នាយករដ្ឋមន្រ្តីជប៉ុន នឹងអញ្ជើញមកដល់កម្ពុជា នារសៀលនេះ ដើម្បីបំពេញទស្សនកិច្ច ២ថ្ងៃ

តាមការគ្រោងទុក នៅវេលាម៉ោងប្រមាណ ៣ រសៀលថ្ងៃទី២០ ខែមីនា នេះ លោក គីស៊ីដា ហ្វូមីអូ (KISHIDA Fumio) នាយករដ្ឋមន្រ្តីជប៉ុន នឹងមកដល់ព្រលានយន្តហោះអន្តរជាតិភ្នំពេញ ដើម្បីបំពេញទស្សនកិច្ចផ្លូវការនៅព្រះរាជាណាចក្រកម្ពុជា រយៈពេល២ ថ្ងៃ ដោយចាប់ពីថ្ងៃទី២០ ដល់២១ ខែមីនា ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលមកដល់កម្ពុជា លោក KISHIDA Fumio នឹងអញ្ជើញទៅ ទស្សនាចេតិយ និងគោរពវិញ្ញាណក្ខន្ធលោក NAKATA HARUYUKI ជនជាតិជប៉ុន ដែលជាអតីតអធិការប៉ូលិសអ៊ុនតាក់ នៅវត្តតាំងក្រសាំង ។ នៅរសៀលថ្ងៃដដែលនេះ ប្រតិភូជាន់ខ្ពស់នាយករដ្ឋមន្ត្រីជប៉ុន នឹងអញ្ជើញដាក់កម្រងផ្កា គោរពវិញ្ញាណក្ខន្ធនៅវិមានឯករាជ្យ និងព្រះបរមរតនកោដ្ឋ ។ រួចហើយលោកនឹងអញ្ជើញទៅកាន់វត្តឧណ្ណាលោម ដើម្បីទស្សនាចេតិយ និងគោរពវិញ្ញាណក្ខន្ធលោក NAKATA ATSUHITO ជនជាតិជប៉ុន ដែលជាអតីតបុគ្គលិកស្ម័គ្រចិត្តរបស់អង្គការសហប្រជាជាតិ។

នៅរសៀលថ្ងៃដដែលនេះដែរ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញបដិសណ្ឋារកិច្ចជាផ្លូវការ និងប្រជុំទ្វេភាគី ជាមួយឯកឧត្តម គីស៊ីដា ហ្វូមីអូ (KISHIDA Fumio) នាយករដ្ឋមន្ត្រីជប៉ុននៅវិញមានសន្តិភាព រួចហើយនឹងមានពិធីជប់លៀងជាផ្លូវការជូននាយករដ្ឋមន្ត្រីជប៉ុន និងគណៈប្រតិភូនៅវិមានសន្តិភាព។

បើតាមក្រសួងការបរទេស ដំណើរទស្សនកិច្ចផ្លូវការរបស់លោក គីស៊ីដា ហ្វូមីអូ នៅព្រះរាជាណាចក្រកម្ពុជា នាពេលនេះ បញ្ជាក់ច្បាស់អំពីការប្តេជ្ញាចិត្តយ៉ាងមោះមុតរបស់ប្រទេសទាំងពីរ ក្នុងការលើកកម្ពស់ និងពង្រឹងនូវ ទំនាក់ទំនងល្អប្រពៃដែលមានស្រាប់ និងភាពជាដៃគូយុទ្ធសាស្រ្ត ព្រមទាំងកិច្ចសហប្រតិបត្តិការរវាងកម្ពុជា និងជប៉ុន ទាំងក្នុងក្រប ខ័ណ្ឌទ្វេភាគី និងពហុភាគី សម្រាប់ផលប្រយោជន៍ទៅវិញទៅមកនៃប្រទេសទាំងពីរ៕ កោះកែវ