​អ្នកនាំ​ពាក្យ​៖ ​ថ្ងៃទី១​ នៃការ​បើក​បវេសនកាល​ឆ្នាំថ្មី​ ដំណើរការ​ល្អប្រសើរ​

មន្ត្រីអ្នកនាំពាក្យក្រសួង អប់រំ យុវជន និងកីឡា លោក រស់ សុវាចា បានឱ្យដឹងថា នៅថ្ងៃទីមួយ នៃការបើកបវេសនកាលឆ្នាំសិក្សាថ្មី ២០២១-២០២២ ដំណើរការទៅយ៉ាងល្អប្រសើរ មិនមានភាព​មិនប្រក្រតីកើតឡើងនោះទេ។

លោក រស់ សុវាចា បញ្ជាក់ថា សម្រាប់ឆ្នាំសិក្សាថ្មី ២០២១-២០២២ ក្រសួងអប់រំ យុវជន និងកីឡា បានណែនាំឱ្យគ្រឹះស្ថានសិក្សាគ្រប់កម្រិត ពីកម្រិតមត្តេយ្យ ដល់ថ្នាក់ទី ១២ ឱ្យបន្តអនុវត្តគន្លងប្រក្រតីថ្មី នៃវិស័យអប់រំ ដោយយើងទាំងអស់គ្នា ត្រូវបន្តការយកចិត្តទុកដាក់លើសុវត្ថិភាព សុខភាពសិក្សា និងការបង្រៀន និងរៀនតាមបែបថ្មី ធ្វើយ៉ាងណាធានាឱ្យបុគ្គលិកអប់រំ និងសិស្សានុសិស្សទាំងអស់ មានសុខភាពល្អ និងធានាបាននូវនិរន្តរភាពនៃការសិក្សាប្រកបដោយគុណភាព និងបន្តចូលរួម​ជាមួយ​រាជរដ្ឋាភិបាល ក្នុងការបង្ការ ទប់ស្កាត់ និងការរីករាលដាលជំងឺកូវីដ១៩។

ជាមួយគ្នានេះ ក្រសួងអប់រំ យុវជន និងកីឡា សម្ដែងនូវការដឹងគុណ ចំពោះសម្ដេចតេជោ នាយករដ្ឋមន្ត្រី គ្រូពេទ្យ និងអ្នកស្ម័គ្រចិត្តសុខាភិបាល និងគ្រប់ភាគីពាក់ព័ន្ធ ដែលបានទប់ស្កាត់ការរាត្បាតជំងឺកូវីដ១៩។ ជាពិសេសការសម្រេចរបស់សម្ដេចតេជោ ផ្ដល់អាទិភាពឱ្យចាក់វ៉ាក់សាំងដល់បុគ្គលិកអប់រំ និងកុមារ អាយុ ចាប់ពី ៥ ឆ្នាំ ឡើងទៅ៕

អត្ថបទៈ ឡេង ដេត