ព័ត៌មានជាតិ

អង្កការយូនីសេហ្វ ចូលរួមក្នុងការផលិតសម្ភារៈផ្សព្វផ្សាយកម្មវិធីផ្ទេរប្រាក់ ជូនជនរងគ្រោះដោយកូវីដ១៩

បានផុស

៥ years មុន

នៅ

ថ្ងៃសុក្រ ១១ ធ្នូ ២០២០

ដោយ

ក្នុងនាមក្រសួងសង្គមកិច្ចអតីតយុទ្ធជន និងយុវនីតិសម្បទា លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃអគ្គនាយកដ្ឋានបច្ចេកទេសបានថ្លែងថា ក្រសួងសង្គមកិច្ចស្វាគមន៍និងអបអរសាទរចំពោះអង្កការយូនីសេហ្វ ដែលបានចូលរួមសហការ ក្នុងកិច្ចការផលិតសម្ភារៈផ្សព្វផ្សាយកម្មវិធីផ្ទេរសាច់ប្រាក់ឧបត្ថម្ភរបស់រាជរដ្ឋាភិបាល សម្រាប់ផ្តល់ជូនគ្រួសារក្រីក្រនិងជនងាយរងគ្រោះដោយសារជំងឺរាតត្បាតកូវីដ១៩។

ប្រធាននាយកដ្ឋានសុខុមាលភាពសង្គម នៃអគ្គនាយកដ្ឋានបច្ចេកទេសបានថ្លែងបែបនេះនាល្ងាចថ្ងៃព្រហស្បតិ៍ទី១០ ខែធ្នូ ឆ្នាំ២០២០ ខណៈជួបពិភាក្សាជាមួយក្រុមការងារអង្គការយូនីសេហ្វ ដើម្បីពិភាក្សាលើការផលិតសម្ភារផ្សព្វផ្សាយ សម្រាប់កម្មវិធីផ្ទេរសាច់ប្រាក់តាមរយៈ Zoom នៃនាយកដ្ឋានសុខុមាលភាពសង្គម។

យោងតាមរបាយការណ៍របស់នាយកដ្ឋានសុខុមាលភាពសង្គម នៃក្រសួងសង្គមកិច្ចអតីតយុទ្ធជន និងយុវនីតិសម្បទាថ្មីៗនេះ បានបញ្ជាក់ថា ចាប់ពីថ្ងៃទី១០ខែធ្នូនេះ តទៅបងប្អូនគ្រួសារក្រីក្រ និងងាយរងគ្រោះពិសេស ដែលទទួលផលប៉ះពាល់ដោយសារជំងឺរាតត្បាតកូវីដ១៩ អញ្ជើញមកពិនិត្យឈ្មោះឲ្យបានត្រឹមត្រូវ នៅតាមមូលដ្ឋានឃុំ សង្កាត់រៀងៗខ្លួនដើម្បីបន្តទទួលសាច់ប្រាក់ឧបឋមពីរាជរដ្ឋាភិបាលក្នុងសកម្មភាពជុំទី៣_លើកទី២គិតចាប់តាំងពី

ថ្ងៃទី១០ ខែធ្នូ ឆ្នាំ២០២០នេះតទៅ។ ដោយឡែកគ្រួសារ ដែលមិនទាន់បានទទួលសាច់ប្រាក់ឧបត្ថម្ភពីរាជរដ្ឋាភិបាលដូចព័ត៌មានខាងលើ សូមរួសរាន់មកទំនាក់ទំនងជាមួយអាជ្ញាធរមូលដ្ឋានដែលខ្លួនស្នាក់អាស្រ័យនោះ ដើម្បីទទួលបានអត្ថប្រយោជន៍ ដែលរាជរដ្ឋាភិបាលបានផ្តល់ជូនជៀសវាងភាពមិនប្រក្រតីណាមួយកើតឡើង ដោយសារតែការខុសឈ្មោះឬអត្តសញ្ញាណណាមួយនោះឡើយ៕

អត្ថបទ៖ វិមាន

Related Topics:កិច្ចប្រជុំ