ប្រមុខការបរទេសកម្ពុជា-បារាំង ផ្លាស់ប្តូរយោបល់លើកិច្ចសហប្រតិបត្តិការ និងវិបត្តិនៅមីយ៉ាន់ម៉ា

ការផ្លាស់ប្តូរយោបល់គ្នានេះ បានធ្វើឡើងនៅក្នុងកិច្ចសន្ទនាតាមទូរស័ព្ទរវាងលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ជាមួយលោក ហ្សង់-អ៊ីវ ឡឺ ឌ្រីយ៉ង់ រដ្ឋមន្ត្រីកិច្ចការអឺរ៉ុប និងការបរទេសនៃសាធារណរដ្ឋបារាំង នេះបើតាមព័ត៌មានពីក្រសួងការបរទេស។

បើតាមក្រសួងការបរទេស ខណៈដែលព្រះរាជាណាចក្រកម្ពុជា កាន់តំណែងជាប្រធានអាស៊ានសម្រាប់ឆ្នាំ​២០២២​សាធារណរដ្ឋបារាំង ក៏កាន់តំណែងជាប្រធានសហភាពអឺរ៉ុបសម្រាប់ឆមាសទីមួយក្នុងឆ្នាំនេះផងដែរ ហើយនៅក្នុងជំនួបសន្ទនានេះ រដ្ឋមន្ត្រីការបរទេសទាំងពីរបានផ្លាស់ប្តូរយោបល់លើកិច្ចសហប្រតិបត្តិការទ្វេភាគី និងពហុភាគី ព្រមទាំងលើបញ្ហាប្រឈមសម្រាប់តំបន់ឥណ្ឌូប៉ាស៊ីហ្វិក និងភាពតានតឹងក្នុងតំបន់ ជាពិសេសពាក់ព័ន្ធនឹងវិបត្តិនៅប្រទេស មីយ៉ាន់ម៉ា។

ចំពោះទំនាក់ទំនងទ្វេភាគី លោកឧបនាយករដ្ឋមន្ត្រី បានថ្លែងអំណរគុណយ៉ាងកក់ក្តៅចំពោះ លោក ហ្សង់-អ៊ីវ ឡឺ ឌ្រីយ៉ង់ ដែលបានផ្ញើសារលិខិតដ៏មានអត្ថន័យក្នុងឱកាសខួបទី៣០ នៃពិធីរំលឹកខួបកិច្ចព្រមព្រៀងសន្តិភាពទីក្រុងប៉ារីស ដែលធ្វើឡើងនៅថ្ងៃទី២៣ ខែតុលា ឆ្នាំ២០២១ នៅរាជធានីភ្នំពេញ និងចំពោះការរួមចំណែករបស់បារាំងក្នុងការអភិវឌ្ឍសេដ្ឋកិច្ច-សង្គម លើវិស័យជាច្រើន ដូចជាការអប់រំ សុខភាព វប្បធម៌ ការការពារជាតិ យុត្តិធម៌ កសិកម្ម ទេសចរណ៍ អគ្គិសនី ការប្រែប្រួល អាកាសធាតុជាដើម។ ប្រទេសបារាំងជាស្ថាបត្យករដ៏សំខាន់មួយរូប និងជាសហប្រធាននៃសន្និសីទទីក្រុងប៉ារីសស្តីពីកម្ពុជា  ហើយបារាំង គឺជាអ្នករួមចំណែកដ៏សំខាន់មួយផងដែរ ក្នុងការស្តារសេដ្ឋកិច្ច និងសង្គមរបស់កម្ពុជា។

លោកឧបនាយករដ្ឋមន្ត្រី បានជម្រាបជូនលោក ហ្សង់-អ៊ីវ ឡឺ ឌ្រីយ៉ង់ អំពីលទ្ធផល នៃដំណើរទស្សនកិច្ចរបស់សម្តេចតេជោនាយករដ្ឋមន្ត្រី ទៅកាន់ប្រទេសមីយ៉ាន់ម៉ា ដែលបានធ្វើឡើងនៅថ្ងៃទី០៧-០៨ ខែមករា ឆ្នាំ២០២២កន្លងទៅនេះ ក្នុងគោលបំណងជំរុញការអនុវត្តកិច្ចព្រមព្រៀងជាឯកច្ឆន្ទប្រាំចំណុច ដែលប្រមុខរដ្ឋ ប្រមុខរដ្ឋាភិបាលអាស៊ាន បានឯកភាពគ្នានៅទីក្រុងហ្សាការតា កាលពីថ្ងៃទី២៤ ខែមេសា ឆ្នាំ២០២១។

លោកឧបនាយករដ្ឋមន្ត្រី ក៏បានលើកឡើងនូវខ្លឹមសារនៃកិច្ចសន្ទនាតាមប្រព័ន្ធវីដេអូ នៅថ្ងៃទី២៦ ខែមករា កន្លងទៅនេះ រវាងសម្តេចតេជោនាយករដ្ឋមន្ត្រី និងនាយឧត្តមសេនីយ៍ជាន់ខ្ពស់ មីន អោង ឡាំង ប្រធានក្រុមប្រឹក្សារដ្ឋបាលរដ្ឋនៃប្រទេស មីយ៉ាន់ម៉ា ដោយសង្កត់ធ្ងន់ថា បំណងតែមួយគត់របស់កម្ពុជា គឺជួយប្រទេសមីយ៉ាន់ម៉ា ឱ្យវិលទៅរកប្រក្រតីភាពឡើងវិញ បញ្ចប់អំពើហិង្សា សម្រេចបាននូវសន្តិភាព និងការបង្រួបបង្រួមជាតិរវាងគ្រប់ភាគីពាក់ព័ន្ធ ហើយរិះរកវិធីផ្តល់ជំនួយមនុស្សធម៌រួមទាំងវ៉ាក់សាំងផងដែរ ដល់ពលរដ្ឋទាំងអស់ដែលកំពុងត្រូវការចាំបាច់ ដោយពុំមានការរើសអើង។

លោក ហ្សង់-អ៊ីវ ឡឺ ឌ្រីយ៉ង់ បានសម្តែងការគាំទ្រចំពោះតួនាទីជាប្រធានអាស៊ានរបស់កម្ពុជា មជ្ឈភាពអាស៊ាន តាមរយៈយន្តការនានាដឹកនាំដោយអាស៊ាននៅក្នុងនិមាបនកម្មតំបន់ដែលកំពុងវិវត្ត ក៏ដូចជាទស្សនៈវិស័យរបស់អាស៊ានស្តីពីឥណ្ឌូប៉ាស៊ីហ្វិក។ លោកបានបញ្ជាក់ពីការគាំទ្រចំពោះកុងសង់ស៊ីសទាំង៥ចំណុចសម្រាប់ការដោះស្រាយវិបត្តិនៅក្នុងប្រទេសមីយ៉ាន់ម៉ា ហើយបានកត់សម្គាល់ពីដំណើរទស្សនកិច្ចនាពេលថ្មីៗនេះរបស់សម្តេចតេជោនាយករដ្ឋមន្ត្រី ទៅកាន់ប្រទេសមីយ៉ាន់ម៉ា និងបានសម្តែងការព្រួយបារម្ភយ៉ាងខ្លាំងចំពោះការវិវត្តនាពេលថ្មីៗនេះ នៅក្នុងប្រទេស មីយ៉ាន់ម៉ា។ បារាំងបានអំពាវនាវឱ្យបញ្ឈប់ជាបន្ទាន់នូវអំពើហិង្សា។

លោក ហ្សង់-អ៊ីវ ឡឺ ឌ្រីយ៉ង់ បញ្ជាក់ថា បារាំងក្នុងនាមជាប្រធានសហភាពអឺរ៉ុប នឹងរៀបចំវេទិកាថ្នាក់រដ្ឋមន្ត្រីសម្រាប់កិច្ចសហប្រតិបត្តិការនៅឥណ្ឌូប៉ាស៊ីហ្វិក នៅថ្ងៃទី២២ ខែកុម្ភៈ ឆ្នាំ២០២២ នៅទីក្រុងប៉ារីស ដោយមានការចូលរួមពីប្រទេសពាក់ព័ន្ធទាំងអស់ ហើយលោកឧបនាយករដ្ឋមន្ត្រី ប្រាក់ សុខុន បានទទួលការអញ្ជើញឡើងថ្លែងសុន្ទរកថា បើកក្នុងវេទិការខាងលើក្នុងនាមជាប្រធានអាស៊ាន៕

អត្ថបទ៖ កោះកែវ