គម្រោងកែច្នៃ​ទឹកកខ្វក់ទៅជាជីសរីរាង្គនៅសៀមរាប​​ចំណាយ​ថវិកាជិត ២ លានដុល្លារ គ្រោងបញ្ចប់ដំណាច់ឆ្នាំនេះ

គម្រោងកែច្នៃកាកសំណល់ទឹកកខ្វក់នៅក្នុងក្រុងសៀមរាប ទៅជាជីសរីរាង្គ គ្រោងនឹងសាងសង់រួចរាល់នៅចុងឆ្នាំ២០២២ខាងមុខនេះ។

អភិបាលរងខេត្តសៀមរាប លោក ប្រាក់ សោភ័ណ បានលើកឡើងក្នុងជំនួបជាមួយលោកស្រី អារៀណា អាដេស៊ី (Arianna ARDESI) តំណាងសមាគមអភិបាលក្រុងនិយមនិយាយភាសាបារាំង (AIMF) នាព្រឹកថ្ងៃទី២៥ ខែឧសភានេះថា ទឹកកខ្វក់ រួមនិងកាកសំណល់ផ្សេងៗ ដែលត្រូវបានបង្ហូរចេញតាមប្រព័ន្ធលូទឹកកខ្វក់ក្នុងក្រុងសៀមរាប នឹងត្រូវកែច្នៃទៅជាជីសរីរាង្គ ឬជីមមោក ដើម្បីធ្វើឱ្យប្រសើរឡើងវិញ នូវប្រព័ន្ធគ្រប់គ្រងកាកសំណល់ភក់ចេញពីលូទឹកកខ្វក់ និងចូលរួមលើកកម្ពស់ជីវភាពប្រជាកសិករ តាមរយៈការផ្គត់ផ្គង់ផលិតផលជីក្នុងតម្លៃទាប។

គម្រោងកែច្នៃកាកសំណល់ទឹកកខ្វក់ក្នុងក្រុងសៀមរាប ទៅជាជីសរីរាង្គនេះ គ្រោងនឹងប្រើប្រាស់អស់ថវិកាចំនួន ១ លាន​៧០ ម៉ឺនអឺរ៉ូ ប្រមាណជិត ២ លានដុល្លារអាមេរិក ដែលជាថវិកាហិរញ្ញប្បទាន ទទួលបានពីសមាគមអភិបាលក្រុងនិយមនិយាយភាសាបារាំង ហៅកាត់ថា AIMF សហជីពអន្តរខេត្ត សម្រាប់ប្រព័ន្ធអនាម័យនៅតំបន់ប៉ារីស ហៅកាត់ថា SIAAP និងទីភ្នាក់ងារធនធានទឹកតំបន់ណកម៉ង់ឌី ហៅកាត់ថា ASEN។

គម្រោងនេះ បានចាប់ផ្ដើមស្ថាបនាកាលពីថ្ងៃទី ១៦ ខែមីនា ឆ្នាំ២០២២ ក្នុងបរិវេណអង្គភាពលូទឹក និងស្ថានីយច្រោះសម្អាតទឹកសំណល់ ស្ថិតនៅភូមិកន្ត្រក សង្កាត់ស្វាយដង្គំ ក្រុងសៀមរាប។ គិតត្រឹមថ្ងៃទី២៥ ខែឧសភានេះ ដំណើរ​សាងសង់សម្រេចបានប្រមាណ ២៤ភាគរយ បើធៀបនឹងការងារសរុប ដែលគ្រោងនឹងបញ្ចប់នាខែវិច្ឆិកា ឆ្នាំ ២០២២​ខាងមុខ។

លោក ប្រាក់ សោភ័ណ បានលើកឡើងថា ក្រៅពីជួយកែលម្អអនាម័យសាធារណៈ និងក្របខណ្ឌទូទៅនៃការគ្រប់គ្រង​ភក់ ចេញពីលូទឹកសម្អុយ (រចនាសម្ព័ន្ធគ្រប់គ្រង) ក្នុងក្រុងសៀមរាប គម្រោងផលិតជីសរីរាង្គក្នុងខេត្តសៀមរាប ក្រោមកិច្ចសហការដៃគូអភិវឌ្ឍន៍ នៃសាធារណរដ្ឋបារាំងនេះ ក៏នឹងជួយកាត់បន្ថយការនាំចូលជីកសិកម្មពីក្រៅប្រទេសបានមួយកម្រិត ព្រមជាមួយតម្លៃទាបជាទីផ្សារ។

ស្ថានីយកែច្នៃជីសរីរាង្គនេះ មានសមត្ថភាពផលិតជីបាន ៤៥ម៉ែត្រគូប/ថ្ងៃ និងប្រមាណ ១,០០០ម៉ែត្រគូប/ឆ្នាំ។ ការផលិតជីសរីរាង្គ ពីកាកសំណល់ទឹកកខ្វក់នេះដែរ នឹងមិនមានផលប៉ះពាល់អវិជ្ជមាន ដល់គុណភាពទឹក ដែលហូរចេញចេញពីអាងចម្រោះនោះឡើយ៕