អ្នកជាប់បាក់ឌុប បើមិនទាន់ដឹងទេពកោសល្យខ្លួនទេ គួរធ្វើអ្វី មុនចូលសាកលវិទ្យាល័យ?

តាមរយៈបទពិសោធន៍បង្រៀននិស្សិតតាមសាកលវិទ្យាល័យនានាជាង ១៤ ឆ្នាំមកនេះ អ្នកស្រី លឹម វិរិយា ជាសាស្ត្រាចារ្យធុរៈកិច្ច តែងបានជួប សាកសួរ និងទទួលព័ត៌មានត្រឡប់វិញឃើញថា និស្សិតភាគច្រើនចូលរៀនមុខវិជ្ជាអ្វីមួយ ទាំងពួកគេមិនទាន់ស្គាល់ខ្លួនឯង។

សាស្ត្រាចារ្យលើខាង មានប្រសាសន៍ថា និស្សិតខ្លះសិក្សាបាន ២ ឆ្នាំ ៣ ឆ្នាំ ឬរៀនចប់បរិញ្ញាបត្រទៀតក៏មាន ទើបពួកគេដឹងថាខ្លួនឯងមាននិស្ស័យ ឬចូលចិត្តអ្វីឱ្យពិតប្រាកដ។ ដែលទាំងនេះ ធ្វើឱ្យពួកគេធុញថប់ ខាតពេលវេលា និងធនធាន ដែលរៀនជំនាញខុស ឬត្រូវរៀនចាប់ពីឆ្នាំទី១ឡើងវិញ នូវជំនាញអ្វីដែលជាចំណង់ចំណូលចិត្តរបស់ខ្លួន។

អ្នកស្រី លឹម វិរិយា មានប្រសាសន៍ថា អ្នកដែលទើបតែប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប​ គួរត្រិះរិះ​គិតឱ្យបានយូរ​ រកការពិគ្រោះពិភាក្សាយោបល់ឱ្យបានច្រើនប្រភពសិន​ មុនសម្រេចចិត្តថា​ គួររៀនអ្វីជាបន្ត។ សូមកុំសម្រេចចិត្តរៀន​ ដោយសារមូលហេតុ៖​ សាលាជិតផ្ទះ​ ឬ​ សាលាបញ្ចុះថ្លៃ​ ឬ​ រៀនតាមបងប្អូន​ ឬ​ រៀនកំដរពេលវេលា​ ឬ​ រៀនតាមទីផ្សារការងារ…។

អ្នកស្រីសាស្ត្រាចារ្យ បញ្ជាក់បន្ថែមថា បើមិនទាន់ដឹងថាខ្លួនឯងមានទេពកោសល្យអ្វីពីកំណើតនៅឡើយទេ​ គួរតែរៀនចំណេះដឹងវិជ្ជាជីវៈជាមុនសិន​ក៏ល្អដែរ​ ទម្រាំ​តែរកខ្លួនឯងឃើញពិតប្រាកដ។ បើមិនមានលទ្ធភាពរៀនវិជ្ជាជីវៈទេ​ ត្រឹម​តែខំប្រឹងប្រែងរៀនភាសាបរទេស​ និង​ កុំព្យូទ័រ​ ឱ្យខ្លាំងសិន​ ក៏ជាប្រការដ៏ល្អមួយដែរ។ អ្នកចេះភាសាបរទេស​ និង​ កុំព្យូទ័រ​ច្បាស់​លាស់​ ទោះថ្ងៃក្រោយរៀនជំនាញអ្វី​ ក៏មានសក្ដានុពលលើសពីធម្មតា។

គួរបញ្ជាក់ថា នៅក្នុងមួយឆ្នាំៗ មាននិស្សិតបញ្ចប់ការសិក្សាជាច្រើនម៉ឺននាក់ទូទាំងប្រទេស ប៉ុន្តែគ្រប់និស្សិតទាំងនោះមិនមែនសុទ្ធតែទទួលបានការងារដូចជំនាញដែលខ្លួនបានសិក្សាពីសាកលវិទ្យាល័យឡើយ។ ពួកគេភាគច្រើនរៀនជំនាញផ្សេង មានសញ្ញាបត្រផ្សេង តែចូលធ្វើការខុសជំនាញដែលខ្លួនបានរៀនអស់រយៈពេលជាច្រើនឆ្នាំ ឬអ្នកខ្លះចេញរកស៊ីលក់ដូរវិញក៏មាន។ ស្ថានភាពនេះកើតឡើងដោយសារតែកត្តាសង្គមទីផ្សារ ការងារមានភាពចង្អៀត និងកត្តាផ្ទាល់ខ្លួន៕

អត្ថបទ៖ ច័ន្ទ វីរៈ