ពិធីចុះហត្ថលេខាប្រគល់ និងទទួលប្រាក់កម្ចី​ចំនួន ១៨៥លានដុល្លារ​របស់ជប៉ុនដល់កម្ពុជា

ដើម្បីចូលរួមទប់ស្កាត់វិបត្តិជំងឺកូវីដ-១៩ ក្នុងដំណាក់កាលទី២ រដ្ឋាភិបាលជប៉ុន បានបន្តផ្តល់ប្រាក់កម្ចីដល់កម្ពុជាប្រមាណ ១៨៥លានដុល្លារបន្ថែមទៀត ជាមួយការប្រាក់ទាប។

ពិធីចុះហត្ថលេខាប្រគល់ និងទទួលប្រាក់កម្ចីនេះ ធ្វើឡើងនៅថ្ងៃទី ១២ ខែមករា ឆ្នាំ២០២២នេះ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅវិមានសន្តិភាព។

បើតាមក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ថវិកាកម្ចីនេះ ប្រើសម្រាប់គាំទ្រសកម្មភាពនៃការអនុវត្តគោលនយោបាយរបស់រាជរដ្ឋាភិបាលកម្ពុជា ដើម្បីឆ្លើយតបទៅនឹងផលប៉ះពាល់សុខភាព សង្គម និងសេដ្ឋកិច្ច ដោយសារជំងឺកូវីដ-១៩ ជាពិសេសលើជំនួយសង្គមសម្រាប់ពលរដ្ឋក្រីក្រ និងក្រុមជនងាយរងគ្រោះមានដូចជា ប្រជាពលរដ្ឋមានជីវភាពស្ថិតក្រោមបន្ទាត់ភាពក្រីក្រ ចាស់ជរា ស្ត្រី កុមារ និងជនជាតិដើមភាគតិចជាដើម។

សូមរំឮកថា កាលពីឆ្នាំ២០២០ រដ្ឋាភិបាលជប៉ុន បានផ្តល់កម្ចីជាង ២៣៧លានដុល្លារ ដើម្បីឆ្លើយតបនឹងវិបត្តិជំងឺកូវីដ១៩នៅកម្ពុជានេះម្តងរួចមកហើយ។ គិតទាំងពីរលើកនេះ ជប៉ុនបានផ្តល់ប្រាក់កម្ចីដល់កម្ពុជា ក្នុងវិបត្តិកូវីដសរុប ៤២២លានដុល្លារអាមេរិក។

កន្លងមក រដ្ឋាភិបាលជប៉ុន បានផ្តល់ជំនួយវ៉ាក់សាំងបង្ការជំងឺកូវីដ១៩ រថយន្តសង្គ្រោះ ទូដាក់វ៉ាក់សាំង ព្រមទាំងបរិក្ខារពេទ្យជាច្រើនផ្សេងទៀត សរុបជាថវិកាជាង ៦០លានដុល្លារអាមេរិក។

វិបត្តិជំងឺកូវីដ១៩ បានធ្វើឱ្យកម្ពុជា ចំណាយថវិកាអស់ប្រមាណ ២,៣០០លានដុល្លារអាមេរិក។ នេះបើតាមបញ្ជាក់របស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា៕ ដោយ៖ ទួន សុផល