ឃាត់ខ្លួនជនបង្កើត Account Facebook ជេរប្រមាថថ្នាក់ដឹកនាំ

ជនសង្ស័យដែលបង្កើត Account Facebook ក្លែងក្លាយ ជេរប្រមាថបរិហារកេរ្តិ៍ថ្នាក់ដឹកនាំ និងស្នងការតាមបណ្ដាខេត្ត ត្រូវបានស្រាវជ្រាវ និងឈានដល់ការឃាត់ខ្លួន នៅព្រឹក ថ្ងៃទី១៥ ខែធ្នូ ឆ្នាំ២០២០នេះ ។

សមត្ថកិច្ច បានឲ្យដឹងថា នៅវេលាម៉ោង ៨ និង៤៨នាទី ព្រឹក ថ្ងៃទី១៥ ខែធ្នូ ឆ្នាំ២០២០ កំលាំងនៃស្នងការនគរបាលខេត្តកែប សហការជាមួយ នាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ បាននាំខ្លួនជនសង្ស័យ ឈ្មោះ ងិន ស៊ុយទ្រី ភេទប្រុស អាយុ២៥ឆ្នាំ រស់នៅ ភូមិកែប សង្កាត់កែប ក្រុងកែប ដើម្បីមកបំភ្លឺ សួរនាំពាក់ព័ន្ធ និងការបង្កើតAccount Facebook ក្លែងក្លាយ ជេរប្រមាថបរិហារកេរ្តិ៍ថ្នាក់ដឹកនាំ និងស្នងការតាមបណ្ដាខេត្ត។

ក្រោយពីសមត្ថកិច្ចបានសួរនាំរួច ជនសង្ស័យបានសារភាពថា ខ្លួនពិតជាបានប្រព្រឹត្តនឹងប្រើប្រាស់អាខោនក្លែងក្លាយពិតប្រាកដមែន។

បន្ទាប់ពីជនសង្ស័យបានសារភាព កំលាំងសមត្ថកិច្ចបានធ្វើការឃាត់ខ្លួនជនសង្ស័យ និងរៀបចំកសាងសុំណុំរឿងបញ្ចូនទៅតុលាការ ដើម្បីចាត់ការតាមនីតិវីធីច្បាប់៕