អាជ្ញាធរខេត្តស្ទឹងត្រែង ដាំត្នោត៣ម៉ឺនគ្រាប់ តាមបន្ទាត់ព្រំដែនកម្ពុជា-ឡាវ       

លោកស្វាយ សំអ៊ាង អភិបាលខេត្តស្ទឹងត្រែង នៅព្រឹកថ្ងៃទី០៩កក្កដាឆ្នាំ២០២២ បានដឹកនាំកម្លាំងយកគ្រាប់​ត្នោតចំនួន៣ម៉ឺនគ្រាប់ ទៅដាំនៅតាមខ្សែបន្ទាត់ព្រំដែនកម្ពុជា-ឡាវ  ដើម្បីបង្ហាញឲ្យកូនចៅជំនាន់ក្រោយបានឃើញ និងបានស្គាល់ ពីមរតកដូនតា (គឺត្នោតខ្មែរថែទឹកដីសុវណ្ណភូមិ)។ 

លោក ស្វាយ សំអ៊ាង មានប្រសាសន៏ថា សមិទ្ធផលនេះ នឹងក្លាយទៅជាសម្បត្តិវប្បធម៌សម្រាប់កូនចៅខ្មែរជំនាន់ក្រោយ បានស្គាល់ពីអត្តសញ្ញាណជាតិ បូរណភាពទឹកដីរបស់យើង នៅពេលដែលដើមឆ្នោតនេះដុះលូតលាស់ធំ។

លោក អភិបាលខេត្តមានប្រសាសន៍បន្ថែមថា អ្វីដែលសំខាន់ជាងនេះទៀតនោះ យើងអាចបណ្តុះគំនិត​ឲ្យប្រជាពលររដ្ឋយើងចេះថែរក្សាទឹកដី ព្រៃប្រឹក្សាសម្បត្តិធម្មជាតិ  និងពេលដើមត្នោតដាំដុះលូតលាស់ហើយ ត្រូវរួមគ្នាថែរក្សាឲ្យបានល្អចៀសវាងកុំឲ្យមានភ្លើងឆេះ ហើយអនាគត បងប្អូនកូនចៅយើងរស់នៅជិតខ្សែមន្ទាត់ព្រំដែន និងបានទទួលភោគផលពីដើមត្នោតនេះ។ 

លោក ជា វាសនា ប្រជាពលរដ្ឋរស់នៅភូមិឬទ្ធីសែនជ័យ  ស្រុកបុរីអូរស្វាយ បានទទួលស្គាល់ថា សមិទ្ធផល​ដើមត្នោតនេះពិតជាបានបញ្ជាក់ពីអត្តសញ្ញានជាតិរបស់យើង។ មួយវិញទៀតនិងធ្វើឲ្យមាន​សោភណ្ឌភាព​នៅតាមព្រំដែនផង ហើយអាចប្រែក្លាយតំបន់នេះឲ្យទៅជាទីកន្លែងទេសចរណ៏បានថែមទៀត។ 

សូមបញ្ចាក់ថា នេះជាលើកទី ៤ហើយត្នោតនេះត្រូវបានដាំតាមផ្លូវអភិវឌ្ឍន៍ថ្មីខ្សែបន្ទាត់ព្រំដែន ដោយដាំលើកទី១ មានចំនួន ៣០.០០០(៣ម៉ឺន)គ្រាប់,លើកទី២,ចំនួន ៥០.០០០ (៥ម៉ឺន)គ្រាប់ និងលើកទី៣,មានចំនួន ១០០.០០០ (១០ម៉ឺន) គ្រាប់ លើកទី៤,មានចំនួន ៣០.០០០(៣ម៉ឺន)គ្រាប់ សរុបទាំង៤លើ ក គ្រាប់ត្នោតដែលបានដាំសរុបចំនួន ២១០.០០០(២១ម៉ឺនគ្រាប់)៕ងិនលីម