ទូតជប៉ុន សន្យាជំរុញអ្នកវិនិយោគជប៉ុន មកបណ្តាក់ទុននៅកម្ពុជាបន្ថែមទៀត

លោក ម៉ាសាហ៊ីរ៉ុ មីខាមី (Masahiro MIKAMI) ឯកអគ្គរដ្ឋទូតជប៉ុនប្រចាំកម្ពុជា បានសន្យាថា នឹងជួ យជំរុញអ្នកវិនិយោគជប៉ុន មកបណ្តាក់ទុននៅកម្ពុជាបន្ថែមទៀត ខណៈគិតត្រឹមដំណាច់ខែមករាឆ្នាំនេះ CDC បានចុះបញ្ជីក្រុមហ៊ុនជប៉ុន ១៤៧គម្រោង មានទុនវិនិយោគ ២,៩ប៊ីលានដុល្លារ។ ការសន្យា របស់លោកឯកអគ្គរដ្ឋទូចនេះ បានធ្វើឡើងកាល ពីចុងសប្តាហ៍នេះ ក្នុងកិច្ចប្រជុំលើកទី ២៣ នៃគណៈកម្មាធិការចម្រុះកម្ពុជា-ជប៉ុន។

លោកឯកអគ្គរដ្ឋទូត បានគូសបញ្ជាក់ពីភាពចាំបាច់ ក្នុងការបន្តកិច្ចសហប្រតិបត្តិការ រវាងស្ថាប័នរដ្ឋរបស់កម្ពុជា និងអ្នកវិនិយោគជប៉ុន ដើម្បីឈានទៅរកភាពជោគជ័យ ក្នុងសកម្មភាពធុរកិច្ច និងវិនិយោគនៅកម្ពុជា ហើយដែលប្រការនេះនឹងដើរតួជាសារវិជ្ជមាន សម្រាប់ទាក់ទាញវិនិយោគិនជប៉ុន មកបណ្តាក់ទុននៅកម្ពុជា បន្ថែមទៀត។

លោកឯកអគ្គរដ្ឋទូត ក៏បានបង្ហាញផ្លូវការប្ដេជ្ញាចិត្ត ក្នុងការបន្តចូលរួមសហការ ជាមួយរាជរដ្ឋាភិបាលកម្ពុជា ក្នុងកិច្ចជំរុញ និងទាក់ទាញវិនិយោគផ្ទាល់ពីជប៉ុនមកកម្ពុជា ដើម្បីឆ្ពោះទៅរកវឌ្ឍនភាព និងវិបុលភាពសេដ្ឋកិច្ច នៃប្រទេសទាំងពីរ។

លោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា បានលើកឡើងពីទំនាក់ទំនង ដែលកាន់តែល្អប្រសើរ ដែលត្រូវបានសបញ្ជាក់តាមរយៈជំនួប រវាងថ្នាក់ដឹកនាំនៃប្រទេសទាំងពីរ ដូចជាជំនួបពិភាក្សាតាទូរស័ព្ទ រវាងសម្តេចតេជជានាយករដ្ឋមន្ត្រី ជាមួយលោកនាយករដ្ឋមន្តី ជប៉ុន កាលពីថ្ងៃទី ១ ខែធ្នូ ឆ្នាំ ២០២១ និងជំនួបរវាងលោក ហ៊ុន ម៉ាណែត និងថ្នាក់ដឹកនាំជប៉ុន នៅក្នុងអំឡុងពេលនៃដំណើរទស្សនកិច្ច ទៅកាន់ប្រទេសជប៉ុននាសប្ដាហ៍នេះ។

លោករដ្ឋមន្ត្រីប្រតិភូ បានរំលេចពីច្បាប់ ស្តីពី វិនិយោតថ្មីនៃព្រះរាជាណាចក្រកម្ពុជា ដែលទើបត្រូវបានអនុម័ត និងប្រកាសឲ្យប្រើកាលពីថ្ងៃទី ១៥ ខែតុលា ឆ្នាំ ២០២១ ដែលបានកំពុងក្លាយជាមូលដ្ឋានគតិយុត្តិ ដ៏រឹងមាំមួយទៀតរបស់កម្ពុជា សម្រាប់ពាក់ទាញការវិនិយោគ និងជួយជំរុញដល់ការស្ដារសេដ្ឋកិច្ច ក្រោយវិបត្តិនៃជំងឺកូវីដ-១៩។

លោករដ្ឋមន្ត្រីប្រតិភូ ក៏បានវាយតម្លៃខ្ពស់ និងកោតសរសើរ ចំពោះសកម្មភាពវិនិយោគ របស់វិនិយោគិនជប៉ុន ទាំងអស់ក្នុងវិស័យកម្មន្តសាល មិនមែនវាយនភណ្ឌ ដែលបានដើរតួនាទីយ៉ាងសំខាន់ក្នុងការចូលរួម ចំណែកដល់ការធ្វើពិពិធកម្មមូលដ្ឋានសេដ្ឋកិច្ចកម្ពុជា និងការអភិវឌ្ឍធនធានមនុស្សនៅកម្ពុជា។

លោកឯកអគ្គរដ្ឋទូតជប៉ុន បានសម្តែងនូវការកោតសរសើរ និងថ្លែងអំណរគុណដល់ក្រសួង-ស្ថាប័នពាក់ព័ន្ធទាំងអស់ ដែលកន្លងមកបានខិតខំប្រឹងប្រែង ប្រកបដោយស្មារតីទទួលខុសត្រូវខ្ពស់ ក្នុងការសម្របសម្រួល និងផ្តល់នូវការឆ្លើយ តប ប្រកបដោយភាពទន់ភ្លន់ចំពោះក្តីកង្វល់ និងសំណូមពររបស់ វិនិយោគិនជប៉ុន ដែលបានផ្តល់សេវាថែទាំយ៉ាងល្អប្រសើរ និងភាពកក់ក្តៅដល់វិនិយោគិនជប៉ុន។

គួរកត់សម្គាល់ថា គិតត្រឹមដំណាច់ខែមករា ឆ្នាំ ២០២២ ក្រុមប្រឹក្សាអភិវឌ្ឍន៍កម្ពុជា បានស្វាគមន៍និងបានចុះបញ្ជីក្រុមហ៊ុនជប៉ុនចំនួន ១៤៧គម្រោង ក្នុងទុនវិនិយោគទឹកប្រាក់ប្រមាណ ២,៩ប៊ីលានដុល្លារអាមេរិក៕

អត្ថបទ៖ សំអឿន