ព័ត៌មានជាតិ

សម្តេចតេជោ ព្រមានទុកមុនក្រុមចោរកម្មនៅក្រុងសៀមរាបឲ្យដកខ្លួនជាបន្ទាន់

បានផុស

៣ ខែ មុន

នៅ

ថ្ងៃចន្ទ ៤ មេសា ២០២២

ដោយ

ប្រមុខរដ្ឋាភិបាលសម្តេចតេជោ ហ៊ុន សែនបានព្រមានដល់ក្រុមចោរកម្មកុំហ៊ានប្រព្រឹត្តិបទល្មើសនៅក្រុងសៀមរាបថានឹងមិនអាចរួចខ្លួនទេ ហើយគួរតែដកខ្លួនជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីសម្ពោធផ្លូវ ៣៨ ខ្សែនៅក្រុងសៀមរាបនៅព្រឹកមិញនេះ សម្តេចតេជោបានព្រមានទុកមុនថា អ្នកដែលប្រព្រឹត្តិអនាចារ ចោរលួចចោរប្លន់ ត្រូវតែដកខ្លួន។ មុខសញ្ញាជនសង្ស័យមិនអាចគេចខ្លួនបានទេ។ តាមរយៈប្រព័ន្ធកាមេរ៉ាកាន់តែទំនើបភ្ជាប់នៅលើហេដ្ឋារចនាសម្ព័ន្ធផ្លូវទាំង ៣៨ ខ្សែ សមត្ថកិច្ចមិនពិបាកក្នុងការកំណត់អត្តសញ្ញាណជនល្មើស អាចឈានទៅចាប់ខ្លួនបានភ្លាមៗ។

ការអភិវឌ្ឍផ្លូវទាំង ៣៨ ខ្សែនៅក្រុងសៀមរាបក្រៅពីគិតគូរពីបរិស្ថាន និងសោភណភាព ក៏មានភាពប្រទាក់ក្រឡាគ្នារវាងហេដ្ឋារចនាសម្ព័ន្ធជាមួយប្រព័ន្ធគាំពារខាងផ្នែកសន្តិសុខ និងប្រព័ន្ធកាមេរ៉ាសុវត្ថិភាពទីក្រុង ដើម្បីធានាសុខសុវត្ថិភាពដល់ការរស់នៅរបស់ប្រជាពលរដ្ឋ។

ហេដ្ឋារចនាសម្ព័ន្ធផ្លូវទាំង ៣៨ ខ្សែនេះ ក៏ជាបណ្ដាញផ្លូវមេដ៏មានសារៈសំខាន់ ក្នុងការតភ្ជាប់ប្រទាក់ក្រឡាពីទីប្រជុំជនក្រុងសៀមរាប ទៅកាន់តំបន់ដាច់ស្រយាលនៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានា ដែលនឹងជួយសម្រួលដល់ការធ្វើដំណើរបស់ប្រជាពលរដ្ឋ និងភ្ញៀវទេសចរណ៍ក្នុងខេត្ត សំដៅកាត់បន្ថយការកកស្ទះចរាចរណ៍ក្នុងទីក្រុង និងកាត់បន្ថយពេលវេលាក្នុងការដឹកជញ្ជូន និងចរាចរណ៍ទំនិញគ្រប់ប្រភេទ។

ក្នុងពេលចុះទៅពិនិត្យគម្រោងព្រលានយន្តហោះខេត្តសៀមរាបកាលពីម្សិលមិញនេះ សម្តេចតេជោបានប្រសិទ្ធិនាមខេត្តសៀមរាបជាតារារៈនៅទិសឧត្តរ ដែលនឹងជំរុញខេត្តទេសចរណ៍ដ៏ធំនេះលើការវិនិយោគ និងទាក់ទាញភ្ញៀវទេសចរណ៍តាមរយៈអភិវឌ្ឍប្រព័ន្ធហេដ្ឋារចសម្ព័ន្ធប្រទាក់ក្រឡាគ្នា សម្រួលការធ្វើដំណើរដែលនឹងចូលរួមអភិវឌ្ឍនិងលើកស្ទួយដល់ជីវភាពប្រជាពលរដ្ឋ៕

អត្ថបទ៖ ប៊ុណ្ណារ៉ា