខេត្តស្វាយរៀង ក៏បានទទួលស្វាគមន៍ក្រុមហ៊ុនដៃគូរ ACCI ដែលដឹកនាំដោយលោក Zhigang Wang សហការជាមួយដៃគូរវិនិយោគិនចិន។

លោក សោម សុធា អគ្គនាយកគម្រោងភូមិមរតក បានបញ្ជាក់ថា គម្រោងអចលនទ្រព្យភូមិមរតក បានលរួមនៅក្នុងការងារសង្គម ដូចជាបានស្ថាបនាផ្លូវ និងតែងតែជួយដល់ប្រជាពលរដ្ឋក្រីក្រជាដើម។ លោកបន្តថា ក្រុមហ៊ុននឹងពង្រីកទីតាំងបន្ថែមទៀតនៅស្រុកស្វាយជ្រំដែលមានដីជាង១០០ហិកតា ដើម្បីចូលរួមអភិវឌ្ឍន៍ជាមួយរាជរដ្ឋាភិបាល ក៏ដូចជាអាជ្ញាធរដែនដី បង្កើតបានជាតំបន់អាជីវកម្មផ្សេងៗ និងធ្វើឲ្យតំបន់លិចក្រុងស្វាយរៀង ក្លាយទៅជាតំបន់ដែលមានមនុស្សរស់នៅអ៊ូអរ ស៊ីវិល័យ ទាក់ទាញ និងមានដី ផ្ទះ តូបផ្សារ ក្នុងតម្លៃសមរម្យ។

ដោយ៖ ភក្ដី