សម្ដេច​តេជោ ហ៊ុន សែន ប្រកាសប្រាប់មិត្តបរទេសថា មិនអាចអត់អោនឲ្យអ្នក​ ដែល​ប្រមា​ថ​ប្រពន្ធ​កូនសម្ដេច​​ជាដាច់ខាត

នៅក្នុងពិធីសម្ពោធបើកការដ្ឋានសាងសង់ ស្ថានីយប្រព្រឹត្តកម្មទឹកកខ្វក់បឹងជើងឯក នាព្រឹកថ្ងៃទី ២២ ខែកុម្ភៈនេះ សម្ដេចតេជោ ហ៊ុន សែន នាយក​រដ្ឋ​មន្រ្តីនៃកម្ពុជា ​​បានបញ្ជាក់​ថា សម្តេច​មិនអត់​អោន​ឲ្យអ្នក​ ដែល​ប្រមាថប្រពន្ធ​កូន របស់​សម្តេច​​ជាដាច់ខាត ទោះជាស្ថិតក្នុងតម្លៃណា ក៏ដោយ។​​

សម្ដេច​តេជោ ហ៊ុន សែន​ បាន​លើកឡើងថា «អ្នកឯង​ប្រមាថប្រពន្ធខ្ញុំថា ​ជាប្រពន្ធរបស់មេដឹកនាំវៀតណាម កូនរបស់ខ្ញុំជាកូន របស់មេដឹកនាំវៀតណាម បើខ្ញុំមិនប្រតិកម្ម ខ្ញុំមិនមែនជាមនុស្សទេ អញ្ចឹងបានខ្ញុំប្រាប់មេដឹកនាំ ក្នុងប្រទេសមួយចំនួនថា ខ្ញុំអត់​ទទួល​យក​បាន​ទេ ចំណុចនេះ​ រឿងចង់ទៅជាស្អីទៅចុះ តែរឿងកន្លែងហ្នឹងមួយ អ្នកឯងមិនប៉ះប៉ូវឲ្យខ្ញុំ ខ្ញុំថាទោះបីជាជាតិក្រោយ ក៏ត្រូវតែប្រយុទ្ធគ្នា​ ពុំអាចទទួលយក ការប្រមាថបែបនេះបានទេ។ ប្រ​ពន្ធកូនរបស់ខ្ញុំ កំសត់ខ្លាំងណាស់​ មុនពេលដែលបានមកជួបខ្ញុំវិញ ខ្ញុំមិនដឹងថា ប្រពន្ធ និងកូនខ្ញុំត្រូវស្លាប់ ឬរស់នោះទេ»។​

សម្ដេចតេជោនាយករដ្ឋមន្រ្តី បាន​អះអាងទៀតថា នៅវេលាម៉ោង ៧ព្រឹក ថ្ងៃទី២៤ ខែកុម្ភៈ ខាងមុខនេះ សម្ដេចនឹង​មានរឿងខ្លីមួយ​ ដែលគេមិនធ្លាប់បានលឺ និងមិនធ្លាប់បានស្តាប់ នៅក្នុងបណ្ដាញហ្វេសប៊ុករបស់សម្ដេច ​ហើយនោះគឺជាខួបលើកទី ៤៣ នៃការជួបគ្នាឡើងវិញរ​វាងសម្ដេច និងភរិយា។ ដូច្នេះការប្រមាថមួយនេះ ​មិត្តភ័ក្កិបរទេសទាំងឡាយ​ត្រូវយល់ សម្តេច​នឹងមិនអនុញ្ញាត​ ហើយក៏មិនយល់ព្រមជាមួយ​ការប្រមាថបែបនេះ នោះទេ។

សម្ដេច​តេជោ ហ៊ុន សែន​ បានលើកឡើងថា សម្តេចអាចហៅមេដឹកនាំ​ខ្មែរក្រហម ចូលមកហូបបាយនៅផ្ទះជាមួយ​គ្នា​ តែសម្តេចមិនអាចទទួលយក នូវការប្រមាថធុននេះបានទេ និយាយ​ឲ្យជាក់លាក់។ បើត្រូវធ្វើសកម្មភាពយោធាឡើងវិញ ក៏​ហ៊ានធ្វើ ពីព្រោះនេះមិនមែនជារឿងធម្មតា ពេកទេ​។ ទោះជា​យ៉ាងណា ការលើកឡើងនេះ សម្តេច​តេជោនាយករដ្ឋមន្រ្តី​​ មិនបាន​បង្ហាញ​ឈ្មោះ​អ្នក​ប្រមាថ​នោះទេ​៕

អត្ថបទ៖ កោះកែវ​