ព័ត៌មានជាតិ

សម្តេចតេជោហ៊ុន សែន នឹងជួបសំណេះសំណាលនិងទទួលទានអាហារជាមួយនាយនាវីនិងពលនាវឹកស្វ័យការពារជើងទឹកជប៉ុននៅល្ងាចថ្ងៃទី១៥មីនា

បានផុស

៣ years មុន

នៅ

ថ្ងៃសុក្រ ១១ មីនា ២០២២

ដោយ

ប្រមុខរាជរដ្ឋាភិបាលកម្ពុជាសម្តេចអគ្គមហាសេបនាបតីតេជោ ហ៊ុន សែន គ្រោងនឹងជួបសំណេះសំណាលជាមួយនាយនាវីនិងពលនាវឹកស្វ័យការពារជើងទឹកជប៉ុននឹងពិសាបាយនៅសណ្ឋាគារសុខាខេត្តព្រះសីហនុនៅល្ងាច ថ្ងៃទី១៥ ខែមីនា ២០២២។ ការសម្រេចចិត្តរបស់ប្រមុខរាជរដ្ឋាភិបាលកម្ពុជាបែបនេះបង្ហាញពីការរឹងចំណងមិត្តភាព និង កិច្ចសហប្រតិបត្តិការដ៏រឹងមាំរវាងកម្ពុជា ជប៉ុន ដើម្បីអបអរខួប ៧០ ឆ្នាំនៃទំនាក់ទំនងការទូតនៃប្រទេសទាំងពីរនិងខួបលើកទី ៣០នៃថ្ងៃចងចាំការមកដល់នៃកងរក្សាសន្តិភាព របស់ជប៉ុនហៅថា PKO។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លងផុតរយៈពេល ៣០ ឆ្នាំនេះក៏ជាខួបអនុស្សាវរីយ៍ដែលកម្ពុជាត្រូវធ្វើជួនពេលដែលកងនាវារបស់ជប៉ុននឹងចូលមកដល់កំពង់ផែកម្ពុជានៅពាក់កណ្តាលក្នុងខែមីនាខាងមុខ នេះដែលជាផ្នែកមួយនៃសកម្មភាពនៃការរំលឹកខួប៣០ឆ្នាំ នៃកងស្វ័យការពាររបស់ជប៉ុនមកកាន់កម្ពុជាដែលមានពលីកម្មរបស់កងទ័ព កងនគរបាលរបស់ជប៉ុននៅលើទឹកដី កម្ពុជាផងហើយក៏ដំណើរឆ្ពោះទៅអបអរសាទរខួបអនុស្សាវរីយ៍ ៧០ ឆ្នាំ នៃទំនាក់ទំនងការទូតរវាងប្រទេសទាំងពីរផង។

យោងតាមប្រភពមន្ត្រីកងទ័ពជើងទឹកកម្ពុជាបានឲ្យដឹងថា នាវាស្វ័យការពារជប៉ុនចំនួនពីរគ្រឿងប្រចាំតំបន់ឥណ្ឌូ-ប៉ាស៊ីហ្វិកគ្រោងនឹងចូលចតនៅកំពង់ផែស្វយ័តក្រុងព្រះសីហនុរយៈពេល ៣ ថ្ងៃចាប់ពីថ្ងៃទី១៥ ដល់ ១៧ ខែមីនាឆ្នាំ២០២២ ដើម្បីសម្តែងការគួរសមនិងបំពេញទស្សនកិច្ចជាមិត្តភាពនៅកម្ពុជានិងជាការរំលឹកអបអរសាទរ ខួបលើកទី៣០ នៃកិច្ចសហប្រតិបត្តិការរក្សាសន្តិភាពនៅក្នុងប្រទេសកម្ពុជា។

សូមបញ្ជាក់ថា នាវាទី១ ឈ្មោះ URAGA – 463 ជាប្រភេទនាវាប្រឆាំងមីនមានបណ្ដោយ ១៤១ ម៉ែត្រ ទទឹង ២២ ម៉ែត្រ ជម្រៅទឹក ៥,៤ ម៉ែត្រមានទម្ងន់ផ្ទុក ៥.៦៥០ តោន និងមាននាវិកចំនួន ១២៦ នាក់ ។ នាវាទី២ឈ្មោះ HIRADO – 305 មានបណ្ដោយ ៦៧ ម៉ែត្រ ទទឹង ១១ ម៉ែត្រ ជម្រៅទឹក ២,៧ ម៉ែត្រ មានទម្ងន់ផ្ទុក ៦៩០ តោន និងមាននាវិក ចំនួន៥៤នាក់។ នាវាទាំងពីរគ្រឿងនេះដឹកនាំបញ្ជារួមដោយលោក Noguchi Yasushi មេបញ្ជាការកងពលធំទី១ បោសសំអាតមីនប្រចាំតំបន់ឥណ្ឌូ-ប៉ាស៊ីហ្វិក ៕

ដោយ ៖ ណារី