​​៤ខែដើមឆ្នាំនេះ ដី និងផ្ទះបុរីមានសន្ទុះ​កើនឡើងជាងគេ​ក្នុងវិស័យអចលនទ្រព្យ

វិស័យអចលនទ្រព្យ រយៈពេល ៤ខែ នៅដើមឆ្នាំ ២០២២នេះ ចាប់ផ្តើមដំណើរការល្អប្រសើរឡើងវិញ គ្រប់ផ្នែកពិសេសដី និងលំនៅឋាន។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចនវត្ថុកម្ពុជា បានប្រាប់កម្ពុជាថ្មីថា ក្នុងរយៈពេលបួនខែឆ្នាំនេះ មានចរន្តពលរដ្ឋចេញដំណើរ និងដើរមើលគម្រោងច្រើន ពិសេសអ្នកវិនិយោគក្នុងស្រុក ខណៈអ្នកវិនិយោគិនបរទេស ក៏កំពុងចូលមកបណ្តើរៗហើយដែរ។ លោក សុខនីម មើលឃើញថា វិស័យអចលនទ្រព្យដែលកំពុងមានការចាប់អារម្មណ៍ច្រើន គឺទៅលើដីធ្លី និងលំនៅឋានជាបុរី។ លោកបន្តដូច្នេះថា« ដី ហើយនឹងលំនៅឋាន ដូចជាបុរី ឬផ្នែកខ្លះជាគម្រោងខុនដូ នៅតាមក្រវ៉ាត់ក្រុងទី៣ ឬទី៤ កំពុងមានការចាប់អារម្មណ៍ខ្លាំង ក្នុងការវិនិយោគ និងទិញទុកដើម្បីចំណេញរយៈពេលខ្លី »។

លោក សុខនីម បានបញ្ជាក់ថា តំបន់ជាយរាជធានីភ្នំពេញ ដែលកំពុងមានសក្តានុពលខ្លាំង គឺនៅប៉ែកខាងជើងឈៀងខាងលិច។

ប្រធានសមាគមអ្នកវាយតម្លៃ និងភ្នាក់ងារអចនវត្ថុកម្ពុជា រូបនេះ បានណែនាំថា ប្រសិនបើពលរដ្ឋមានលុយសមល្មម និងមានផ្ទះស្នាក់នៅហើយ គួរទិញដីនៅជាយក្រុងភ្នំពេញ ទុកដើម្បីចំណេញក្នុងពេលដ៏ខ្លីខាងមុខ។

លោក ច្រឹក សុខនីម នៅតែចាត់ទុកថា ការវិនិយោគវិស័យអចលនទ្រព្យនៅតែជាសរសរស្តម្ភរឹងមាំរបស់សេដ្ឋកិច្ចកម្ពុជា ។

លោកសង្កត់ធ្ងន់ថា ការទិញលក់អចលនទ្រព្យក៏ជាការជំរុញនូវកំណើនសេដ្ឋកិច្ច ការជំរុញកំណើនជីវភាពរបស់ប្រជាជន ម្ចាស់ដីឬម្ចាស់អចលនទ្រព្យជាដើម តាមរយៈការបង្វិល អចលនទ្រព្យទៅនឹងការទទួលបានឱកាសក្នុងការវិនិយោគនៅកន្លែងផ្សេងៗទៀត ។

លោកបន្តទៀតថា អ្នកវិនយោគ និង សហគ្រិន មានលទ្ធភាពជួយទ្រទ្រង់កំណើនសេដ្ឋកិច្ចរបស់ប្រទេសកម្ពុជា តាមរយៈការបញ្ចេញទុន ហើយគម្រោងតូចធំ មួយចំនួន បានចាប់ផ្តើមនៅពេលបច្ចុប្បន្ននេះ៕