អាជីវករ៖ ទំនិញលើទីផ្សារឡើងថ្លៃស្ទើរគ្រប់មុខ​ចន្លោះពី ៥០០រៀល ទៅ ៤,០០០រៀល

ទំនិញនៅលើទីផ្សារចាប់ផ្តើមឡើងថ្លៃជាបណ្តើរៗ ចន្លោះពី ៥០០រៀល ទៅ ៤០០០រៀល ទៅតាមមុខទំនិញ។ ស្របពេលដែលពិធីបុណ្យចូលឆ្នាំប្រពៃណីជាតិចិនឈានជិតមកដល់ ទំនិញនៅលើទីផ្សារមានការប្រែប្រួលតម្លៃគួរកត់សម្គាល់។

អ្នកស្រី ណាលីន អាជីវករលក់ទំនិញគ្រប់មុខនៅផ្សារព្រៃទា រាជធានីភ្នំពេញ បានឲ្យដឹងថា ទំនិញនៅលើទីផ្សារចាប់ផ្តើមឡើងថ្លៃជាបណ្តើរហើយ។ អ្នកស្រីបញ្ជាក់ថា ប្រភេទភេសជ្ជៈឡើងថ្លៃចន្លោះពី ៣០០០រៀលទៅ ៤០០០រៀល ក្នុង១កេះ។ ចំណែកទំនិញផ្សេងទៀត ដូចជា នំកញ្ចប់ បន្លែ ផ្លែឈើ និងសាច់ជ្រូកជាដើម កើនតម្លៃពី ៥០០រៀលឡើងទៅ ទៅតាមមុខទំនិញ។ អ្នកស្រី បានឲ្យដឹងទៀតថា ការឡើងថ្លៃនេះ ទើបកើតឡើងនៅក្នុងសប្តាហ៍នេះប៉ុណ្ណោះ។

ដូចគ្នានេះ អាជីវករមួយរូប នៅផ្សារសាលាលេខ៥ ខេត្តកំពង់ឆ្នាំង សុំមិនបញ្ចេញឈ្មោះ បានឲ្យដឹងដែរថា ទំនិញឡើងថ្លៃដោយសារតម្រូវការរបស់ប្រជាពលរដ្ឋ។ អាជីវកររូបនេះ បញ្ជាក់ថា អ្នកលក់បានតំឡើងថ្លៃទំនិញរបស់ខ្លួន ព្រោះដឹងថា ប្រជាពលរដ្ឋមានតម្រូវការត្រូវតែទិញ ជាពិសេសអីវ៉ាន់ដែលទាក់ទងនឹងបុណ្យចូលឆ្នាំចិន។ «តាមពិតអីវ៉ាន់ខ្លះ តម្លៃថេរ តែអ្នកលក់គាត់ឆ្លៀតឱកាសតំឡើងថ្លៃខ្លួនឯង»។ ទោះយ៉ាងណា អាជីវកររូបនេះ អះអាងថា ខ្លួនមិនតំឡើងថ្លៃទំនិញចាស់នោះទេ ពោលគឺលក់ឡើងថ្លៃតែទំនិញណា ដែលយកចូលថ្មីហើយឡើងថ្លៃប៉ុណ្ណោះ។

កន្លងមកការឡើងថ្លៃទំនិញនៅក្នុងឱកាសបុណ្យទានសំខាន់ៗ ជាពិសេសការឡើងថ្លៃលើសេវាដឹកជញ្ជូន ត្រូវបានរដ្ឋាភិបាលអះអាងថា ដោយសារកម្ពុជា ជាប្រទេសសេដ្ឋកិច្ចទីផ្សារសេរី។

ទោះយ៉ាងណា ការឡើងថ្លៃទំនិញនេះ នៅមានកម្រិត និងមិនទាន់មានការប្រតិកម្មពីពលរដ្ឋនៅឡើយ។

យោងតាមរបាយការណ៍បូកសរុបការងារឆ្នាំ២០២១ និងដាក់ទិសដៅការងារឆ្នាំ២០២២ ​ របស់ធនាគារជាតិនៃកម្ពុជា ដែលចេញផ្សាយកាលពីពេលថ្មីៗនេះ បានឱ្យដឹងថា អតិផរណារួមសម្រាប់ឆ្នាំ២០២២នេះ អាចនឹងមានអត្រា២,៦% ខណៈអតិផរណារួមក្នុងឆ្នាំ២០២១ បាន​ហក់ឡើងរហូតដល់៣% ហើយកាលពីឆ្នាំ២០២០ អត្រានេះស្ថិតក្នុងរង្វង់២,៩%។

របាយការណ៍ដដែល បានឲ្យដឹងថា អតិផរណារួមក្នុងអត្រា ២,៦%នេះ ត្រូវបានព្យាករណ៍ដោយផ្អែកទៅលើកំណើនក្រុមថ្លៃម្ហូបអាហារនឹងបន្តថយចុះមកវិញ ដោយសារមានការជំរុញជាចម្បងដូចជាភាពប្រសើរឡើងនៃការផ្គត់ផ្គង់។ ​ការបន្តងើបឡើងវិញនៃប្រាក់ចំណូលពលរដ្ឋ និងកំណើនថ្លៃក្រុមទំនិញ និងសេវាកម្ម ដែលពាក់ព័ន្ធនឹងប្រេងឥន្ទនៈនឹងថយចុះតម្លៃមកវិញ  ព្រមទាំង​អត្រាប្តូរប្រាក់ផ្លូវការបន្តមានស្ថិរភាព ក្នុងរង្វង់៤ ០៧៥រៀល ក្នុង១ ដុល្លារអាមេរិក៕

ដោយ៖ ទួន សុផល