ព័ត៌មានជាតិ
មន្ត្រីជាន់ខ្ពស់ថា ការម៉ាក់ងាយមួយចំនួន បានក្លាយមកជាការលើកទឹកចិត្តរបស់សម្ដេចតេជោ ដើម្បីប្រជាជនភូមា
ថ្លែងនៅក្នុងសន្និសីទសារព័ត៌មានស្ដីពី “វឌ្ឍនភាពមូលដ្ឋានឃុំ សង្កាត់ និងទិសដៅការងារបន្តរបស់ខេត្តកំពង់ស្ពឺ” នាព្រឹកថ្ងៃទី១៣ ខែមករា លោក ផៃ ស៊ីផាន បានអះអាងថា មុនពេលដែលសម្តេចតេជោ ហ៊ុន សែន អញ្ជើញទៅមីយ៉ាន់ម៉ា គេបានចោទប្រកាន់ខ្លះ មកលើកម្ពុជា ប៉ុន្តែការម៉ាក់ងាយនោះ បានក្លាយមកជាការលើកទឹកចិត្ត សម្រាប់ការប្រឹងប្រែងរបស់សម្ដេចតេជោ ដើម្បីប្រជាជនមីយ៉ាន់ម៉ា។
មានប្រសាសន៍នៅក្នុងសន្និសីទនោះ លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលកម្ពុជាបានបញ្ជាក់យ៉ាងនេះថា “មុនសម្តេចតេជោតេជោនាយករដ្ឋមន្ត្រី អញ្ជើញទៅមីយ៉ាន់ម៉ា គេបានចោទថា ជាការធ្វើគោលនយោបាយកាទូតខាវប៊យ ដែលនេះគឺជាការម៉ាក់ងាយមួយ ប៉ុន្តែភាសាទាំងនោះបានក្លាយមកជាការលើកទឹកចិត្ត ការប្រឹងប្រែងរបស់សម្ដេចតេជោ ដើម្បីប្រជាជនភូមា។ ជាមួយគ្នានោះ យើងក៏បានឃើញកុងសង់ស៊ីស៥ចំណុចផងដែរ ដើម្បីនិយាយគ្នា ហើយក៏ទទួលបានការយល់ព្រមជាឯកច្ឆ័ន្ទពីភាគីយោធាភូមាផងដែរ”។ លោកបញ្ជាក់ថា ភាគីយោធាភូមា គឺជាភាគីមួយក្នុងចំណោមភាគីដទៃទៀត ប៉ុន្តែយើងត្រូវចាប់ផ្ដើមនិយាយពីភាគីមួយនេះ។
បើតាមលោក ផៃ ស៊ីផាន ភាគីមួយនេះ បានឯកភាពជាមួយអ្វី ដែលជាសំណើរបស់សម្ដេចតេជោ ហ៊ុន សែន ក្នុងនេះមិនមែនត្រឹមតែនិយាយឲ្យឈប់ប្រើអំពើហិង្សានោះទេ គឺត្រូវឈប់បាញ់គ្នា ពីព្រោះសម្ដេចបានបញ្ជាក់ថា ប្រសិនបើមិនឈប់បាញ់គ្នាទេ សិទ្ធិមនុស្សក៏អត់គ្មាន ប្រជាធិបតេយ្យក៏អត់មាន ហើយអ្វីៗក៏គ្មានដែរ ដែលសូម្បីតែយកអំណោយមនុស្សធម៌ ដូចជាថ្នាំពេទ្យ និងវាក់សាំងចាក់ជូនប្រជាជន ក៏ទៅមិនរួចដែរ ដូច្នេះត្រូវតែបញ្ចប់ការបាញ់គ្នា ទើបអ្វីៗអាចទៅមុខ។
លោកថា អ្វីដែលជាផលរំពឹងទុករបស់កម្ពុជា គឺភូមាបានទទួលយកប្រេសិតពិសេសអាស៊ាន គឺលោកឧបនាយរដ្ឋមន្ត្រី ប្រាក់ សុខុន ដែលជាប្រេសិតពិសេសសំណាងសម្ដេចតេជោចូលទៅធ្វើការ ចូលទៅនិយាយគ្នាជាមួយភាគីមួយ នៃប្រទេសភូមា ដែលជាភាគីកាន់កាប់ ឬជាភាគីមានអំណាច ដើម្បីនិយាយគ្នា ឲ្យមានយន្តការ និងគោលការណ៍បទឈប់បាញ់ ហើយការឈប់បាញ់នេះ មិនមែនឈប់ទៅភាគីមួយទេ គឺឈប់គ្រប់ភាគីទាំងអស់ ហើយប្រេសិតពិសេសនេះ អាចចូលទៅចរចាជាមួយគ្រប់ភាគីទាំងអស់ ដើម្បីរកមធ្យោបាយ ដើម្បីមានដំណោះស្រាយនយោបាយ។
លោក ផៃ ស៊ីផាន អះអាងថា កម្ពុជាបានដើរហួសអ្វីដែលជាកុងសង់ស៊ីស៥ចំណុច ដែលបានឯកភាពគ្នាទៅហើយ រហូតដល់បទឈប់បាញ់ និងការបោះឆ្នោត ដែលទទួលយកបានទាំងអស់គ្នា។ លោកថា កម្ពុជាដែលជាប្រធានប្តូរវេនអាស៊ាននេះ មិនមែនតុលាការ ដែលអាចកាត់ទោសអ្នកណានោះទេ ដូច្នេះសម្ដេចតេជោ ហ៊ុន សែន មិនមែនជាតុលាការ ជាក្រុមប្រឹក្សាសន្តិសុខអង្គការសហប្រជាជាតិ ដែលលើកទ័ពទៅបង្ក្រាបឲ្យរកសន្តិភាពទេ គឺគ្រាន់តែរៀបចំឲ្យមានការចរចាស្វែងរកសន្តិភាព ស្វែងរកការបោះឆ្នោត បញ្ចប់នូវអំពើហិង្សា បញ្ចប់នូវការបាញ់គ្នាប៉ុណ្ណោះ ដែលជាគោលការណ៍ធំបំផុត និងជាបំណងបឋមរបស់សម្ដេចតេជោ។
លោក ផៃ ស៊ីផាន បញ្ជាក់ថា រាល់ពេលដែលកម្ពុជាក្លាយជាប្រធានអាស៊ាន តែងតែទទួលបន្ទុកធ្ងន់ ដែលអាស៊ានមិនបានដោះស្រាយ ដូចជាបញ្ហាដូចឈូងសមុទ្រចិនខាងត្បូងយ៉ាងដូច្នេះដែរ។ ដោយឡែកក្នុងនាមប្រធានអាស៊ានពេលនេះ កម្ពុជាបានធ្វើឲ្យប្រទេសមួយកុំឲ្យមានការកាប់សម្លាប់គ្នាទៅថ្ងៃមុខ៕
ដោយ ៖ កោះកែវ
-
ព័ត៌មានជាតិ១៦ ម៉ោង ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៤ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៣ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៧ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៦ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)