​ផ្កាស្បៃ​រឿង​លក់​មិនដាច់​ ដោយ​សារ​តែជំនឿ​ឆ្នាំនេះ​​ឱ្យ​យក​ពណ៌​ខៀវ​ ​

ផ្កាស្បៃរឿងដែលបងប្អូនកសិករលក់បន្តឲ្យឈ្មួញយកមកដាក់លក់សម្រាប់យកទៅសែនព្រេនទទួលទេវតាឆ្នាំថ្មី ប្រពៃណីយ៍ចិន វៀតណាមនាឆ្នាំនេះបែជានៅសល់សឹង​ទាំងអស់ដោយសារ​តែមានការបង្ហោះថា ទេវតាឆ្នាំនេះយកពណ៌ខៀវជាសំណាង។

លោក ព្រហ្ម កុសល ជាអ្នកលក់ផ្កាអង្គារសិល៍នៅមុខផ្សារច្បារអំពៅបានប្រាប់កម្ពុជាថ្មីថា ឆ្នាំនេះអ្នកលក់ផ្កាអង្គារសិល៍នាំគ្នាខកចិត្តដោយសារលក់មិនដាច់ បន្ទាប់ពីមានការទស្សន៍ទាយថា ទេវតាឆ្នាំថ្មីប្រពៃណីយ៍ចិន វៀតណាម​គឺហាម​ពណ៌ក្រហម និងពណ៌លឿង។ ដូច្នេះហើយគេយល់ថា ផ្កាអង្គារសិល៍មានពណ៌លឿងទើបគេមិនទិញយកទៅដាក់ទទួលទេវតាដូចតាំងពីដូនតាមកនោះ។

លោក កុសល បន្តថា បើសិនជាឆ្នាំៗក្រោយបើគ្រូទាយទស្សន៍ទាយបែបនេះទៀតគឺច្បាស់ជាកសិករលែងនាំគ្នាដាំផ្ការអង្គារសិល៍ទៀតហើយ ព្រោះផ្ការនេះមានតែពណ៌លឿង។

ចំពោះ អ្នកមានកូនកាត់ខ្សែរស្រឡាយចិនវិញបាននិយាយថា បើសិនជាទេវតាឲ្យតម ពណ៌លឿង និងពណ៌ក្រហមនោះច្បាស់ជាអ្នកលក់ក្រដាសអាំងប៉ាវពណ៌ក្រហមវិញពុំមានអ្នកទិញយកទៅដាក់លុយសម្រាប់ចែកចាយដល់ញាតិមិត្តតាំងពីបុរាណនោះឡើយ។

ប៉ុន្តែក្រដាសអាំងប៉ាវពណ៌ក្រហមនៅតែមានគេទិញយកទៅប្រើប្រាស់ខុសប្លែកពីផ្ការស្បៃរឿងដែលគេតមហើយមិនទិញយកទៅសែនទទួលទេវតា។

គួរបញ្ជាក់ថា ឆ្នាំថ្មីនេះអ្នកដាំ និងលក់ផ្ការស្បៃរឿងនាំគ្នាខកចិត្តព្រោះខាតបង់ទាំងកម្លាំងក៏ដូចជាទឹកប្រាក់ដែលខិតខំដាំសម្រាប់យកមកលក់នាថ្ងៃបុណ្យចូលឆ្នាំនោះ៕

អត្ថបទ៖ នរា